كفتة التونة

وصفة ممتازة ، وبتكون خيار جيد لمن لا يحب تناول التونة زي ما هي وخصوصا الأطفال ، لكن نراعي عدم اضافة الشطة للوصفة . 

المقادير :
1 علبة تونة
1 حبة بطاطس متوسطة
1 ملعقة كبيرة بقدونس مفروم
1 بصلة متوسطة
2 فص ثوم
ملح
فلفل أسود
كمون
رشة شطة حمراء 
عصير ليمونة بنزهير ( الأخضر ) او 1/2 عصير ليمونة أضاليا ( الأصفر )
بيضة
بقسماط
زيت ذرة للقلي

الطريقة :

• تغسل حبة البطاطس جيدا من الخارج وتفرك بفرشاة الخضروات ، ثم تسلق بقشرها في الماء ، وبعد النضج تقشر وتهرس بالشوكة وتترك لتبرد تماما .
• في محضرة الطعام نخلط البصلة + 2 فص ثوم  + 1/2 ملعقة صغيرة ملح + 1/4 ملعقة صغيرة فلفل اسود + 1/2 ملعقة صغيرة كمون + رشة شطة حمراء + عصير الليمون .
• في وعاء نضع التونة بعد تصفيتها جيدا من الماء والزيت اللي في العلبة ، ونضع فوقها البطاطس ثم خلطة البصل مع اضافة البقدونس المفروم ونعجن بخفة حتى تختلط  المكونات بشكل جيد .
• نحضر طبقين ، طبق نضع به البيض ونتبله بالملح والفلفل ، وطبق نضع به البقسماط .
• نشكل التونه على شكل اصابع ونضعها في البيض ثم البقسماط ثم نضعها في صينية .
• يستحسن وضع صينية التونة في الفريزر لمدة ساعة قبل قليها لانه بيعطي نتائج جيدة في القلية فبتكون التونة متماسكة بشكل جيد وما بتفكش ، وبرضه لو كنت مستعجله ممكن تقليها على طول .
• تقلى في مقلاة صغيرة في زيت شبه غزير وتقلب باحتراس ثم توضع على ورق المطبخ لامتصاص اي زيت زائد ، ثم تقدم .
• اقتراحات التقديم : يمكن تقديمها بجانب المعكرونة أو الرز أو يمكن عملها ساندويتشات .
• التخزين : هذه الكفتة مناسبة جدا للتخزين . فتشكل وتغلف بالبيض والبقسماط ثم توضع في صينية وتدخل الفريزر وبعد ما تجمد نضعها في اكياس نايلون ونحفظها بالفريزر ، وعند القليه تخرج من الفريزر وتوضع مباشرة في الزيت بدون فك التجميد ، ونراعي عدم وضع كمية كبيرة من الكفتة في الزيت مرة واحدة علشان ما يبردش الزيت وتفك الكفتة .

ملاحظات :

• عند سلق البطاطس نراعي اننا نضعها في ماء بدرجة حرارة الغرفة وبعدين نضعها علي النار لإننا لو حطيناها في الماء وهو مغلي حنلاقيها نضجت من الخارج لكن من الداخل لم تنضج . كمان نسلقها بقشرها علشان مش عايزينها تشرب ماء كثير .
• وجدت انه أحلى تونه في المذاق اللي بيكون مكتوب على علبتها ( لحم تونه أبيض ) ، لكن اللي بيكون مكتوب عليها ( لحم تونه خفيف ) أو ( لحم تونه فاتح ) مش قد كده .
• كل ما كانت التونة مصفاة بشكل جيد من الزيت والماء كل ما كان أفضل .
• بالنسبة للرز الذي يقدم بجانب هذه الكفتة فيستحسن عدم تقديم الرز الابيض العادي ، لازم الرز يكون له مذاق يعني ممكن اعمله بشوربة الفراخ او بماء مضاف له مكعب ماجي ( ماجي للخضروات ) مع عود قرفة وفصين حبهان ...
• يمكن مضاعفة الكمية عند الرغبة في اعداد كميات اكبر من الكفتة .

وبالهناء والشفاء ،،،

مكرونة مع خلطة دجاج بالفلفل الاخضر والطماطم

وصفة مذاقها رائع ...

