طبق المش

المش من الأطباق المعروفة في مصر ، وأنا هنا مش حأتكلم عن طريقة صناعته لأني ما أعرفش أعمله خالص - وإن كنت بأحب أكله قوي - لكن ممكن حد يكون في السوبر ماركت ويلاقى برطمان مكتوب عليه  ( مش ) ويفتكر إن المش بيتاكل كده على طول مع شوية خبز ، وهو لو اتاكل بالطريقة دي يحمى على القلب - يعني بيتعب اللي يأكله { بجد أنا مش عارفه ليه عندنا بيقولوا بيحمى على القلب مع إنه المفروض يقولوا بيحمى على المعدة ..} ، علشان كده لازم طبق المش يتوضب قبل ما نأكله ، طيب حنوضبه إزاي ؟

المكونات :

مش ( الجاهز اللي في البرطمان )

طماطم مقطعة قطعا صغيرة

خيار مقشر ومقطع قطعا صغيرة

قطعة صغيرة من الجبنة البيضاء ( أي نوع متوفر عندك بالثلاجة )

طحينة ( غير مخففة بماء )

زيت ذرة

الطريقة :

• في طبق نخلط المقادير السابقة كلها بالشوكة .
• يؤكل المش بالخبز ، ومن الممكن إذ رغبنا نسلق بيض ونقدمه في طبق منفصل بجانبه .

وبالهناء والشفاء ،،،