الجمعة، 28 يونيو 2013

معكرونة بالسمنة

الوصفة دي من الوصفات السهلة قوي والسريعة لإعداد معكرونة شهية المذاق ، ومن المهم اختيار نوع سمنة ممتاز علشان مذاق المعكرونة دي بيعتمد بشكل أساسي على نوع السمنة ، انا عملتها بسمنة ( البقرة الحلوب ) وفيه انواع ثانية كويسه ممكن تستخدميها حسب النوع اللي انت بتحبيه .

المقادير :

1 كيس معكرونة اسباجيتي
1/2 1 ملعقة كبيرة سمنة 
1 علبة صغيرة صلصة طماطم
ملح - فلفل أسود

الطريقة :

  1. نسلق المعكرونة في ماء مغلي مضاف له 1 ملعقة صغيرة ملح وقليلا من الفلفل الأسود ، ثم تصفى بعد السلق .
  2. عند قرب نضج المعكرونة نسيح السمنة في حلة ( قدر ) ثم نضيف لها صلصة الطماطم ونرش عليها الملح والفلفل الأسود ونقلبها ونضع عليها قليلا من ماء سلق المعكرونة .
  3. نخلط المعكرونة مع الصلصة وتقدم ساخنة .
بالهناء والشفاء ،،،


الأحد، 23 يونيو 2013

شوربة دجاج بالرز

ساعات بنحب نأكل على الغداء أكلة خفيفة على المعدة فممكن نعمل الوصفة دي ، وبالنسبة للمقادير تقريبية حسب اختيارك فممكن تقللي أو تكثري مقدار الرز  ، أما الفراخ فبأقدمها مسلوقة وأكون رشة عليها شوية ملح وفلفل .

المكونات :

1 دجاجة كاملة مقطعة 4 قطع
2 بصلة متوسطة مقشرة ومقطعة بالنصف
ملح - فلفل أسود
حبهان - قرنفل - عود قرفة - ورق لورو
3/4 كوب رز مصري
عصير ليمون

الطريقة :

  • تسلق الدجاجة في ماء مغلي مضاف له البصل + الفلفل الأسود + حبات الحبهان + حبات القرنفل + عود القرفة + ورق اللورو
  • عند نضج الدجاجة تصفى في مصفاة .
  • يغسل الرز عدة مرات بالماء ويصفى .
  • في قدر نضع الشوربة بعد تصفيتها ونضعها على النار وعندما تغلي نضع فيها الرز ونضيف قليلا من الفلفل الأسود مرة أخرى + ملح .
  • وتترك لتغلي حتى نضج الرز تماما .
  • تغرف في أطباق للشوربة ويضبط مقدار الملح والفلفل ، ويضاف في كل طبق عصرة ليمون .
  • يقدم بجانبها الدجاج المسلوق و قطع من الخبز .

وبالهناء والشفاء ،،،

الاثنين، 17 يونيو 2013

صينية دجاج بالبطاطس والبابريكا

المقادير :

1 دجاجة كاملة مقطعة 4 قطع
2 حبة بطاطس كبيرة مقشرة ومقطعة قطع كبيرة
4 حبات بصل مقطعة حلقات
2 حبة طماطم متوسطة مقطعة 
1 ليمون أضاليا ( أصفر ) مقطعة حلقات رفيعة بقشرها
1 ملعقة صغيرة ملح 
1/3 ملعقة صغيرة فلفل أسود ( يفضل المجروش )
1 ملعقة كبيرة بابريكا ( فلفل أحمر حلو )
قليل من أوراق المرامية الجافة
زيت ذرة

الطريقة :

