كوزي الدجاج

وصفة طيبة المذاق ، إن تناول المعكرونة مع الرز بيعطي مذاق شهي وطيب ..

المقادير :

1 دجاجة كاملة مقطعة 4 قطع
ماء ورد
قليل من الزعفران
زيت ذرة
1 بصلة متوسطة مخرطة
2 فص ثوم مفروم
1 قرن فلفل حار مفروم
1 عود قرفة ( دارسين )
8 حبات قرنفل ( مسمار )
8 حبات حبهان ( هيل )
فلفل أسود
1 ملعقة كبيرة بهارات دجاج
1 حبة طماطم متوسطة
2 ورقة لورو
ملح
4/3 ملعقة كبيرة سمنة ( لتحمير الدجاج )
2/1 1 كوب رز بشاور
4/1 كيس مكرونة اسباجيتي ( قابل للزيادة )



الطريقة :

تجهيز الدجاج :

• في الأول نضع ماء ورد في 2/1 كوب صغير( الكمية تقريبية ) + قليلا من الزعفران ونتركها على جنب حتى يتشرب ماء الورد برائحة الزعفران .

• ثم في قدر نضع الزيت + البصلة المخرطة ولما تتحمر قليلا نضع عود القرفة + 8 حبات قرنفل + 8 حبات حبهان ، ثم الثوم المفروم + قرن الفلفل الحار المفروم .

• نضع الدجاج في القدر ونرشه بالفلفل الأسود من الجهتين ، ثم نضع 1 طماطم متوسطة مقطعة 4 قطع + ورق اللورو + ملعقة كبيرة بهارات دجاج  ، ثم نضع ماء فوق الدجاج لسلقه .

• أثناء سلق الدجاج أشغل الفرن ليسخن .
• وعند الإنتهاء من سلق الدجاج يصفى من الشوربة ويترك ليبرد ، وبعد كده حأضع في راحة يدي قليلا من ماء الورد بالزعفران وأدعك بيه الدجاج قطعة قطعة ، ثم أدعكه بالملح والفلفل ثم أدهنه بالسمن جيدا .

•  ثم أضعه في صينية فرن على الرف الأوسط لفرن حرارته 240ْم حتى يتحمر من الأسفل ، ثم أغلق الفرن من الأسفل وأشعل الشواية العلوية حتى يتحمر وجه الدجاج ( مع ملاحظة إن عملية تحمير الدجاج تكون عند قرب الإنتهاء من نضج الأرز حتى يكون الدجاج ساخن عند التقديم ) .

تجهيز الرز :

• حآخذ 4/1 2 كوب من شوربة الدجاج بعد تصفيتها وأضعها في قدر ، ثم أضع 2/1 1 ملعقة ملح عليها ، وأضيف 1 ملعقة كبيرة زيت ولا أكثر من الزيت لإن الشوربة فيها زيت قلية البصل .
• بعد كده أغسل الرز جيدا عدة مرات ثم أضعه على الشوربة وأغطي على الرز ويترك على نار هادئة وتحته صاجة .

• عند قرب النضج أضع على وجهه باقي ماء الورد بالزعفران وأغطي القدر .

• تجهيز المكرونة :
• باقي شوربة الدجاج حأسلق فيها المعكرونة مع إضافة 1 ملعقة صغيرة ممسوحة ملح لها .
• حبيت أعمل المكرونة بطريقتي فالمكرونة لما تتسلق في شوربة الدجاج حتتشرب بكل التوابل والنكهات علشان كده لما أصفيها بعد النضج سأجد أن لونها أصبح بني فاتح أما مذاقها فرائع .

تجهيز الطبق :

• في طبق التقديم أضع الرز وفوقه أضع المكرونة وحوله أضع قطع الدجاج ، يقدم بجانبه طبق دقوس طماطم ، وأيضا طبق سلطة خضراء .

