معكرونة في الفرن بالنقانق والباشميل

حبيت أعمل الغداء وكنت عايزة أكلة ما تتعبنيش كثير ، وماكانش ليه مزاج خالص إني أطلع لحمة أو فراخ من الثلاجة ، احترت أطبخ إيه ؟ قلت بس مافيش غير المكرونة ، لكن حأعملها لوحدها كده ماينفعش ، أنا عندي كيس صغير سوسج أمريكانا ممكن أحطه معاها ، كويس .. وممكن كمان أحط عليها بشاميل وأدخلها الفرن وأنا عندي أكياس جاهزة خلطة بشاميل ماجي حينفعوني .
وفعلا ما أخدتش مني وقت ولا مجهود كبير ، ومش حأقدر أوصف قد إيه كان مذاق المكرونة الكريمي رائع ، والمهم إنه عجب جميع أفراد الأسرة ...
بجد جربوها لإنها خفيفة ولذيذة بشكل ..

المقادير :

1 كيس معكرونة أي نوع مش شرط تكون مكرونة فرن
1 كيس سوسج ( نقانق أمريكانا ) مقطعة دوائر
1 بصلة متوسطة مخرطة
1 حبة فلفل أخضر رومي متوسطة مخرطة
1 حبة طماطم متوسطة مخرطة
2 فص ثوم مفروم
1 قرن فلفل حار مفروم ( حسب الرغبة )
ملح
فلفل أسود
1/2 1 كيس خلطة ماجي الجاهزة للبشاميل
1/2 1 لتر حليب سائل 
100 جرام جبنة موزاريلا
زيت ذرة

الطريقة :

• تجهيز المعكرونة :
• أسلق المكرونة في ماء ساخن مضاف له قليلا من الملح والفلفل الأسود ، وتصفى من الماء عند النضج .
• تجهيز خلطة النقانق :
• في مقلاة كبيرة أو قدر أحمر البصلة في الزيت ثم أضيف لها الثوم والفلفل الحار وأقلب .
• ثم أضع النقانق وأقلب وبعد ذلك أضع الفلفل الرومي ثم الطماطم ، وأبهر بالملح والفلفل .
• تجهيز الباشميل :
• في قدر أضع لتر ونصف من الحليب السائل البارد وأضع عليه كيس ونصف من خلطة الباشميل الجاهزة وأقلب وأضعه على النار .
• سيكون في الحالة السائلة وعندما يصل الحليب لدرجة الغليان يبدأ يثقل ويبقى بشاميل أقلبه شوية وأغلق النار .
• تجهيز الصينية :
• المعكرونة أضع عليها ملح وفلفل أسود وأقلبها .
• أخلط كل مقدار المعكرونة  مع خلطة النقانق .
• أخلط نصف كمية الباشميل مع المعكرونة والنقانق ، وأضبط مقدار الملح .
• أدهن صينية فرن بمقدار صغير من السمنة ثم أضع المعكرونة المخلوطة بالنقانق .
• وأضع فوقها الكمية المتبقية من الباشميل .
• وعلى الوجه أرش قليلا من جبنة الموزاريلا .
• أضعها على الرف الأوسط لفرن حار حرارته 260ْم ( أسخن الفرن عند بدء العمل ) وأتركها فيه ، إلى أن أرى إن جوانب الصينية بتغلى يبقى في الوقت ده أطفئ الفرن من تحت وأشغل الشواية علشان الوجه يحمر وأخلي بالي إن الخطوة دي لا تأخذ وقتا طويلا .
• لما أخرجها من الفرن أتركها ترتاح قليلا ثم تقدم .

ملاحظات :

• يمكن عدم استخدام أكياس خلطة الباشاميل الجاهز ، ( وطريقة اعداد الباشميل هنا ) .
• إذا كنت سأستخدم في الوصفة مكرونة عادية مش مكرونة فرن ، فأفضل إنه عند سلقها أشيلها من ماء السلق قبل تمام النضج علشان ماتعجنش عند وضعها في الفرن .
• وبالنسبة لكمية الملح التي أضعها عند سلق المكرونة فهي 1 ملعقة صغيرة ممسوحة  وأضعها بعد غليان الماء علشان لو أضفت الملح قبل غليان الماء ، الماء سيأخذ فترة أطول ليصل لدرجة الغليان .

وبالهناء والشفاء ،،،

صينية الكنافة

دي طريقتي الخاصة في عمل صينية الكنافة ، والحمد لله الطريقة دي ناجحة جدا وبيطلع طعمها حكاية .
وبالنسبة للمقادير عاملاها لصينية صغيرة ، ولما أحب أعملها في صينية كبيرة أضاعف المقدار لكل المكونات .
وأحسن حاجة في صينية الكنافة إن مكوناتها قليلة وسهلة الإعداد وفي نفس الوقت الكل بيحبها .

