طريق سهلة لشوي اللحمة في الفرن

المقادير :

1 كيلو لحمة ستيك بسمك 2/1 1 سم أو 2 سم
4 - 5 بصلات متوسطة مقطعة دوائر
ملح
فلفل أسود
1 ملعقة كبيرة بهارات لحمة
حوالي 4 ملاعق كبيرة روزماري طازج مخرط
2/1 كوب ماء
3 ملعقة كبيرة زيت ذرة تقريبا

الطريقة :

- نسخن الفرن قبل بدء العمل .
نفرش البصل على صينية الفرن .
- نحضر قطع اللحمة ونرتبها في الصينية فوق البصل ، وبعد كده واللحمة في الصينية نرشها بالملح والفلفل وبهارات اللحمة ( بتكون بهارات مخلوطة جاهزة تباع في السوبرماركت ) .
- بعد كده نقلب قطع اللحمة على الجهة الأخرى ونتبلها بنفس الطريقة .
- نضع على الوجه الروزماري ، وزيت الذرة .
- نضع 2/1 كوب الماء في الصينية ونغطيها بفويل ألمونيوم بإحكام ( مهم قوي انها تتغطى كويس علشان احنا مش حاطين ماء كثير ) .
- توضع على الرف الأوسط لفرن حار 260ْم لمدة 45 دقيقة وهي مغطاة ، وبعد كده حننزع الغطاء ( خلي بالك من ايدك واستخدمي فوطة لإن الصينية بتكون سخنة قوي )
، ونخليها تتحمر شوية في الفرن حوالي 10-15 دقيقة .
- اقتراحات التقديم : يمكن تقديم مكرونة بجانبها سواء كانت مكرونة بالصلصة أو مكرونة بالكريمة ، كما يمكن تقديم سلطة الزبادي بالبصل ، وكمان تقدري تقطعي شوية خس وتضعيهم في طبق وطماطم طرنشات وخيار مقطع بالطول وجزر مقطع بالطول وتقدميهم ، يعني مش شرط انك تقدمي سلطة خضراء بالطريقة التقليدية مخلوطة كلها مع بعض .

ملاحظات :

- يمكن استخدام شرائح لحمة من سلسلة الظهر بنفس السمك .
- اذا لم يتوفر الروزماري الطازج يمكن استخدام 2 ملعقة كبيرة روزماري مجفف ، أو حتى ممكن استبداله بالزعتر الأخضر .

وبالهناء والشفاء ،،،

سلطة الزبادي بالبصل

المقادير :

1 علبة زبادي ( روب )
ملء 1 ملعقة كبيرة بصل مخرط
ملء 1 ملعقة كبيرة كزبرة خضراء مخرطة صغير
ملء 1 ملعقة كبيرة عصير ليمون
رشة ملح
رشة فلفل أسود
1 ملعقة كبيرة زيت ذرة أو زيت زيتون

الطريقة :

- تخلط كل المكونات السابقة - ماعدا الزيت - وتوضع في الطبق ويوضع فوقها الزيت .
- يمكن تقديم هذه السلطة بجانب اللحوم المشوية على الفحم أو محمرة في الفرن ، وكذلك بجانب الدجاج المحمر في الفرن .

الملاحظات :

- عندي ملاحظة على البصل :  احنا بنستخدم في الطريقة دي البصل العادي مش الأخضر ، وعلشان نخرطه رفيع نقطعه الأول أهلة رفيعة جدا ونرجع نقطعه بالعكس مربعات فتطلع التخريطة رفيعه وده مهم علشان لو كان متخرط كبير مش حيكون حلو خالص في الأكل .
- كمان بالنسبة للزيت يمكن استخدامه أو الاستغناء عنه حسب الرغبة .

وبالهناء والشفاء ،،،

الرز المعمر الخفيف

الرز المعمر من أنواع الرز طيبة المذاق ... والطريقة دي طريقة خفيفة لتناوله .
ورز النهاردة عملاه بمرقة الدجاج ، وعلشان نعمل مرقة الدجاج نسلق الفرخة في ماء مغلي متبل بالبصل والحبهان وعيدان القرفة والقرنفل وورق الغار وكمان الفلفل الأسود ، وبعد كده نصفي المرقة ونستخدمها .