ملاحظات :

1. إذا كان المتبقي من الشوربة لا يكفي لسلق المكرونة فيمكن زيادة الشوربة بالماء وفي هذه الحالة أضع في الشوربة قليلا من بهارات الدجاج بالإضافة لملعقة الملح الصغيرة ( كمية الملح قابلة للزيادة حسب الرغبة ) .
2. يمكن زيادة كمية الرز المستخدمة حسب رغبتك وفي هذه الحالة كل 1 كوب رز عليهم 2/1 1 كوب شوربة ، أو حسب كمية الشوربة التي انت متعودة تستخدميها حسب نوع الرز ، أما الملح فكل 1 كوب رز عليه 1 ملعقة صغيرة ممسوحة ملح .

وبالهناء والشفاء ،،،

تجهيز الملوخية الخضراء وحفظها

تجهيز الملوخية الخضراء :

• بنجيب الملوخية الخضراء ونقطفها ( يعني نقطع أوراقها ) ولما نقطفها نراعي اننا نقطع الفرع الرفيع المتصل بالورقة - طبعا بقدر الإمكان على قد ما نقدر - وآدي ورق الملوخية بالفرع الرفيع المتصل بها .

• وآدي ورق الملوخية بالشكل اللي المفروض نقطفها بيه .

• بعد ما نقطف كل كمية الملوخية نغسلها كويس عدة مرات بالماء وبعد كده نصفيها .

• وبعدين ننشفها بإننا نفرش فوط مطبخ على صينية كبيرة أو عدة صواني ونضع فوقها الملوخية ( البعض بيضعها فوق ورق الجرائد وده غير صحي علشان الحبر بيضر بالصحة ) ونضعها في مكان متجدد الهواء يعني ممكن نضعها على طربيزة السفرة ونشغل لها المروحة ، لكن أبدا لا نجففها تحت الشمس .

• وبعدين نضع أوراق الملوخية على صينية - عادة بنكون مخصصينها لتخريط الملوخية - ونخرطها بالطريقة المتعارف عليها باستخدام مخرطة الملوخية .
• فيه بقى طريقة ثانية لتخريط الملوخية : وهي باستخدام محضرة الطعام ، والطريقة دي أنا متبعاها بقالي فترة طويلة وريحتني على الآخر وحابة أشاركها معاكم .
• لو أنا حأخرط الملوخية باستخدام محضرة الطعام حأعمل إيه ؟ حأجيب الملوخية وأقطفها وأغسلها بالماء وأضعها في المصفاة ، لكن بعد كده مش حأنشفها ، مباشرة بعد ما أصفيها في المصفاة حأضعها في محضرة الطعام ، ليه ؟ علشان القطاعة  الخاصة بالمحضرة بتحتاج إن الطعام يكون فيه شوية ماء علشان تلف ، وأحرص إني أفرم كميات قليلة من الملوخية في كل مرة .

• وبعدين أطلعهم وأجمعهم في صينية ، وزي ما انتم شايفيين الفرم في الأول بيكون خشن ، أخلص فرم كل الكمية .

• وبعد ما أخلص من فرم كل الكمية خشن ، حآخذ الملوخية مرة ثانية وأضعها بكميات قليلة في المحضرة وأشغلها وكل شوية حأفتح الغطاء وأنزل بالملعقة الملوخية اللي على الجوانب ، وإذا احتاجت انها تزيد شوية ماء أزيدها بالملعقة ، والمرة دي حأفرم الملوخية فرما ناعما .

• طبعا الطريقة دي برضه عايزه شغل لكنها وفرت ليه الوقت باستغنائي عن خطوة تجفيف الملوخية ، وكمان في المجهود (مع إننا لو فكرنا شوية حنلاقي إن تخريط الملوخية بالخراطة اليدوية رياضة ممتازة للذراعين .. ) ، وبالنسبة للطعم في الطبخ فهو ممتاز ما تفرقيهوش عن الملوخية اللي متخرطة بالخراطة ، وطبعا اختاري الطريقة اللي تفضليها .
• حفظ الملوخية الخضراء : تعبأ الملوخية بعد فرمها في أكياس ذات حجم مناسب للوجبة ، وتبطط براحة اليد ونحاول نخرج منها أي هواء زائد بقدر الإمكان ، وتغلق جيدا ، ثم تحفظ بالفريزر لحين الاستخدام.

