الطعمية وطعامتها ودي طريقتي في إعدادها لإن الطعمية المصرية بتتعمل من الفول المدشوش فقط ولا نضع بها الحمص ، لكنني أحب مذاق الحمص مع الفول وكل نعمة من ربنا مذاقها حلو ، وبالنسبة لكمية الفول للحمص التي أفضلها فهي 1:2 يعني كل 2 كوب فول أضع لهم 1 كوب من الحمص . وفي نظري الطعمية من الأكلات المفيدة جدا فهي تحتوى على بقول يعني بروتينات نباتية بالإضافة لكمية كبيرة من الخضرة وكمان ما ننساش البصل والثوم الذي بيقوي نظام المناعة للجسم ، وفوق كدة كمان رائحتها ومذاقها الرااائع الشهي وخصوصا لما تكون ساخنة ولسه طالعة من المقلاة ، وزد على ذلك كمان إنه ممكن الطعمية تتحشي بحشوات مختلفة وأيضا ممكن آخد عجينة الطعمية وأعمل بيها عدة أكلات شهية متنوعة .. لكن دي بقى قصة ثانية ...
مكونات الطعمية:
فول مدشوش وهو فول بدون قشر
حمص حب
كزبرة خضراء-بقدونس-شبت
بصل أحمر مقطع
كرات يمكن استبداله ببصل أخضر
ثوم مقشر
مكونات التتبيلة:
ملح-فلفل أسود-كمون ناعم-كزبرة جافة ناعمة-بيكربونات الصوديوم ويمكن استبدالها ببيضة
للتزيين (اختياري):
سمسم-كزبرة جافة حب تجرش خشن بالملعقة
عند القلية :
ملاحظات:
وبالهناء والشفاء ،،،
مكونات الطعمية:
فول مدشوش وهو فول بدون قشر
حمص حب
كزبرة خضراء-بقدونس-شبت
بصل أحمر مقطع
كرات يمكن استبداله ببصل أخضر
ثوم مقشر
- حآخد الفول والحمص وأنقيهم كويس من أي حصى أو شوائب ، وبعد كده أغسلهم كويس عدة مرات ، وأنقعهم مع بعض في الماء لمدة يوم مع تغيير الماء حألاقي الفول تشرب بالماء ونفش يعني كبر حجمه علشان كده بأنقعه في وعاء كبير والماء يكون كثير وفي أحيان كثير بأسيبهم لمدة يومين علشان لما بغير المية بأتخلص من أي مواد بتكون تعمل غازات في البطن
- أصفي الفول والحمص من الماء وبكده يكونوا جاهزين للإستخدام
- الكزبرة الخضراء والشبت والبقدونس والكرات أغسلهم كويس وأقطع منهم الأعواد السميكة وأضعهم في المصفاة ، ومهم جدا إن الخضرة دي مايكونش فيها مية كثير فلو كان عندي الوعاء البلاستيك اللي فيه شبكة وبنضع فيه الخضرة ونلفها فيه زي حركة الغسالة فتطرد الماء منه وتطلع الخضرة جافة ما أمكن يبقى كويس - ده أنا حتى الفول والحمص بأضعهم في الوعاء ده وآخدهم لفة علشان أنشفهم شوية من المية ، ولو ماعنديش عادي - قبل كده كنا بنعمل الطعمية من غيره - يبقى أنشف الخضرة بكلينكس المطبخ على قد ما أقدر ، وليه بأعمل كده؟ لإن لو الطعمية بها ماء بتفك منى عند القلية
- والخضرة بعد ما نشفتها كويس أخرطها بالسكين أو أقطعها بالمقص وأحرص إنه الوعاء اللي سأضع الخضرة المخرطة فيه بأنشفه بفوطة المطبخ ، والاهتمام بالحاجات البسيطة دي بيخليك تعملي طعمية ممتازة بإذن الله
- بأستخدم مفرمة اللحمة ، في الأول حأفرم الفول والحمص لوحدهم من غير خضرة وبعد كده حأفرم الفول والحمص مع الخضرة والبصل والثوم
- وأراعي عدم إضافة أي توابل نهائيا عند فرم الطعمية
- بعد كده أحفظ جزء من عجينة الطعمية في علبة داخل الثلاجة ودي الطعمية اللي حنستهلكها في مدة أقصاها أسبوع وما أحتفظش بيها أكثر من كده ، وكل ما استهلكتها أسرع كان أحسن .