المقادير :

1/2 1 كوب رز
1/4 1 كوب مرقة دجاج
1 كوب كريمة
2 حبة حبهان
1/2 1 ملعقة ممسوحة ملح
رشة فلفل أسود
1 ملعقة كبيرة سمن بلدي

الطريقة :

• قبل ما أعمل الرز لازم أكون خلصت سلق الدجاجة وتكون المرقة عندي جاهزة .
• وكمان يكون الفرن ساخن .
• بعد كده أضع قدر صغير على النار وتحته صاجة ، وأضع به مرقة الدجاج + كوب الكريمة + 2 حبة حبهان + الملح + الفلفل الأسود ( بعمل كده علشان الكريمة بأكون مطلعاها من الثلاجة وبحب أسخنها قبل ما أضعها على الرز وعموما الخطوة دي ما بتاخدش وقت ).

• ولما تسخن المرقة مع الكريمة أغلق النار وأضيف ملعقة السمنة وأخليها تسيح بفعل حرارة المرقة ( أظن إنكم لاحظتم إنني بأفضل عادة الطبخ بزيت الذرة لكن في الوصفة دي لازم السمن البلدي علشان نستطعم مذاقها المميز ) .

• أغسل الرز بالماء جيدا عدة مرات وأصفيه ثم أضعه في طبق الفرن ( بدون نقع ) ، وأضع فوقه خليط مرقة الدجاج بالكريمة .

• أغطيه بورق ألمونيوم ، وأضعه في الفرن على الرف الأوسط بدرجة حرارة 240 ْم حوالي 35 - 40 دقيقة .

• هو المفروض يتعمل كده ، لكن اللي حصل إني بعد ما غطيته بالألمونيوم جيت علشان أدخله الفرن لقيت الفرن مطفي ، حاولت أشغله تاني مش عايز يشتغل خالص ، قلت الحمد لله على كل حال ، طيب أنا حأعمل إيه دلوقت ؟ مفيش غير إني أعمل الرزعلى البوتاجاز من فوق ، بس دي كانت أول مرة أعمل الرز المعمر على عيون الغاز مش في الفرن ، ولعله خير أديني اتعلمت حاجة جديدة وهي إني لو كنت عايزة أعمل الرز المعمر بالطريقة دي ممكن أعمله فوق البوتاجاز .
• المهم الرز طلع رائع ، شوفوا ماشاء الله حباية الرز حلوة  إزاي ومش معجنة وفي نفس الوقت مذاقها كريمي . 

وبالهناء والشفاء ،،،

كشري بعدس أصفر

من الأطباق سريعة الإعداد ..
كل بيت بيعمله بطريقة ، بس هي دي الطريقة اللي بنعمله بيها .


المقادير :

1/2 1 كوب رز
3/4 كوب عدس أصفر
1 بصلة متوسطة مخرطة
2 ملعقة صغيرة ملح
رشة خفيفة فلفل أسود
1/2 ملعقة صغيرة كمون ناعم
قليل من زيت الذرة

الطريقة :

• نضع زيت في قدر وعندما يسخن نضع البصلة ونقلب ، والبصلة تتخرط تخريط صغير ، أنا هنا خرطتها كبير بس علشان كنت مستعجلة لكن إبقي خرطيها أصغر من كده يبقى أفضل .

• وبعدين نكون غاسلين الرز ومصفيينه من الماء - بدون نقع - ونضعه فوق البصلة ونقلب .

• حنقلب الرز شوية إلى أن نشعر أن تقليبه بقى سهل في القدر .

• في هذا الوقت نضيف العدس ونقلب شوية ، ونتبل الرز المخلوط بالعدس برشة خفيفة فلفل أسود + 2 ملعقة صغيرة ممسوحة ملح + 1/2 ملعقة كمون ، وما تكتريش من الكمون المقدار ده كافي ، البعض لا يضعه لكن إضافته بتعطي الأكله المذاق الشهي .

• بعد كده حنضع 3/4 2 كوب ماء ونغطي الحلة ونضعها على نار هادئة وتحتها صاجة .

