السبت، 23 يناير 2010

الباستا بالزيتون الأسود

ده طبق خفيف وسريع جدا ، يفيدك لو جاية البيت من بره ومستعجلة ، وماطبختيش حاجة ، والكل جعاااااااااان وعايز يأكل .


المقادير :
1 كيس معكرونة اسباجيتي ( أو أي نوع مش حتقول لأ )
3/1 كوب زيتون أسود يقطع وينزع منه النوى
2 حبة طماطم مضروبة بقشرها بالخلاط ( بحيث تصبح حبيبات خشنة )
3 فص ثوم مفروم
1 قرن فلفل حار مفروم
2/1 علبة معجون طماطم
قليل من البقدونس المقطع خشن
قليل من زيت الذرة
ملح وفلفل


الطريقة :
1- تسلق المعكرونة في ماء مغلي مضاف إليه قليل من الملح .
2- إذا توفر لديك طاسة كبيرة ومتسعة للقلي استخدميها وان لم يتوفر استخدمي حلة سنضع فيها قليل من الزيت حتى يسخن قليلا
3- نضيف الثوم + الفلفل الحار ونقلب .
4- نضيف الزيتون ونقلب ثم الطماطم
5- نضيف قليل من الماء
6- نضيف الملح والفلفل ثم معجون الطماطم
7- نضيف البقدونس
8- نصفي المعكرونة في مصفاة ونضيفها للخليط ونقلب
9- تقدم ساخنة وبجانبها طبق من السلطة الخضراء


ملاحظات مفيدة:
  • البقدونس بأكون مجهزاه من قبل كده ، انتي لو اشتريتي البقدونس وسبتيه زي ما هو في درج الثلاجة بتلف بسرعة ، ممكن تقطعي الأعواد من أسفل ، وتغسليه كويس وتضعيه في مصفاة ، ثم تقطعيه وتحتفظي به في طبق زجاجي مغلق بإحكام ، وتقدري تستخدمي منه طول الأسبوع ويكون طازج ، بس بشرط تغلقيه بإحكام .
  • استخدمي مقص المطبخ في تقطيع البقدونس ستجدينه أسهل بكثير من استخدام السكين .
  • بالنسبة للثوم : بأشتري الثوم الصيني كبير الحجم ، وبأشتري كمية أغسلها بالماء لأن ده بيسهل عليه تقشيرها ، وأقعد بقه أقشر وأقشر وأسمع الراديو وأقشر ، وأكون عامله حسابي ان اليوم ده مش حأقابل حد علشان رائحة الثوم العطرة بتبقى عامله جو فظيع .
  • بعد كده أغسل الثوم كويس بالماء بعد ما اتقشر ، وأضعه في المصفاة للتصفية
  • أفرم الثوم في محضرة الطعام ( قطاعة الكبة ) وعلى كيفك عايزة تعمليه خشن أو ناعم ، شخصيا بأفضله ناعم علشان ده بيريحني جدا.
  • أحتفظ بالثوم في أكياس نايلون وأفرده علشان يسهل لي استخدامه .
  • بالنسبة للفلفل الأخضر الحار : أغسله كويس ، وألبس جونتي نايلون ، وأقطع عنقه ( ما تخافوش أنا مش عشماوي ) ، وبعدين أقطعه طرنشات ( أترك البذر الأبيض فيه ما أشيلهوش بالعكس ده بيدي طعم كويس في الأكل )
  • أضع الفلفل الأخضر في محضرة الطعام وأفرمه ، بالضبط زي ما عملت في الثوم .
  • أحتفظ بالفلفل الأخضر في أكياس نايلون وأفرده فيها لتسهيل التخزين وتسهيل الاستخدام ( عند الاستخدام أكسر قطعة صغيرة جدا بيدي وما أكترش )
وبالهناء والشفاء ،،،