المقادير :
دجاجة
بصل
ملح ، فلفل أسود 
عود قرفة ( دارسين )
قرنفل صحيح ( مسمار )
حبهان صحيح ( هيل )
ورق لورو
كركم
كيس معكرونة اسباجيتي
فلفل رومي
1/2 قرن فلفل حار مخرط او رشة شطة حمراء
2 فص ثوم مقطع طرنشات
طماطم
زيت ذرة

الطريقة :

• اعداد الدجاجة :
• تسلق الدجاجة في ماء مغلي مضاف له 2 بصلة متوسطة مقطعة ارباع + 1/4 ملعقة صغيرة فلفل أسود + 5 حبات حبهان + 5 حبات قرنفل + عود قرفة + 2 ورق لورو + 1 ملعقة صغيرة كركم
• عند نضج الدجاجة تصفى وتترك لتبرد ثم تقطع باليد قطعا متوسطة وتخلى من العظم .
• في مقلاة اضع بها قليل من الزيت ولما يسخن اضع بصلة مخرط واقلبها ولما تبدأ تحمر اضيف 1/2 قرن فلفل حار مخرط + 2 فص ثوم مقطع طرنشات وأقلب .
• ثم اضيف حبة الفلفل الرومي المقطعة مع التقليب .
• اضيف الدجاج المقطع واقلب و أضع فوقه حبة الطماطم المخرطة مع التتبيل بالفلفل الاسود والملح ، ولو حسيت ان الدجاج محتاج لزيادة الزيت ازيد الزيت قليلا .
• اعداد المعكرونة :
• دلوقت الشوربة اللي سلقت فيها الفرخة أصفيها ثم أعيدها على النار وأضيف لها ملعقة ملح ، ولما تصل لمرحلة الغليان أسلق فيها المعكرونة ( اذا كانت كمية الشوربة لا تكفي لسلق المعكرونة أزيدها ماء لكن لا اكثر منه لاني عايزة المعكرونة تتشرب بالتوابل ) .
• تصفى المكرونة عند النضج .
• عند التقديم : 
• نضع المعكرونة وفوقها قطع الدجاج .

ملاحظات :

• الشوربة اللي سلقت فيها المعكرونة لا ترمى فمذاقها شهي وبيكون قوامها ثقيل نوعا ما لان النشا اللي في المعكرونة ذاب فيها ، باعمل فيها ايه ؟ أتبلها بالملح والفلفل الأسود وأصبها في أكواب وأعصر عليها شوية ليمون . وبالهناء والشفاء .

وصفات شهية من بقايا الأطعمة :

• لو كنت عاملة اكلة واتبقى عندي دجاج سواء مسلوق او مقلي ممكن استخدمه ثاني يوم لاعداد هذه الوصفة . ازاي ؟ حيكون عندي شوربة الدجاج احطها على النار وبرضه اضيف لها التوابل ( يعني الفلفل الاسود والحبهان والقرنفل وورق اللورو والكركم لكن من غير اضافة البصلة ) ، طيب ليه بأضيف لها التوابل مرة ثانية مع اني كان ممكن اكتفي باضافة الكركم بس ؟ باعمل كده لتعزيز النكهة .
• لما تغلي  الشوربة حاضع فيها الدجاج سواء كان مسلوق او مقلي واتركه 5 دقائق يغلي مع الشوربة علشان يتشرب بالتوابل وكمان علشان يطرى .
• وبعد كده اكمل الوصفة عادي يعني اصفي الدجاج واقطعه واحمره بالبصل والفلفل والطماطم .
• غير كده ممكن كمان لو كان عندي دجاج متحمر مع البصل والفلفل والطماطم وزاد عندي ممكن أعمله في ساندويتشات بعد دهنها بالمايونيز .

وبالهناء والشفاء ،،،

بطاطس بالكركم وقطع اللحم

وصفة شهية للغداء .