• عند النضج ستجدي أن البصل تجمع في الأعلى ، نقلبه بخفة مع باقي المكونات ويغرف .

• يقدم بجانبه صلصة الكشري - ده المتبع عادة - لكن دلوقت الحياة الحديثة خلتنا نغير بعض العادات ، فلو كنت فعلا مستعجلة ممكن استخدم الكاتشب أو الصلصة الحارة ؛ أيضا ماننساس نقدم السلطة الخضراء أو حتى الجرجير .

ملاحظات :

1. إذا كنت عايزه تعمليه بكميات أخرى فعادة مقدار الرز بيكون ضعف مقدار العدس يعني لو كنت حتستخدمي 2 كوب رز ضعي معهم 1 كوب عدس ، وهكذا ..
2. أيضا بالنسبة لحساب مقدار الملح :
• فكل كوب رز عليه 1 ملعقة صغيرة ممسوحة ملح ،
•  والعدس بيأخذ كمية ملح أقل من الرز يعني كل كوب عدس حيأخذ أقل من 1 ملعقة صغيرة ممسوحة ملح فممكن تضعي على الكوب حوالي 3/4 ملعقة صغيرة ممسوحة ملح أو أقل بشوية ( في الوصفة دي وضعت على 3/4 كوب عدس 1/2 ملعقة صغيرة ممسوحة ملح ).
3. بالنسبة لمقدار الماء فبأحسبها بالطريقة دي : 
• كل كوب رز عليه 1/2 1 كوب ماء ( أو حسب المقدار اللي انت متعوده عليه مع نوع الرز اللي بتسخدميه ) .
• أما العدس فكل 1 كوب عدس عليه  3/4 كوب ماء وما بأكترش من الماء علشان العدس ما يعجنش مني فأنا بحبه مفلفل زي الرز كده ( في الوصفة دي وضعت على 3/4 كوب كوب عدس مقدار 1/2 كوب ماء يعني خليت الميه أقل من العدس ) .

وبالهناء والشفاء ،،،

مكرونة مع كرات لحم بصلصة الطماطم

طبق خفيف

المقادير :

1 كيس معكرونة اسباجيتي
عدد 16 كرة لحم ماركة أمريكانا أو أي ماركة أخرى
1 بصلة متوسطة مخرطة
2 حبة طماطم متوسطة
1 علبة صلصة طماطم
1-2 فص ثوم مهروس
1 ملعقة صغيرة خل أبيض
ملح
فلفل أسود
2 ملعقة كبيرة ثوم معمر مخرط
زيت ذرة

الطريقة :

1. نسخن الزيت في مقلاة صغيرة ونقلي كرات اللحم وعند النضج ترفع من الزيت .
2. نسلق المكرونة في ماء مغلي مضاف له 1 ملعقة صغيرة ملح خشن أو عادي ثم تصفى .
3. في أثناء سلق المكرونة نحضر مقلاة كبيرة أو قدر ونضع به قليلا من الزيت وعندما يسخن نضع به البصلة المخرطة ونقلب ولما يصبح لونها ذهبي فاتح نضع الثوم ونحرك ( نراعي عدم تغير لون الثوم ).
4. الطماطم نضربها في محضرة الطعام ونضيفها فوق البصلة + صلصة الطماطم ، ونضيف قليلا جدا من الماء .
5. نضع كرات اللحم المقلية في الصلصة ، ونتبلها بالملح والفلفل الأسود ونتركها فوق النار لمدة دقائق فقط ، نضع ملعقة الخل ونغلق النار ( لا نضع الخل في قدور الألمونيوم ) .
6. نغرف المكرونة في أطباق ونضع فوقها كرات اللحم بالصلصة وتزين بالثوم المعمر وتقدم .

وبالهناء والشفاء ،،،

طبق رز بخلطة الدجاج

طبق شهي بمكوناته ونكهة بهاراته ...