- وجزء آخر من عجينة الطعمية أحفظه في أكياس بلاستيك بالفريزر كل كيس به كمية مناسبة على قد الوجبة ولما أحب أستخدمه أبقى أطلعه وأسيبه يفك من الثلج براحته على طبق في المطبخ .
مكونات التتبيلة:
ملح-فلفل أسود-كمون ناعم-كزبرة جافة ناعمة-بيكربونات الصوديوم ويمكن استبدالها ببيضة
للتزيين (اختياري):
سمسم-كزبرة جافة حب تجرش خشن بالملعقة
عند القلية :
- أضع عجينة الطعمية في طبق كبير وأضيف لها التوابل وأكسر عليها بيضة وأعجنهم ببعض جيدا
- أشكل العجينة كرات وأبططها براحة يدى - أو أستخدم أداة تشكيل الطعمية - وأزينها من الخارج بخليط من السمسم والكزبرة المجروشة ، وممكن أضع شوية كزبرة جافة وسمسم مع العجينة ومن الخارج بدون تزيين لكن أراعي عدم زيادة الكزبرة الجافة .
- أقليها في الزيت ومهم مراعاة إنه الزيت يكون ساخن جيدا قبل وضع حبات الطعمية فيه ، ليه؟ برضه لانه لو الزيت بارد أو مش ساخن بدرجة كافية حألاقي حبة عجينة الطعمية تفككت وهي بتتقلي ، لكن ما توصليش الزيت إنه يسخن أكثر من اللازم علشان الطعمية ما تتحرقش منك
- نقطة ثانية بالنسبة للزيت ، إنه لازم يكون تحمير غزير ، علشان كده بأستخدم قدر صغير وأضع فيه كمية كبيرة من الزيت .
- بعد تحمير حبات الطعمية أصفيها في مصفاة ثم أضعها على كلينكس المطبخ لتمتص الزيت الزائد .
- أقدمها في طبق أو أعملها ساندويتشات بالسلطة والطحينة ..
ملاحظات:
- أفضل استخدام الكرات لإن البصل الأخضر سيقانه الخضراء فيها ماء لكن الكرات بيكون ناشف واذا استخدمت بصل اخضر استخدم كمية قليلة ، ولو ماعنديش يبقى أكثر من كمية البصل الأحمر ، يعنى ممكن الطعمية تتعمل بدون كرات أو بصل أخضر
- لأفضل النتائج أفضل استخدام مفرمة اللحمة لفرم مكونات الطعمية لإن استخدام الكبة بيخلي الخضرة تطلع ماء كثير
- في أدوات مفرمة اللحمة فيه 3 دوائر واحدة لها عيون كبيرة والثانية لهاعيون متوسطة والثالثة لها عيون صغيرة ، لعمل الطعمية سأستخدم الدائرة اللي لها عيون كبيرة الأول وبعدين أفرمهم ناعم في العيون المتوسطة ، ولا أستخدم الدائرة التي لها عيون صغيرة علشان الخضرة ما تنزلش ماء.
- أفضل استخدام البيضة بدلا من بيكربونات الصوديوم ، ولكن لوعند القلية لقيت الطعمية مكتومة ومحتاجة تنفش في الحالة دي أضيف لها البيكربونات
- لو حصل ولقيت عجينة الطعمية وقت القلية فيها ماء أتصرف إزاي؟ في الحالة دي أضغط على العجينة بيدي وأصفي منها المية على قد ما أقدر وأعجن معاها قطعة صغيرة من الخبز ، الخبز حيشرب الماء وحألاقيها مسكت كويس وما تفكش مني لما آجي أقليها .
وبالهناء والشفاء ،،،