المقادير:
3-2 حبات بطاطس متوسطة متقشرة ومقطعة مكعبات متوسطة
1 بصلة متوسطة مقطعة أهلة 
1 فص ثوم مخرط
1/2 حبة فلفل حار مخرطة او رشة شطة حمراء ( حسب الرغبة )
1 حبة فلفل رومي مقطعة شرائح طولية ( 2 سم تقريبا )
1 حبة طماطم مقطعة بالطول 
قطع لحم بقري ناضجة متسبكة بالبصل ( مسبقة الإعداد )
ملح 
1/4 ملعقة صغيرة فلفل أسود
1/4 ملعقة صغيرة 7 بهارات أو بهار
1/2 ملعقة صغيرة كركم
2 حبة حبهان
قليل من زيت الذرة

الطريقة :

• نضع الزيت في القدر على النار ثم نضيف البصلة المقطعة أهلة ونقلب ، لما يبدأ لونها يتغير نضيف الفلفل الحار المخرط مع فص الثوم ونقلب .
• نضيف البطاطس ونقلب ، بعد ذلك نضيف الفلفل الرومي ثم الطماطم .
• نضع كل التوابل مع التقليب .
• نضيف اللحمة المتسبكة مع بصلتها .
• نضع كمية مناسبة من الماء ونغطي القدر ويترك لينضج .
• اقتراحات التقديم : يمكن ان يقدم بجانب الرز مع الكركم .

ملاحظات :

• يمكن اعداد الوصفة بدون اللحم .
• للتنويع يمكن اضافة جزرة مقطعة شرائح بالطول ( 2 سم ) .

وبالهناء والشفاء ،،،

رز مع الكركم

المقادير :
1/2 1 كوب رز بشاور
2 فص حبهان
1 عود صغير قرفة
ملح
1/4 ملعقة صغيرة فلفل اسود
1/4 ملعقة صغيرة 7 بهارات ( توجد في السوبر ماركت على رف البهارات واذا لم تتوافر تستبدل بالبهار )
1 ملعقة صغيرة كركم
1 مكعب مرقة ماجي قليل الملح ( اختياري )
قليل من زيت الذرة


الطريقة :

• اضع 1/2 2 كوب ماء في حلة ( قدر ) على النار + الحبهان + عود القرفة + الفلفل الاسود + البهارات + الكركم + مكعب الماجي + الملح ويترك الى ان يغلي الماء .
• يغسل الرز عدة مرات بالماء ويصفى ويوضع على الماء المغلي مع اضافة الزيت ، ثم يغطى ويترك على نار هادئة حتى ينضج .

ملاحظات :

• بالنسبة للملح :
• في حالة عدم استخدام مكعب الماجي فكل كوب رز له 1 ملعقة صغيرة ممسوحة ملح .
• في حالة استخدام مكعب ماجي ( ملح قليل ) فكل 1/2 1 كوب رز له 1 ملعقة صغيرة ممسوحة ملح .
• في حالة استخدام مكعب ماجي ( به ملح ) فكل 1/2 1 كوب رز له 1/2 ملعقة صغيرة ممسوحة ملح .
• وعموما كمية الملح تخضع للمذاق الشخصي .
• يمكن اعداد هذه الوصفة بشوربة الدجاج بدلا من الماء ، وفي هذه الحالة لا نستخدم مكعب الماجي .
• بالنسبة للماء :
• عادة نستخدم كمية الماء حسب نوع الرز فيه انواع بتحب تشرب الميه فنزيد المقدار .
• بشكل عام اضع كمية الماء اللي متعودة احطها مع زيادة ربع كوب علشان الميه لما بتغلي حيتبخر جزء منها .

وبالهناء والشفاء ،،،

الفطير المشلتت المصري

المقادير 
1 كيلو ( 1000 جرام ) دقيق أبيض 
1/4 1 ملعقة صغيرة ملح
1/2 2 كوب ماء دافئ ( تقريبا ممكن يزيد قليلا عند الحاجة )
زيت ذرة 
سمن بلدي

الطريقة :

