المكونات:
حليب - دقيق أبيض - مادة دهنية (سمنة أو زبدة أو زيت ذرة)- بيضة - ( ملح - فلفل أسود )
الطريقة الأولى:
- كنت زمان بعمل البشاميل بالطريقة اللي اتعلمتها واتعودت عليها وهي اللي بحط فيها السمنة مع الدقيق على النار وأقلبه وبعد كده أنزل عليه بالحليب اللي بأكون خالطة معاه بيضة . لكن الطريقة دي لي عليها ملاحظات أولا كانت بتستهلك كمية كبيرة من المادة الدهنية وده مش كويس علشان الصحة وكمان الدقيق ممكن يكلكع فيها وكنا بنتغلب على كده بإن السمنة تكون كثير وننزل بالحليب شوية شوية مع التقليب وممكن حتى نستخدم المضرب الكهربائي للسهولة وكانت بتأخذ وقت وجهد
- دلوقت توجد طريقة ثانية بقيت أستخدمها وهي دي اللي إعتمدتها وبقيت أفضل استخدامها على طول . ليه ؟ أولا: لإنها لا تحتاج إلى كمية كبيرة من المادة الدهنية مثل الطريقة السابقة وحتى ممكن إني لا أضيف فيها المادة الدهنية إذا رغبت في ذلك ولكن طبعا إضافة المادة الدهنية (سمن-زبدة-زيت) محبذ لأنه يعطي مذاق وطراوة للباشميل ، ثانيا: -والنقطة دي مهمة - إن الدقيق ما بيكلكعش زي الطريقة الأولانية كل اللي بيحصل إني لو ما قلبتش الباشميل الدقيق بيثقل وبيمسك ولما أقلبه بالمضرب السلك اليدوي يفك ثاني بدون الكلاكيع وده شيئ أساسي علشان الباشميل يطلع كويس وناعم ، ثالثا: مابتاخذش وقت وجهد كبير زي الطريقة الأولانية .
- طيب دلوقت بعد ما رغيت كثير عن مميزات الطريقة دي تعالوا بقى نشرحها :
- لإعداد الباشميل لازم الأول أكون مجهزة الحليب وكمية الحليب المستخدمة بتختلف حسب حجم صينية الفرن وحأعرف ازاي الكمية المناسبة من الحليب ؟ ده بييجي بالتجربة وبعد كده بتبقي عارفة كل صينية فرن عندك حتعملي لها باشميل قد ايه . عادة لو حأعمل صينية فرن واحدة كبيرة بتحتاج 6 كوب حليب ، كمية الباشميل اللي حأعملها النهاردة حأضعها في 2 صينية فرن سيراميك مقاس 30سم في 21 سم ، علشان كده حأستخدم 9 كوب حليب سائل كامل الدسم أو اذا لم يتوفر الحليب السائل حأستخدم 8 كوب ماء وأذيب فيهم 2 كوب حليب بودرة كامل الدسم
- بعد ما جهزت الحليب 9 كوب حليب حأخلط معاهم 2 بيضة ( لو حأستخدم 6 كوب حليب أخلط معاهم 1 بيضة ) وأضربها مع الحليب بالمضرب السلك اليدوي ومهم جدا ان الحليب يكون بدرجة حرارة الغرفة وما يكونش ساخن نهائيا ليه؟ علشان البيض بيخرب لو خلطته مع الحليب الساخن .
- أتبل الحليب بشوية ملح وفلفل أسود مع التقليب ، ودلوقت أنزل عليه بالدقيق - الحليب بحرارة الغرفة - وبشكل عام كل كوب حليب أضع عليه 1 ملعقة كبيرة دقيق يعنى حأحتاج 9 ملاعق دقيق ولو كنت بتستخدمي الملعقة العادية ما تمليهاش كثير ، وأقلب لحد ما الدقيق يختلط بشكل متجانس مع الحليب
- دلوقت على النار أقلب الدقيق مع الحليب بالمضرب السلك اليدوي ولما يسخن الحليب الدقيق حيتقل ويبقى بشاميل
- بعد ما ألاقي البشاميل بدأ يثقل وأنا بقلبه على النار في الوقت ده أضيف المادة الدهنية وزي ما تحبي سمنة أو زيت شخصيا بأضيف الزيت وقوام الباشميل بيكون ناعم وجميل وكمان أفضل صحيا من السمنة ، أما كمية الزيت فحسب الرغبة بأضيفها بالنظر عموما المفضل عدم الإكثار أضيفي الكمية التي تشوفيها مناسبة وكمان ما تنسيش ان عصاج اللحمة فيه زيت .
- أبهر البشاميل بالملح والفلفل الأسود ويبقى كده البشاميل جاهز للإستخدام.
- فيه ملاحظة إنه لما استخدم البشاميل في الصينية يكون قوامه متوسط وليس ثقيلا لماذا؟ علشان الصينية لما بتدخل الفرن المية اللي في البشاميل بتتبخر والبشاميل بيثقل فيوصل للقوام المطلوب ، لكن لو كان من الأول ثقيل فعلى بال ما الصينية تتحمر حيكون البشاميل ثقل أكثر.
وبالهناء والشفاء ،،،