  • في طبق صغير نخلط التوابل : الملح + الفلفل الأسود + البابريكا
  • في صينية فرن نضع حلقات البصل + بضع حلقات من الليمون + بضع حلقات من الطماطم + البطاطس ( ندعكها بقليل من التوابل )
  • ثم ندعك قطع الدجاجة بالتوابل جيدا ونضعها في الصينية ، ونضع باقي قطع الليمون والطماطم بين قطع الدجاج والبطاطس وكمان فوق قطع الدجاج .
  • وننثر أوراق المرامية في الصينية ، ونضع نصف كوب ماء .
  • نضع الزيت حوالي 5 ملاعق كبيرة ونغلف الصينية بشكل جيد بفويل الألمونيوم .
  • ندخلها فرن حرارته 240ْ م لمدة 40 دقيقة وبعدين نشيل الألمونيوم ، سنجد قليلا من الماء في الصينية ، نتركها في الفرن حوالي 20 دقيقة حتى يتبخر الماء وتتحمر الدجاجة .
  • اقتراحات التقديم : يقدم بجانبها طبق رز بشعرية .
ملاحظات :

  1. أوراق المرامية أنقعها في شوية ميه لدقائق قبل وضعها في الصينية ، ليه بأعمل كده ؟ علشان دي صينية فرن لو ما بلتش اوراق المرامية بالماء سأجد ان الاوراق اللي بتكون فوق الدجاجة او فوق حبات البطاطس بتتحرق .
  2. المية التي حأنقع فيها المرامية هي التي حأستخدمها في الصينية .
  3. بالنسبة لكمية الماء المستخدمة ممكن الصينية دي تعمليها بطرق مختلفة وكل مرة يطلع المذاق مختلف ، ازاي الكلام ده ؟ 
    • لو استخدمت 1/2 كوب ماء سأجد انه لما الدجاجة تتحمر وما أقدرش اخليها في الفرن اكثر من كده حتكون البطاطس طرية عند الأكل وقشرتها الخارجية طرية ( البعض بيحب المذاق ده ) .
    • لو استخدمت 1/4 كوب ماء سأجد ان الدجاجة بتتحمر و كمان البطاطس بتتحمر من الخارج وفي نفس الوقت بتكون من الداخل طرية .
    • ممكن حتى ما استخدمش الماء نهائيا لكن أنتبه الي اني أقطع البطاطس قطع مناسبة ( حجمها أصغر ) علشان لما تتحمر من الخارج تكون مستوية من الداخل ، ودي بيكون فيها مذاق البطاطس مقرمش ، وكمان أتأكد اني مغطياها كويس قوي بورق الألمونيوم .

وبالهناء والشفاء ،،،

السبت، 15 يونيو 2013

لحم مشوي بالفرن بتتبيلة القرفة

الوصفة دي اعطيتها لي انسانة عزيزة على قلبي ، وهي وصفة رائعة المذاق ، انا كنت قبل كده بحمر اللحمة في الفرن لكن ما كنتش بحط معاها قرفة ، لكن لما جربتها كانت حكاية ، أولا رائحة الفرن اثناء الشوي شهية ، وبسم الله ما شاء الله اللحمة بتدوب اثناء الأكل ، أما الطعم ... لازم تجربي الوصفة دي بجد .

المقادير :

1 كيلو لحم مقطع قطعا سميكة من سلسلة الظهر أو لحم مقطع ستيك 
4 بصلة متوسطة مقطعة حلقات
حوالي 8 حبات حبهان ( هيل )
حوالي 6 حبات قرنفل  ( مسمار )
2 ورقة لورو
1/2 1 ملعقة صغيرة قرفة ناعمة ( دارسين )
1/2 ملعقة صغيرة بهار
1 ملعقة صغيرة ملح
1/2 ملعقة صغيرة فلفل اسود 
زيت ذرة

الطريقة :

  • في الأول نسخن الفرن .
  • في طبق صغير نخلط التوابل الناعمة : الملح + الفلفل الأسود + البهار + 1 ملعقة صغيرة قرفة ناعمة .
  • بعدين نضع الزيت في مقلاة كبيرة وعندما يسخن نضع قطع اللحم بها ( بدون تتبيل ) ، ونرش جزء من خلطة التوابل على وجه اللحمة وبعد قليل نقلب اللحمة على الجهة الأخرى ونتبلها ، ونحمرها لفترة بسيطة  .
  • نحضر صينية فرن ، ونضع بها البصل المقطع حلقات + الحبهان + القرنفل + ورق اللورو ، ثم نضع اللحمة فوق البصل ، ونضع الزيت اللي حمرنا فيه اللحمة في الصينية + 1/4 كوب ماء .
  • نرش فوق اللحمة 1/2 ملعقة صغيرة قرفة ناعمة ، ونغطي الصينية بورق ألمونيوم بشكل جيد حتى لا تنشف اللحمة ، ثم ندخلها الفرن على الرف الأوسط ، حرارة الفرن 220ْم لمدة ساعة .
  • اقتراحات التقديم : ممكن نقدم بجانبها معكرونة بالزبدة وسلطة خضراء .

