ساندويتشات شاورما الروست بيف

الساندويتشات دي لذيذة بشكل ، وطعمها بيكون زي الشاورما بالضبط ، وكمان تحضيرها سريع جدا علشان كده لازم تجهزي وتقطعي البصل والطماطم والروست بيف قبل ما تشتغلي على البوتاجاز

المكونات :
روست بيف مقطع
بصل مقطع أهلة رفيعة
طماطم مقطعة
ملح وفلفل أسود
رشة شطة خفيفة (رقائق بذور الشطة) حسب الرغبة
ملعقة طحينة غير مخففة بالماء
بقدونس مخرط
زبدة

الطريقة :

1. في مقلاة كبيرة أضع الزبدة وأراعي ان النار ما تكونش عالية علشان الزبدة ما تتحرقش ويتغير طعمها وأنا بحط الزبدة على طول أحط الروست بيف وأقلب شوية 
2. بعد كده أضع البصل المقطع وكل ما كانت حلقات البصل متقطعة رفيعة كل ما كان مذاقها أفضل وممكن دلوقت أعلى نار البوتاجاز لإن البصل حينزل ماؤه فالزبدة حتكون اختلطت بيه 
3. وبعدين أحط الطماطم وأقلب وأبهر بالملح والفلفل الأسود
4. بعد ذلك أضع الطحينة الغير مخففة مع التقليب ثم أغلق النار وأضع البقدونس مع التقليب
5. أضع خلطة الروست بيف في ساندويتشات وتقدم وممكن أقدم بجانبها بطاطس محمرة ومخلل بيتى 

ملاحظات :

• ممكن أجيب الخبز وأقطعه بالمقص بحيث يعمل لي 2 ساندويتش مدور وأضع الخلطة وألفها على شكل رول وتقدم
• الروست بيف بيوجد في السوبرماركت عند القسم المخصص لبيع البسطرمة واللانشون والأجبان ، وطبعا لحم الروست بيف ممكن إعداده في المنزل لكن دي طريقة سريعة لاستخدامه.

وبالهناء والشفاء ،،،