• في العجان يعجن الدقيق ( المنخول ) + الملح ويضاف عليه الماء تدريجيا لحد ما ألاقيها ما تمسكش في جوانب الوعاء وملفوفة على اداة العجن يبقى كده كمية الماء كويسه ولا ازيد الماء ، لكن مش أقل من كوبايتين ونصف ماء ، وبعد العجن أحس لما أمسكها انها عجينة ناعمة قطنية لكن مش ناشفة ولا طرية جدا .
• تقطع العجينة 5 قطع ، وتكور وتوضع في صينية مدهونة زيت ( عدة ملاعق زيت مش بس مسحة زيت ) وكل كورة امسحها بيدي بالزيت ، تغطى بالنايلون وتترك لترتاح ، وجدت كل ما تركتها ترتاح اكثر كل ما كانت في الفرد اسهل وتتمط بسهولة من غير ما تتقطع ، يعني لو سبتها 3 الى 4 ساعات حيكون ممتاز .
• في قدر صغير اضع كمية جيدة من الزيت ومعاها عدة ملاعق من السمنة وكمية الزيت اكثر بكثير من السمنة ، وعلى اصغر عين في البوتاجاز اسخنها قليلا واغلق النار حتى قبل ما تسيح السمنة وبالملعقة اخلط السمنة مع الزيت جيدا واتركها لتبرد تماما ، وهذه الخلطة اللي ساستخدمها بين راقات الفطير .
• اشغل الفرن على 180ْم ، واستخدم تاوة توضع في الفرن على الرف السفلي المباشر للنار ، والتاوة دي بتكون دائرية مقعرة مصنوعة من حديد الزهر لونها اسود ميزتها انها بتسخن كويس قوي وبتبقى حرارتها عالية .
• يكون عندي طاولة كبيرة انظفها كويس قوي بالماء والصابون ، وادهنها زيت واضع عليها كرة من العجين ( باقي العجين مغطى بالنايلون كويس ) ، ابططها شوية وافردها بالنشابة لتصبح على شكل دائرة ، وبعدين امسك طرف العجينة بحيث يد من تحت الدائرة والاخرى فوقها وارفعها من على الطاولة واحدفها أكني بأرمي شبكة صيد سمك بس بالراحة علشان العجينة ما تتقطعش ، حألاقي العجينة تتمط معايا ،أمسكها من ناحية ثانية بنفس الطريقة وأكرر ده عدة مرات ، ثم اضعها على الطاولة حيبقى عندي دائرة كبيرة لكن اطرافها ما زالت سميكة ، آجي عند الأطراف وأضع يدى تحتها وأرفعها من على الطاولة قليلا وأهزها لاعلى واسفل أكني بأنفض ملاية سرير حألاقيها تتمط معايا بسهولة ، لكن أكون حذرة انها ما تتقطعش .
• أضع كف يدي في الطبق الذي به خليط الزيت والسمن وادهن الدائرة الكبيرة جيدا ، ثم أثني طرفين من الدائرة حيكون عندي شكل مستطيل وله طرفين دائريين ، أدهنه بخليط الزيت ، ثم في النصف أضع الحشوة اللي عايزاها في الشكل المستطيل لكن ابعد عن اطرافه ولا أكثر من الحشوة ، ثم أثني ( أطبق ) الطرفين الدائريين ، حيكون عندي شكل مستطيل مطبق ، مهم قوي اني عند الأطراف للمستطيل أضغط جيدا بأصابع يدي علشان تتقفل كويس وما تطلعش منها الحشوة ، وبرضه ادهنه بخليط الزيت .
• افتح الفرن اللي مسخنة فيه التاوة واضع شوية زيت على التاوة ، وأمسك الفطيرة بيدي وأقلبها على التاوة بحيث يكون الجانب اللي فيه تطبيقة المستطيل من تحت علشان يتقفل من حرارة الفرن وبعد شوية بسيطة أقلبه على الناحية الثانية علشان عجين الفطيرة يمسك، وخلاص بعد كده ممكن أستنى عليه فترة أطول قبل ما أقلبه .
• أثناء نضج الفطيرة في الفرن ، أكون باشتغل في الفطيرة الثانية أفردها واضع الحشوة على بال ما الفطيرة الأولانية تخلص .
• بعد نضج الفطيرة أطلعها من الفرن ثم اقطعها ، والأسهل اني اقصها بمقص المطبخ وتقدم وبألف هناء وشفاء .

ملاحظاتي على الفطير المشلتت :