طريق سهلة لشوي اللحمة في الفرن

المقادير :

1 كيلو لحمة ستيك بسمك 2/1 1 سم أو 2 سم
4 - 5 بصلات متوسطة مقطعة دوائر
ملح
فلفل أسود
1 ملعقة كبيرة بهارات لحمة
حوالي 4 ملاعق كبيرة روزماري طازج مخرط
2/1 كوب ماء
3 ملعقة كبيرة زيت ذرة تقريبا

الطريقة :

- نسخن الفرن قبل بدء العمل .
نفرش البصل على صينية الفرن .
- نحضر قطع اللحمة ونرتبها في الصينية فوق البصل ، وبعد كده واللحمة في الصينية نرشها بالملح والفلفل وبهارات اللحمة ( بتكون بهارات مخلوطة جاهزة تباع في السوبرماركت ) .
- بعد كده نقلب قطع اللحمة على الجهة الأخرى ونتبلها بنفس الطريقة .
- نضع على الوجه الروزماري ، وزيت الذرة .
- نضع 2/1 كوب الماء في الصينية ونغطيها بفويل ألمونيوم بإحكام ( مهم قوي انها تتغطى كويس علشان احنا مش حاطين ماء كثير ) .
- توضع على الرف الأوسط لفرن حار 260ْم لمدة 45 دقيقة وهي مغطاة ، وبعد كده حننزع الغطاء ( خلي بالك من ايدك واستخدمي فوطة لإن الصينية بتكون سخنة قوي )
، ونخليها تتحمر شوية في الفرن حوالي 10-15 دقيقة .
- اقتراحات التقديم : يمكن تقديم مكرونة بجانبها سواء كانت مكرونة بالصلصة أو مكرونة بالكريمة ، كما يمكن تقديم سلطة الزبادي بالبصل ، وكمان تقدري تقطعي شوية خس وتضعيهم في طبق وطماطم طرنشات وخيار مقطع بالطول وجزر مقطع بالطول وتقدميهم ، يعني مش شرط انك تقدمي سلطة خضراء بالطريقة التقليدية مخلوطة كلها مع بعض .

ملاحظات :

- يمكن استخدام شرائح لحمة من سلسلة الظهر بنفس السمك .
- اذا لم يتوفر الروزماري الطازج يمكن استخدام 2 ملعقة كبيرة روزماري مجفف ، أو حتى ممكن استبداله بالزعتر الأخضر .

وبالهناء والشفاء ،،،

سلطة الزبادي بالبصل

المقادير :

1 علبة زبادي ( روب )
ملء 1 ملعقة كبيرة بصل مخرط
ملء 1 ملعقة كبيرة كزبرة خضراء مخرطة صغير
ملء 1 ملعقة كبيرة عصير ليمون
رشة ملح
رشة فلفل أسود
1 ملعقة كبيرة زيت ذرة أو زيت زيتون

الطريقة :

- تخلط كل المكونات السابقة - ماعدا الزيت - وتوضع في الطبق ويوضع فوقها الزيت .
- يمكن تقديم هذه السلطة بجانب اللحوم المشوية على الفحم أو محمرة في الفرن ، وكذلك بجانب الدجاج المحمر في الفرن .

الملاحظات :

- عندي ملاحظة على البصل :  احنا بنستخدم في الطريقة دي البصل العادي مش الأخضر ، وعلشان نخرطه رفيع نقطعه الأول أهلة رفيعة جدا ونرجع نقطعه بالعكس مربعات فتطلع التخريطة رفيعه وده مهم علشان لو كان متخرط كبير مش حيكون حلو خالص في الأكل .
- كمان بالنسبة للزيت يمكن استخدامه أو الاستغناء عنه حسب الرغبة .