ملاحظات :
  1. يفضل ان نختار قطع لحمة يكون بها دهن ، ليه ؟ حتى تكتسب طراوة عند تحميرها بالفرن ( واذا لم يتوفر في الحالة دي ممكن ازيد شوية كمية الزيت مع وضع ربع كوب ماء ) .
  2. لا نحمر اللحمة لمدة طويلة في الزيت ، ليه ؟ حتى لا تنشف المهم ان مسام اللحمة تتقفل علشان تحتفظ بعصارتها أثناء الشوي بالفرن لكن كثر التحمير بينشفها  .
  3. كمان أراعي اني لا اضع كل قطع اللحم معا في المقلاة ، احمر جزء وأشيله في طبق وبعدين اضع باقي القطع وهكذا.. ، ليه ؟ علشان لو وضعت كل اللحمة في المقلاة حألاقيها بتطلع الميه منها ويبقي الزيت مليان سائل فبالطريقة دي اللحمة ستطبخ مش حتتحمر وانا مش عايزه كده .
  4. صينية الفرن لازم يكون حجمها مناسب لللحمة بحيث أضع كل قطع اللحمة متلاصقين بجانب بعض ، وأحاول عدم وضع القطع فوق بعض ، ليه ؟ علشان اللحمة اللي تحت حتنضج صحيح لكن مش حتتحمر .

وبالهناء والشفاء ،،،

الأحد، 9 يونيو 2013

معكرونة بالزبدة


وجدت ان اضافة القليل من الماء الساخن اثناء خلط الزبدة بالمكرونة يعطيها مذاق أشهى  وملمس سلس ، لذلك اثناء سلق المعكرونة سأحتفظ بكوب من ماء السلق المنكه بالفلفل الاسود والملح واستخدمه لاحقا اثناء اضافة الزبدة ، وبالطبع لن استخدم كوب الماء كله لأنه كثير فقط الكمية التي سأحتاجها .
والاعتماد الاساسي في هذه الوصفة على طعم الزبدة ( وليس على مذاق الاعشاب العطرية مثل الاوريغانو كما في وصفات اخرى ) لذلك اكثرت من كمية الزبدة ، كما أنه من المهم اختيار نوعية جيدة من الزبدة ، وتعتمد أيضا على مذاق الفلفل الأسود ، رجاء حاولي تستخدمي الفلفل الاسود المجروش ( الخشن ) بدل الفلفل الاسود الناعم الجاهز ، وتجرشيه اما باستخدام المطحنة اليدوية الخاصة بالفلفل أو دقي شوية في الهون ، بجد حتلاحظي فرق في المذاق .

المقادير :

1 كيس معكرونة اسباجيتي أو أي نوع
40 جرام زبدة
ملح 
فلفل اسود 
حوالي نصف كوب بقدونس مفروم

الطريقة :

  • أسلق المعكرونة في ماء مغلي مضاف له ملعقة صغيرة ملح + قليل من الفلفل الأسود .
  • في قدر على نار متوسطة اضع الزبدة وأثناء ذوبانها اضع ثلث كوب ماء ساخن ( من ماء سلق المكرونة ) + ملح + فلفل أسود .
  • عند نضج المعكرونة اصفيها واضعها بسرعة على الزبدة واخلط ، اتذوقها واضبط كمية الملح ، واذا احتاج الأمر لزيادة القليل من الماء الساخن اضيف .
  • أضيف البقدونس وأقلب ، وتقدم ساخنة .


وبالهناء والشفاء ،،،