قطع دجاج محمرة بالفرن بتتبيلة ولا ألذ

سنجد ان الدجاجة في الوصفة دي بتكون من الخارج متحمرة بشكل جيد ، ومن الداخل طرية ولحمها مشبع بمذاق التتبيلة ، وسر طراوتها هو الطماطم لان الطماطم عموما بتخلي الدجاج او اللحمة أطرى ( علشان كده في تتبلة قطع اللحم المشوي على الفحم بأضع شرائح من الطماطم بين قطع اللحم فلما تتشوي اللحمة ماتلاقيهاش بتشد لكن تلاقيها مشوية من بره وطرية من الداخل ) .

المقادير :

1 دجاجة كاملة بالجلد والعظم مقطعة 4 قطع
1 بصلة متوسطة مقطعة 
1 فص ثوم
حوالي ملعقة كبيرة زنجبيل مبشور
1 حبة طماطم متوسطة مقطعة
1 ملعقة صغيرة ملح
فلفل أسود
قليل من الشطة المجففة المجروشة
1 ملعقة كبيرة زعتر بلدي مجفف
زيت ذرة

الطريقة :

1. لتجهيز التتبيلة : 
• في محضرة الطعام أضع البصلة المقطعة + فص الثوم + قطع الزنجبيل ( كميته تقريبا تساوي ملعقة كبيرة ) + حبة الطماطم المقطعة + ملعقة الملح الصغيرة + الفلفل الأسود + الشطة + الزعتر المجفف ، وتفرم في المحضرة .
• أخلط 3 ملاعق كبيرة زيت بالملعقة مع التتبيلة ، لكن لا أشغل محضرة الطعام بعد اضافة الزيت .
2. لتجهيز الدجاجة :
• دلوقت بعد ماخلصت من اعداد التتبيلة أجيب قطع الدجاج وكل قطعة احدث بها شقوق بالسكينة ، وبعد كده آخذ شوية من التتبيلة وادخلها بداخل الشقوق ، وكمان احط منها تحت الجلد علشان الدجاجة تتبل كويس .
• أغطيها بنايلون وادخلها الثلاجة يفضل اعدادها قبلها بيوم .
3. عند الطبخ :
• أسخن الفرن .
• أدهن صينية الفرن بقليل من الزيت ، وأرص قطع الدجاج ، ثم أضع فوقها كل التتبيلة الموجودة في الطبق .
• أضع فوق الدجاج شوية زيت كمان حوالي 4 ملاعق كبيرة ، ثم ادخلها الفرن الساخن على الرف الأوسط بدون تغطيتها بورق الألمونيوم .
• حرارة الفرن 240 ْم ومدة الطبخ 55 دقيقة نضجت فيها الدجاجة واحمر الوجه بشكل ممتاز .

ملاحظة :

    - بالنسبة للزنجبيل الطازج عادة بأجيبه وأقشره وأقطعه قطع صغيرة واحتفظ بيه في كيس نايلون بالفريزر ، واستخدمه في بعض الوصفات ، وكمان بيكون مفيد لما يتشرب مع الشاي .

وبالهناء والشفاء ،،،