الجمعة، 30 يوليو 2010

مرق ( صلصة ) لرز السمك

في بعض الأحيان لما نأكل أكلة سمك مقلي فعادة بيقدم بجانبها رز وسلطة طحينة وممكن كمان شوية جرجير ، بس برضه بنشعر إن فيه حاجة ناقصة  وهي المرقة التي توضع فوق الرز عند الأكل ، طيب إيه الحل ؟! الحل إن إحنا نعمل المرقة بجانب السمك المقلي والرز . ماشي ، طيب إيه المرقة اللي تناسب أكلة السمك ؟ الإجابة : المرقة اللي مكوناتها تشبه مكونات مرقة أكلة صيادية السمك . وفي الواقع الطريقة دي جت معايا بالصدفة المحضة ، إزاي ؟
كنت ناوية أعمل صينية صيادية سمك بالفرن ، وعادة بعمل الصيادية بسمك بلطي أو سمكة كبيرة مقطعة جزل ( قطع )  ، لكن المرة دي كان عندي سمك فيليه ، وكنت مجهزة صينية الصيادية وواضعاها على البوتاجاز علشان مرقتها تغلي وبعدين أضع فيها السمك المقلي وأدخلها الفرن على طول - وطريقة تسخين صينية الفرن فوق البوتاجاز بعملها لما أكون عايزه الطبخ يخلص بسرعة - اللي حصل إنه بعد ما قليت السمك وجدت إنه طري فينفع يتاكل مقلي لكنه لا يصلح لوضعه في الفرن وإلا حيتفتت ، طيب أعمل إيه في صينية مرقة الصيادية ؟ قلت لنفسي مافيش مشكلة حأتركها تغلي فترة أطول وسأقدمها  في أطباق بجانب الأكلة ، وفعلا طلعت حلوة قوي وطمعها مختلف عن مرقة الصيادية - لإن لا يوجد بالمرقة سمك - وبكده نكون عملنا طبق جانبي يقدم بجانب الأسماك المقلية .

المقادير :

4 كوب ماء
2 بصلة متوسطة مخرطة
2/1 رأس ثوم مفروم
1 قرن فلفل حار مفروم
1 علبة صلصة طماطم
2 حبة طماطم مقطعة صغير
2 حزمة كزبرة خضراء مخرطة
ملح
فلفل أسود
قليل من زيت ذرة

الطريقة :
  1. في حلة  نضع الزيت وعندما يسخن نضع البصل المخرط ونقلب إلى أن يصفر لون البصل .
  2. نضع الثوم المفروم + قرن الفلفل الحار المفروم ونقلب ثم سريعا نضيف الطماطم المخرطة ونقلب .
  3. نضيف الماء + الملح + الفلفل الأسود + علبة صلصة الطماطم ونترك الماء ليغلي .
  4. بعد غليان الماء نضيف الكزبرة الخضراء المخرطة .
  5. نترك المرقة على النار الهادئة لمدة نصف ساعة حتى تصبح الطماطم طرية جدا وكذلك الكزبرة الخضراء .
  6. تقدم في أطباق متوسطة بجانب طبق الرز وطبق السمك المقلي .
ملاحظات :
  • كمية الماء تقديرية وسيتبخر جزء منها عند الطبخ .
  • عادة الكزبرة الخضراء لا نتركها على النار لفترة طويلة ولكن في هذه المرقة تركتها لفترة هي والطماطم تغلي على النار - حوالي نصف ساعة - فأصبحت طرية وأصبح شكلها في الطبق تقريبا مثل السبانخ وطعمها كان مميز وحلو .  
  • هذه المرقة خفيفة القوام وليست كثيفة .
وبالهناء والشفاء ،،،

السبت، 17 يوليو 2010

باذنجان بالبصل والطماطم

الطبق ده اتقدم لنا كمقبلات لما كنا بنصيف في اسكندرية في مطعم على الكورنيش .. وأذكر يومها اننا أعجبنا بطعمه جدا بالرغم من بساطته .
وشخصيا وجدت أنه ممكن تقديمه  بجانب الأطعمة الأخرى في أي وجبة من الوجبات ، سواء إفطار أو غداء بجانب المشويات أو عشاء ..