• لا نستخدم خميرة للفطير المشلتت .
• يكون عندي طبقين طبق به زيت فقط للدهن على طاولة الفرد وطبق به خليط الزيت والسمن للدهن بين طبقات الفطير المشلتت ، لانه لو وضعت خلطة الزيت والسمن على سطح الطاولة سأجد انه الفطيرة تلصق قليلا على الطاولة ومش خفيفة في الحركة معايا زي الزيت .
• اذا زادت كمية من خليط الزيت والسمنة ممكن اغطيها واحتفظ بيها في المطبخ لاستخدامها عند اعداد الاطعمة .
• الفطيرة لا ارققها كثيرا يعني ما اعملش منها دائرة كبيرة قوي ، لاني وجدت لو رققتها كثير بتكون راقاتها خفيفة ومقرمشة كثير ، وده طبعا حسب الرغبة .
• كيلو الدقيق 1000 جرام بيعمل 5 فطاير يعني الفطيرة 200 جرام ( حجم الفطيرة وعدد الفطائر حسب الرغبة برضه ) .
• كل 200 جرام دقيق عليهم 1/4 ملعقة صغيرة ملح ( ملعقة عيارية ) .
• بالنسبة للماء كل 200 جرام دقيق عليهم 1/2 كوب ماء تقريبا (125 مل ) .
• انا بأحسبها لانه ممكن في بعض الاحيان اكون عايزه اعمل 8 فطائر مثلا فأعرف اد ايه دقيق وملح وماء احتاج .
• الفطير ما يحتاجش اني اسخن الفرن اكثر من 180ْم .
• بالنسبة لعصاج اللحمة المفرومة لازم يبرد تماما ( مهم ) قبل حشوه في الفطير .
• أراعي اني أكون مجهزة كل الحشوات في اطباق قبل فرد العجينة لانه عند فرد الفطير حاكون مشغولة بالعجينة ووضع الحشوة واني اقلب الفطيرة اللي في الفرن. 

حشوات الفطير المشلتت :

الفطير المشلتت ممكن يتحشي بأي حشوة وممكن نعمل له حشوة مالحة او حشوة حلوة وكله حسب الرغبة .

• حشوة اللحمة المفرومة : 
• عصاج لحم مطبوخ بدون صلصة + قليل من الفلفل الأخضر
• حشوة المرتديلا مع جبن كرافت :
• جبن شيدر مقطع الى مكعبات صغيرة + جبن كرافت ( او اي نوع ) يوزع بالملعقة على الفطيرة ( لا نكثر منه لانه فيه جبن شيدر حيسيح مع سخونة الفرن ) + فلفل رومي مقطع صغير كمية قليلة + مرتديلا ( أي نوع ) مقطعة .
• حشوة جبنة كبايات مع الجبنة الرومي  :
• زيتون اسود مقطع بدون نوى + زيتون أخضر مقطع بدون نوى + جبنة كبايات ( كرافت او المراعي او اي نوع لا تزيد عن 2 ملعقة كبيرة ) ، قليل من الفلفل الرومي المخرط ، الجبن الرومي نكسرها باليد ( لا نطحنها ) ونوزعها على الفطيرة .
• حشوة البسطرمة :
• في طبق نخفق بيضة ونضع عليها البسطرمة المقطعة + فلفل رومي مخرط + قليل من الزيتون الأسود المقطع بدون نوى ، ثم يوضع الخليط على عجينة الفطير .
• الحشوة الحلوة :
• ادهن الفطيرة بقليل من جبن المراعي ( الجبنة القشدية ) او اي نوع ملح قليل الجبنة حتخلي الفطيرة طرية من الداخل ، واكون محضرة في طبق خلطة من جوز هند + زبيب أكثر منه + عين جمل ( جوز ) مقطع صغير + 2 ملعقة كبيرة سكر بودرة + رشة خفيفة قرفة ناعمة . بعد لما احط الخلطة دي على الفطيرة ممكن ارش رشة عسل نحل فوق خلطة الحشو ،  وفي الحالة دي بعد نضج الفطيرة حيكون طعم السكر كويس ولن تحتاج لسكر اضافي ، وممكن اني استغني عن العسل ، لكن في الحالة دي بعد نضج الفطيرة عند التقديم لازم يترش الوجه بالسكر البودرة والطريقتين حلوين ، لذييييذة بحبها .

وبالهناء والشفاء ،،،

كيكة الجوز مع صوص الشيكولاته بالكريمة

كيكة حلوة سهلة الاعداد ولذيذة المذاق ، بالنسبة للمقادير فالاكواب والملاعق عيارية .