وبالهناء والشفاء ،،،

الرز المعمر الخفيف

الرز المعمر من أنواع الرز طيبة المذاق ... والطريقة دي طريقة خفيفة لتناوله .
ورز النهاردة عملاه بمرقة الدجاج ، وعلشان نعمل مرقة الدجاج نسلق الفرخة في ماء مغلي متبل بالبصل والحبهان وعيدان القرفة والقرنفل وورق الغار وكمان الفلفل الأسود ، وبعد كده نصفي المرقة ونستخدمها .

المقادير :

1/2 1 كوب رز
1/4 1 كوب مرقة دجاج
1 كوب كريمة
2 حبة حبهان
1/2 1 ملعقة ممسوحة ملح
رشة فلفل أسود
1 ملعقة كبيرة سمن بلدي

الطريقة :

• قبل ما أعمل الرز لازم أكون خلصت سلق الدجاجة وتكون المرقة عندي جاهزة .
• وكمان يكون الفرن ساخن .
• بعد كده أضع قدر صغير على النار وتحته صاجة ، وأضع به مرقة الدجاج + كوب الكريمة + 2 حبة حبهان + الملح + الفلفل الأسود ( بعمل كده علشان الكريمة بأكون مطلعاها من الثلاجة وبحب أسخنها قبل ما أضعها على الرز وعموما الخطوة دي ما بتاخدش وقت ).

• ولما تسخن المرقة مع الكريمة أغلق النار وأضيف ملعقة السمنة وأخليها تسيح بفعل حرارة المرقة ( أظن إنكم لاحظتم إنني بأفضل عادة الطبخ بزيت الذرة لكن في الوصفة دي لازم السمن البلدي علشان نستطعم مذاقها المميز ) .

• أغسل الرز بالماء جيدا عدة مرات وأصفيه ثم أضعه في طبق الفرن ( بدون نقع ) ، وأضع فوقه خليط مرقة الدجاج بالكريمة .

• أغطيه بورق ألمونيوم ، وأضعه في الفرن على الرف الأوسط بدرجة حرارة 240 ْم حوالي 35 - 40 دقيقة .

• هو المفروض يتعمل كده ، لكن اللي حصل إني بعد ما غطيته بالألمونيوم جيت علشان أدخله الفرن لقيت الفرن مطفي ، حاولت أشغله تاني مش عايز يشتغل خالص ، قلت الحمد لله على كل حال ، طيب أنا حأعمل إيه دلوقت ؟ مفيش غير إني أعمل الرزعلى البوتاجاز من فوق ، بس دي كانت أول مرة أعمل الرز المعمر على عيون الغاز مش في الفرن ، ولعله خير أديني اتعلمت حاجة جديدة وهي إني لو كنت عايزة أعمل الرز المعمر بالطريقة دي ممكن أعمله فوق البوتاجاز .
• المهم الرز طلع رائع ، شوفوا ماشاء الله حباية الرز حلوة  إزاي ومش معجنة وفي نفس الوقت مذاقها كريمي . 

وبالهناء والشفاء ،،،

كشري بعدس أصفر

من الأطباق سريعة الإعداد ..
كل بيت بيعمله بطريقة ، بس هي دي الطريقة اللي بنعمله بيها .


المقادير :

1/2 1 كوب رز
3/4 كوب عدس أصفر
1 بصلة متوسطة مخرطة
2 ملعقة صغيرة ملح
رشة خفيفة فلفل أسود
1/2 ملعقة صغيرة كمون ناعم
قليل من زيت الذرة

الطريقة :

• نضع زيت في قدر وعندما يسخن نضع البصلة ونقلب ، والبصلة تتخرط تخريط صغير ، أنا هنا خرطتها كبير بس علشان كنت مستعجلة لكن إبقي خرطيها أصغر من كده يبقى أفضل .

• وبعدين نكون غاسلين الرز ومصفيينه من الماء - بدون نقع - ونضعه فوق البصلة ونقلب .

• حنقلب الرز شوية إلى أن نشعر أن تقليبه بقى سهل في القدر .

• في هذا الوقت نضيف العدس ونقلب شوية ، ونتبل الرز المخلوط بالعدس برشة خفيفة فلفل أسود + 2 ملعقة صغيرة ممسوحة ملح + 1/2 ملعقة كمون ، وما تكتريش من الكمون المقدار ده كافي ، البعض لا يضعه لكن إضافته بتعطي الأكله المذاق الشهي .