أولا : صينية الكنافة بالمكسرات 

المقادير :

1/2 كيلو كنافة
150 جرام زبدة غير مملحة
1 ملعقة كبيرة سكر خشن
مكسرات حسب الرغبة ( بندق ، عين جمل ، فستق ، زبيب )
1/2 1 كوب شربات ( شيرة ) ( قطر ) معد مسبقا وبارد

الطريقة :

• يفضل استخدام الكنافة الطازجة ودي بتكون متوفرة في شهر رمضان ، وإذا لم توجد أستخدم النوع المجمد وفي هذه الحالة أشيلها من التغليف البلاستيك وأضعها في طبق وأغطيها بفوطة المطبخ ثم أتركها خارج الفريزر مدة 2-3 ساعات   في جو الغرفة .
• بعد ما الكنافة تفك من التجميد أسخن الفرن على حرارة 220ْم .
• في قدر صغير أضع الزبدة وأسيحها بدون غليان ، وده مهم جدا  ( بس مجرد إنها تسيح ) .
• دلوقت حأحط الكنافة في طبق كبير وأفتتها بيدي ، وبعد كده أضع عليها الزبدة السايحة ( حأشيل شوية من الزبدة دي علشان أدهن بيها صينية الفرن لاحقا ) + 1 ملعقة كبيرة سكر ، وأخلطها بيدي .
• بعد كده سآخذ 1/2 كمية الكنافة ( اللي حطيت عليها الزبدة والسكر ) وأضعها في صينية فرن أو في مقلاة كبيرة  ( بدون إضافة دهن ) وأضعها على عين البوتاجاز وأقلبها بالمقصوصة ( ملعقة كبيرة ) لمدة قليلة ، ما تقلقيش إذا وجدا أن كمية الكنافة اللي كان شكلها كثيرأصبحت قليلة .
• حأضع الكنافة اللي قلبتهاعلى النار مع الكنافة اللي كنت سايباها في الطبق وأخلطهم معا بيدي .
• تجهيز صينة الكنافة : 
• في صينية فرن ( صينية صغيرة ) أضع قليلا من الزبدة السايحة ( الشوية اللي  كنت شايلاهم ) وأدهن الصينية بيدي .
• أضع نصف كمية الكنافة أو أكثر قليلا في الصينية وأضغط براحة يدي ضغطا قويا وبعد كده أوزع المكسرات في الصينية وأبعد عن الأطراف ( يعني لا أضع مكسرات في أطراف الصينية ) .
• أضع باقي كمية الكنافة وأضغط جامد براحة يدي ( ولو شوية مكسرات طلعت على الوجه مش مشكلة ) .
• أضعها في فرن حرارته 220ْم على الرف الأوسط لمدة 20 دقيقة تقريبا ، سأجد حول الصينية على الأطراف لون بني فاتح يبقى كده تمام ، أقفل الفرن من تحت وأشعل الشواية من فوق على النار الهادئة ، ومهم جدا اني أتابع الصينية لإنه بسرعة بيحمر الوجه  .
• أطلع الصينية من الفرن وأسقيها بالشربات البارد وأغطيها بغطاء حلة ( قدر ) وأتركها 10 دقائق  لتتشرب الشربات ، و كل ما تركتها أكثر كان أفضل ، ثم تقطع وتقدم  .

• ملاحظات على صينية الكنافة بالمكسرات :
• بالنسبة للمكسرات المستخدمة فعين الجمل ( الجوز ) أفضل تقطيعه بالسكين وليس دقه بالهاون ، أما الفستق فأضعه صحيحا ، والبندق أقطعه بالنصف بالسكين أو أدقه دقا خفيفا بالهاون ، ومش شرط أضع كل المكسرات دي اللي موجود عندي باستخدمه ، وبالنسبة للزبيب أضع كمية قليلة جدا ولا أكثر منه علشان ما تزدادش الصينية حلاوة .
• صينية الكنافة بالمكسرات بتكون حلوة لو تناولناها في نفس اليوم وفي اليوم التالي بيكون طعمها ألذ لإنها بتكون اتشربت كويس قوي بالشربات .
• بالنسبة للشربات عند اعداده بتكون نسبة السكر ضعف نسبة الماء ( يعني لكل 2 كوب سكر ، كوب واحد من الماء ) مع وضع بضع قطرات من عصير الليمون عند بدء الغليان ، يعد ويترك ليبرد ويوضع في بطرمان بالثلاجة ونأخذ منه كوب ونصف لهذه الوصفة .

ثانيا : صينية الكنافة السادة :

• نفس مقادير وطريقة الكنافة المكسرات مع استبعاد المكسرات ، وحتكون كلها طبقة واحدة .

ثالثا : صينية الكنافة بالقشطة  :
يا سلام على صينية الكنافة بالقشطة وخصوصا لما تتشرب القشطة بالشربات ..

• نفس مقادير وطريقة الكنافة بالمكسرات مع استبدال المكسرات بعلبة قشطة ( جيمر ) ( thick cream ) .
• من المهم عند وضع القشطة في الصينية البعد عن أطراف الصينية حتى لا تحرق القشطة .
• أهم ملاحظة لصينية الكنافة بالقشطة أنه من الضروري تناول الكنافة في نفس اليوم حيث يكون مذاقها رائع  ، لكن في اليوم التالي مذاقها سيكون أقل جودة  ، علشان كده اعملي منها كمية قليلة تستهلك سريعا .
• خلي بالك ان القشطة من منتجات الألبان وهي تتأثر بالحرارة فلا يجب تركها في غرفة حارة لمدة طويلة حفاظا على الصحة ، وخصوصا في حالة وجود الأطفال الصغار .

ثالثا : صينية الكنافة بالقشطة والمكسرات .
صينية كنافة وفيها قشطة وكمان مكسرات .. خلاص سلمت .

• بالنسبة للمقادير والطريقة فنفس مقادير وطريقة الكنافة بالمكسرات لكن يضاف على المقادير علبة القشطة ( الجيمر ) ، وبنضع القشطة الأول ونرش فوقها المكسرات ونراعي البعد عن أطراف الصينية .
• نراعي نفس الملاحظات التي تم ذكرها بالنسبة للكنافة بالقشطة .

وبالهناء والشفاء ،،،