المقادير :

3 كوب دقيق أبيض
2 كوب سكر 
1 كوب ( 200 جرام ) زبدة لينة بحرارة الغرفة
4 بيضات 
1 كوب حليب سائل
2 ملعقة صغيرة فانيليا سائلة
2 ملعقة صغيرة بيكنج باودر 
1 ملعقة صغيرة بيكربونات الصودا
1/8 ملعقة صغيرة ملح
1 ملعقة كبيرة قرفة ناعمة
1 ملعقة كبيرة كاكاو بودرة
1/4 كوب جوز ( عين جمل )

للصوص :
3 حبات شيكولاته جالاكسي
2 علبة كريمة للخفق ( العلبة الواحدة 1/4 ليتر- 250 مل )
2 ملعقة صغيرة سكر بودرة


الطريقة :

• الأول أجهز الجوز ، والجوز لا يدق بالهون ، لكن أقطعه بالسكين الى قطع صغيرة وبعدين ادخله الفرن على حرارة 180 درجة لمدة دقائق فقط وما أسيبهوش كثير في الفرن لان طعمه بيتغير ، ومهم قوي ان الجوز لما اضعه في عجينة الكيك يكون بارد تماما علشان كده من المفضل اعداده قبلها بفترة كافية ، وممكن احمص شوية جوز قبلها بيوم واحتفظ بيه في طبق متغطى في المطبخ لحين اعداد الكيكة .
• عند بدء العمل في الكيكة اشغل الفرن علشان يسخن .
• حاستخدم وعائين الوعاء الاول اضع فيه الزبدة + السكر وأضربهم بمضرب البيض الكهربائي لحد ما يختلطوا جيدا ثم اضيف البيض والفانيليا مع الضرب بالمضرب .
• والوعاء الثاني حأضع فوقه منخل واضع فيه الدقيق والبيكنج باودر والبيكربونات الصودا والكاكاو البودرة والقرفة الناعمة وانخلهم معا ، ثم اضع في الوعاء الملح وحوالي ثلث كمية الجوز واقلب بخفة بالملعقة ليختلطوا .
• أضع الدقيق بالتبادل مع الحليب على خليط الزبدة والسكر مع التقليب .
• اضع خليط الكيك في صينية فرن مدهونة زبدة ومبطنة بالدقيق ، واخبزها على الرف الاوسط لفرن حرارته 180ْم ( بالنسبة لفرني 200ْم ) .
• تاخد من 45 - 55 دقيقة ، ولازم اخد بالي ان وجه الكيكة دي لا يتغير لونه ، علشان كده اختبر نضج الكيكة عن طريق ادخال طرف سكين رفيع فيها ، اذا خرج بعجين يعني الكيكة لم تنضج بعد واذا خرج بدون عجين معناها ان الكيكة استوت فأغلق نار الفرن .
• اخرج الكيكة من الفرن واتركها لتبرد ، وبعدين اقلبها على شبك سلك .
• اعداد الصوص : 
• اثناء اعداد الكيكة يتم اعداد الصوص ، في حلة صغيرة جدا اضع 1/2 علبة الكريمة ( يعني 1/2 كوب ، 125 مل ) ، على أصغر عين في البوتاجاز وكمان تكون النار هادئة جدا ، وأقلب بالملعقة الى ان تصبح الكريمة سائلة ، أكسرالشيكولاته الجالاكسي بيدي واضعها فوق الكريمة مع التقليب الى ان تصبح سائلة ومتجانسة واغلق النار وابعدها عن النار لتبرد تماما .
• في وعاء اخرج باقي كمية الكريمة ( 1/2 1 علبة يعني 1/2 1 كوب ، 375 مل ) من الثلاجة لانها لازم تكون باردة وأضع عليها السكر البودرة واضربها بالمضرب الكهربائي ، حتى تتماسك ثم ادخلها الثلاجة مرة اخرى .
• بعد ما تبرد الكيكة تماما ويبرد الصوص ، أدهن الكيكة بالكريمة البيضاء ودي حتشكل الطبقة اللي الصوص حيمسك فيها ، بعد كده اضع صوص الشيكولاته فوق الكيكة وبالشوكة اعمل خطوط وأنزل بالشيكولاته على الجوانب وبرضه اعمل خطوط .
• أزين الوجه بباقي الجوز المحمص ، وتقدم .

وبالهناء والشفاء ،،،

رز بالفول الحيراتي والشبت

عندما يتوافر الفول الحيراتي الأخضر في السوق ممكن نستخدمه في العديد من الوصفات زي وصفة النهاردة كده . 