المقادير :

1 دجاجة
3 بصلة
4 حبات قرنفل
6 حبات حبهان
1 عود قرفة
2 ورق لورو
فلفل أسود
ملح
زيت ذرة
1 قرن فلفل حار ( اذا احتوت بهارات الدجاج على شطة لا نضيف الفلفل الحار )
2 فص ثوم مفروم
1 حبة فلفل رومي مخرطة
1 - 2 جزرة حسب الحجم
1 حبة طماطم متوسطة
2 ملعقة صغيرة بهارات دجاج
ملء قبضة اليد زبيب
2 كوب رز

الطريقة :

• تجهيز الدجاج :
• تسلق الدجاجة في ماء مغلي به 2 بصلة مقطعة بالنصف + 4 حبات قرنفل + 6 حبات حبهان + عود قرفة + 2 ورقة لورو ( ورق غار) + 4/1 ملعقة صغيرة فلفل أسود .
• أثناء سلق الدجاجة نشغل الفرن حتى يسخن .
• عند النضج تصفى مرقة الدجاج من التوابل حيث ستستخدم لاحقا للرز .
• أما الدجاجة فينزع منها العظم وتقطع ، وبالنسبة للجلد فيمكنك استخدامه أو عدم استخدامه حسب رغبتك ، بالنسبة لي استخدمته في هذه الوصفة .
• تجهيز خلطة الدجاج :
• في مقلاة نضع الزيت وعندما يسخن نضع 1 بصلة مخرطة ونحرك وعندما تذبل نضيف الفلفل الحار + الثوم المفروم  .

• نضيف الفلفل الرومي المخرط + الجزر المبشور ونحرك .

•  ثم نضيف الطماطم ونحرك .

• وأخيرا نضيف الدجاج ونحرك + الفلفل الأسود + بهارات الدجاج + الملح ( كمية الملح خاصة بتتبيل الدجاج والخضرة وليس الرز ) ونحرك ، ثم نضيف الزبيب ونحرك .

• تجهيز صينية الرز :
• نغسل الرز عدة مرات بالماء ثم يصفى ونضع عليه كمية الملح اللازمة لتتبيله ، وهي  2 ملعقة صغيرة ممسوحة ملح .

• في صينية الفرن نضع كمية من الرز ونفرشها في الصينية ، ثم نضع فوقها خلطة الدجاج ( ولا نضع كل كمية الزيت التي في الخلطة ، لإن كمية الزيت بالشكل ده حتكون كثيرة على الرز ، أضع فقط الكمية المناسبة للرز وباقي الزيت لا أستخدمه )  ، ثم طبقة أخرى من الرز ثم تسقى بمرقة الدجاج وكمية المرقة هي الكمية اللي انت متعودة انك تضعيها على مقدار الرز حسب نوعه ، وهي هنا 3 كوب مرقة .

• تغطى الصينية بفويل الألمونيوم ( الألمونيوم غير ملامس للرز ) ، وتدخل الفرن على الرف الأوسط درجة الحرارة 240ْم لمدة 40 دقيقة .

• عندما نخرج الصينية ونتأكد من نضج الرز ، أتركيها خارج الفرن مغطاة لمدة 5 دقائق تقريبا قبل الغرف في الأطباق .

ملاحظات :

• عند إعداد خلطة الدجاج ممكن تشيلي شوية على جنب في طبق وتستخدميها بعدين في الساندويتشات  ، مع مراعاة تقطيع الدجاج لقطع صغيرة .

وبالهناء والشفاء ،،،

لحمة بصوص في الفرن مع بطاطس وجزر

وصفة لذيذة بشكل ، وفي نفس الوقت بسيطة ...

المقادير :

3 قطع لحمة بقري ستيك سميكة أو لحمة من سلسلة الظهر تقطع حلقات سميكة ( اللي استخدمتها في الوصفة دي  )
ملح
فلفل أسود
6 فصوص ثوم صحيحة مقشرة
5 حبات بطاطس صغيرة صحيحة أونستخدم 2 حبة كبيرة وتقطع قطعا كبيرة
2 جزرة مقطعة بشكل كبير
4 بصلات صغيرة مقطعة شرائح كبيرة أو 2 بصلة كبيرة
1 حبة طماطم كبيرة مقطعة كبير
3 ملاعق كبيرة روزماري مخرط خشن
3 ملعقة كبيرة دقيق ( طحين ) أبيض
زيت ذرة

الطريقة :

• بالنسبة لللحمة كل قطعة كان بها مقدار من الدهن احتفظت به ولم أزله ولكن أزلت الجلدة التي بتكون فوق الدهن .
• وكل قطعة لحمة حنحدث بها شقان بالسكينة ونحط في كل شق فص ثوم صحيح.