• بعد كده حنضع 3/4 2 كوب ماء ونغطي الحلة ونضعها على نار هادئة وتحتها صاجة .

• عند النضج ستجدي أن البصل تجمع في الأعلى ، نقلبه بخفة مع باقي المكونات ويغرف .

• يقدم بجانبه صلصة الكشري - ده المتبع عادة - لكن دلوقت الحياة الحديثة خلتنا نغير بعض العادات ، فلو كنت فعلا مستعجلة ممكن استخدم الكاتشب أو الصلصة الحارة ؛ أيضا ماننساس نقدم السلطة الخضراء أو حتى الجرجير .

ملاحظات :

1. إذا كنت عايزه تعمليه بكميات أخرى فعادة مقدار الرز بيكون ضعف مقدار العدس يعني لو كنت حتستخدمي 2 كوب رز ضعي معهم 1 كوب عدس ، وهكذا ..
2. أيضا بالنسبة لحساب مقدار الملح :
• فكل كوب رز عليه 1 ملعقة صغيرة ممسوحة ملح ،
•  والعدس بيأخذ كمية ملح أقل من الرز يعني كل كوب عدس حيأخذ أقل من 1 ملعقة صغيرة ممسوحة ملح فممكن تضعي على الكوب حوالي 3/4 ملعقة صغيرة ممسوحة ملح أو أقل بشوية ( في الوصفة دي وضعت على 3/4 كوب عدس 1/2 ملعقة صغيرة ممسوحة ملح ).
3. بالنسبة لمقدار الماء فبأحسبها بالطريقة دي : 
• كل كوب رز عليه 1/2 1 كوب ماء ( أو حسب المقدار اللي انت متعوده عليه مع نوع الرز اللي بتسخدميه ) .
• أما العدس فكل 1 كوب عدس عليه  3/4 كوب ماء وما بأكترش من الماء علشان العدس ما يعجنش مني فأنا بحبه مفلفل زي الرز كده ( في الوصفة دي وضعت على 3/4 كوب كوب عدس مقدار 1/2 كوب ماء يعني خليت الميه أقل من العدس ) .

وبالهناء والشفاء ،،،

مكرونة مع كرات لحم بصلصة الطماطم

طبق خفيف

المقادير :

1 كيس معكرونة اسباجيتي
عدد 16 كرة لحم ماركة أمريكانا أو أي ماركة أخرى
1 بصلة متوسطة مخرطة
2 حبة طماطم متوسطة
1 علبة صلصة طماطم
1-2 فص ثوم مهروس
1 ملعقة صغيرة خل أبيض
ملح
فلفل أسود
2 ملعقة كبيرة ثوم معمر مخرط
زيت ذرة

الطريقة :

1. نسخن الزيت في مقلاة صغيرة ونقلي كرات اللحم وعند النضج ترفع من الزيت .
2. نسلق المكرونة في ماء مغلي مضاف له 1 ملعقة صغيرة ملح خشن أو عادي ثم تصفى .
3. في أثناء سلق المكرونة نحضر مقلاة كبيرة أو قدر ونضع به قليلا من الزيت وعندما يسخن نضع به البصلة المخرطة ونقلب ولما يصبح لونها ذهبي فاتح نضع الثوم ونحرك ( نراعي عدم تغير لون الثوم ).
4. الطماطم نضربها في محضرة الطعام ونضيفها فوق البصلة + صلصة الطماطم ، ونضيف قليلا جدا من الماء .
5. نضع كرات اللحم المقلية في الصلصة ، ونتبلها بالملح والفلفل الأسود ونتركها فوق النار لمدة دقائق فقط ، نضع ملعقة الخل ونغلق النار ( لا نضع الخل في قدور الألمونيوم ) .
6. نغرف المكرونة في أطباق ونضع فوقها كرات اللحم بالصلصة وتزين بالثوم المعمر وتقدم .

وبالهناء والشفاء ،،،