المقادير :

1 باذنجان أسود رومي ( الباذنجان الكبير )
1 طماطم تقطع قطعا صغيرة
1 بصلة متوسطة تقطع أهلة رفيعة
ملح
فلفل
1 ملعقة كبيرة خل
1 عصير ليمونة
زيت ذرة للقلي

الطريقة :
  1. تغسل الباذنجانة وتقشر وتقطع مكعبات وتوضع في طبق به ماء من الفلتر لمدة 10 دقائق .
  2. في مقلاة نضع الزيت وعندما يسخن ، نصفي مكعبات الباذنجان من الماء ونضعها في المقلاة ، تقلب بين الحين والآخر ، وعندما تنضج توضع في مصفاة لتصفية الزيت الزائد .
  3. نحضر طبق عميق ، ونضع البصل + الليمون + الخل + الملح + الفلفل وندعك البصل بيدنا .
  4. نضيف الطماطم على البصل ونقلبه معاه بالملعقة .
  5. نضيف مكعبات الباذنجان المقلية ونقلبها .
  6. يوضع في طبق مسطح ويقدم ، يؤكل بالخبز .
وبالهناء والشفاء ،،،

الأربعاء، 7 يوليو 2010

رز السمك

رز السمك هو الرز اللي بيتقدم عادة بجانب الأكلات البحرية ، وبنستخدم فيه الرز الأبيض المصري أو الرز البشاور البسمتي ، وبعد الطبخ بيصبح لون الرز بني نتيجة لإستخدامنا للبصل المقلي في هذه الأكلة

المقادير :

1 كوب رز
2/1 1 كوب ماء
1 ملعقة صغيرة ممسوحة ملح
1 بصلة صغيرة  مخرطة
قليل من زيت الذرة

الطريقة :
  1. في حلة نضع الزيت وعندما يسخن قليلا نضع البصلة ونقلب إلى أن يصبح لونها بني فاتح .
  2. نضيف مقدار الماء إلى البصلة + الملح ونترك الماء إلى أن يغلي .
  3. عند غليان الماء نضيف الرز ونغلق غطاء الحلة ونضعها على نار هادئة ، ونضع تحتها صفيحة ، ويترك الرز إلى أن ينضج .
ملاحظات :
  • بالنسبة لمقدار الماء نستخدم 2/1 1 كوب ماء لكل كوب رز ، ولكن هذا المقدار قابل للتغيير بالزيادة أو النقصان حسب نوع الرز ، فبعض أنواع الرز المصري بنضع لها 4/1 1 كوب ماء لكل كوب رز أما رز صنوايت الحبة المصرية فبياخد 2/1 1 كوب ماء لكل كوب رز ، أما الرز البشاور فبيحب الميه .
  •  طيب نعرف إزاي مقدار الماء المناسب ؟ الإجابة : بالتجربة . فلو اشتريت نوع جديد من الرز لم تستخدميه من قبل مثلا لو كان رز مصري ووضعت له 4/11 كوب ماء شوفي عند الطبخ إذا احتاج شوية ميه ممكن ترشي رشه بسيطة وتغلقي عليه غطاء الحلة ، فحينضج كويس ويبقي بعد كده النوع ده تضعي له بعد كده 2/1 1 كوب ماء . أما إذا وضعت له مقدار 2/1 1 كوب ماء ووجدت عند الطبخ أنه أصبح طري فإرفعي غطاء الحلة واتركي الحلة مكشوفة حتى يتبخر جزء من الماء ، وينضج كويس ويبقى بعد كده النوع ده تضعي له 4/1 1 كوب ماء عند الطبخ .
وبالهناء والشفاء ،،،