• في مقلاة نضع قليلا من زيت الذرة وعندما يسخن نضع قطع اللحمة مباشرة بدون تتبيل ، وهي في المقلاة حنرش عليها شوية ملح وفلفل أسود .

• لما تتحمر شوية ( تحمير خفيف ) نقلبها للجهة الثانية علشان تتحمر هي كمان ، وبرضه نرش عليها شوية ملح وفلفل أسود .

• في بعض الأحيان نلاقي الثوم ممكن ينط بره اللحمة - زي الثومة الشقية دي - في الحالة دي شيلي الثومة من الزيت علشان لو خليتيها حتتحمر ولو اتحمرت طعمها حيصبح مر ،  وابقي بعدين حطيها في صينية الفرن مع البطاطس .

• لما نخلص من تحمير كل قطع اللحمة نشيلها من المقلاة ونضع في نفس الزيت حبات البطاطس الصحيحة علشان تأخذ تحمير خفيف وتكتسب النكهة .

• نشيل البطاطس ونضع البصلة في نفس الزيت وتأخذ تحميرة خفيفة فقط وأشيلها من الزيت .

• في حلة صغيرة جدا أذيب 3 ملاعق طحين في مقدار كوب من ماء الفلتر وبعد ما يذوب أزيد مقدار الماء في الحلة وأحرك .
• أرجع للمقلاة ( اللي قلينا فيها اللحمة والبطاطس والبصل ) لو لقيت كمية الزيت فيها كثير أقلل منها وأخلي كمية الزيت في المقلاة قليلة . ثم أضع الطحين المذاب على الزيت اللي في هذه المقلاة  وأقلب كويس وبسرعة علشان ما يكلكعش مني ، وأحك أي حاجة ملتصقة في المقلاة علشان تديني الطعم والمذاق الشهي للصوص .

• وأزيد كمان من كمية الماء اللي في الصوص  ، ليه ؟ علشان أنا عايزاه صوص خفيف زي الشوربة ( بدون ما أحدد لك كمية للماء ).

• في صينية الفرن وبدون دهنها بأي زيت أصف اللحمة والبصل والبطاطس والجزر والطماطم وكمان ما أنساش الثومة اللي نطت .

• دي صورة الروزماري وهو من الأعشاب العطرية بيدي طعم ومذاق جميل وخصوصا مع اللحمة ممكن تلاقيه طازج أو مجفف لكن الطازج مذاقه أفضل ، حنأخذ منه الأوراق فقط بدون الساق ونقطعها تقطيع خشن .

• نضع الروزماري على صينية اللحمة .

• الصوص اللي عملناه ممكن نسقي بيه اللحمه على طول أو إذا كنا خايفين يكون فيه كلاكيع خفيفة ممكن نصفيه في مصفاة وبعدين نضعه فوق اللحمة ، شوفوا خفيف إزاي .

• وإذا تبقى صوص أخليه في طبق وأثناء نضج اللحمة ممكن تحتاج زيادة لسوائل فأزيده من الصوص ده ( إذا وجدت اللحمة محتاجة سائل وهي في الفرن وكمية الصوص خلصت زيديها ماء ) .

• أدخلها الفرن بدون تغطية على الرف السفلي المباشر للنار على حرارة عالية 260ْم لمدة ساعة وربع أو لحين النضج - هي بتأخذ وقت علشان اللحمة سميكة وعلشان كده كل حاجة في الصينية بأقطعها كبير وخصوصا البطاطس اللي خليتها صحيحة ، و لما تنضج أراعي إن الصينية يكون فيها كمية جيدة من الصوص لكن لاحظي إنه حيكون أثقل من الأول بسبب تبخر الماء وهو المطلوب .

• تقدم في أطباق وبجانبها رز أبيض وسلطة خضراء ( بصراحة لذيذة قوي والكل عندي حبها ياريت تجربوها ) .

وبالهناء والشفاء ،،،