المقادير :

1/2 1 كوب رز 
ملء 3/4 كوب حبات فول حيراتي أخضر بدون القشرة
حزمة صغيرة شبت
3/4 1 ملعقة صغيرة ممسوحة ملح
1/2 2 كوب مرقة دجاج أو ماء
قليل من زيت الذرة 

الطريقة :

1. نغسل الفول الحيراتي الأخضر جيدا بالماء ونصفيه وبعدين نقشره ونأخذ منه حبات الفول الأخضر .
2. نضع قليلا من الزيت في قدر وبعد ذلك نضع الفول الحيراتي في الزيت ونقلب وعلى طول نضع الرز المغسول والمصفى ( بدون نقع ) ونقلب قليلا وبعدين نضع الملح ثم الشبت المخرط .
3. نضع شوربة الدجاج ( تكون ساخنة ) أو الماء ونغطي القدر ونضعه على نار هادئة حتى ينضج ثم يقدم .

ملاحظات :

• بالنسبة للمقادير كل كوب رز عليه 1/2 1 كوب ماء أو شوربة دجاج ، وكمان بنضع 1/4 كوب ماء زيادة علشان نضج الفول .
• أما الملح فلكل كوب رز 1 ملعقة صغيرة ممسوحة ملح ، ونزيد 1/4 ملعقة صغيرة للفول .

وبالهناء والشفاء ،،،

سمك مع رز صيادية

المقادير :

1 كيلو سمك فيليه

ملح ، فلفل أسود

رشة شطة حمراء بودرة

1 ملعقة صغيرة كمون ناعم

1 ملعقة صغيرة كركم

1 ملعقة صغيرة كزبرة مطحونة ناعمة

1/4 ملعقة صغيرة صفار زعفران

1 رأس ثوم مفروم

عصير 1 ليمونة أضاليا ( الأصفر ) أو 2 ليمون بنزهير ( الأخضر )

2 كوب رز بسمتي

1 بصلة متوسطة

زيت ذرة 

الطريقة :

• إعداد السمك:
• يقطع السمك الى قطع متوسطة الحجم ثم يتبل السمك بالليمون + الثوم + الملح + الفلفل الأسود + الشطة + الكمون + الكزبرة + الكركم + صفار الزعفران ويغطى بالنايلون ويدخل الثلاجة حتى يتشرب بالتتبيلة (كل ما تركته في التتبيلة مدة أطول كان أفضل لكن على الأقل مدة ساعة ).
• عند وقت القلي : نضع قطع السمك المتبلة في دقيق مخلوط بالملح والفلفل الأسود ثم تقلى في الزيت 1/2 قلية ( يعنى غير كاملة النضج ) ثم ترفع من الزيت وتوضع في طبق .
• إعداد الرز:
• في حلة ( قدر ) نضع قليلا من الزيت اللي سبق وحمرنا فيه السمك ( الزيت حيكون لونه برتقالي علشان ده لون صفار الزعفران ) ونضع فيه البصلة المخرطة ونقلب الى أن تتحمر البصلة بشكل جيد ( في الوصفة دي لازم البصلة تتحمر ويكون لونها غامق لكن مش محروق ) .
• بعد كده نضع 3 كوب ماء فوق البصلة + 1/4 2 ملعقة صغيرة ممسوحة ملح وتترك لتغلي .
• بعد أن يغلي الماء بشكل جيد نضيف الرز المغسول والمصفى .
• بعد كده نصف قطع السمك فوق الرز ونغطي الحلة وتوضع على نار هادئة وتحتها صاجة وتترك حتى ينضج الرز والسمك ثم تقدم .

ملاحظات :

• من عوامل نجاح الرز في هذه الوصفة انه لازم يغلي بشكل جيد ، يعني مش تلاقي الماء سخن تقومي حاطة الرز ، لأ لازم الميه تغلي كويس وبعدين تضيفي عليها الرز .
• بالنسبة للمقادير لو عايزة تغيري في الكمية فكل 1 كوب رز عليه 1/2 1 كوب ماء ( أو حسب كمية الماء اللي انت متعوده تضيفيها عادة على الرز ) ، وبالنسبة للملح فكل 1 كوب رز عليه 1 ملعقة صغيرة ممسوحة ملح ، ووجدت اني لما اضع السمك مع الرز في نفس الحلة فالرز بيحتاج ازيد مقدار الملح قليلا علشان كده زدت 1/4 ملعقة صغيرة ملح .
• للتنويع : ممكن تقدمي الوصفة دي بطريقة مختلفة ، فممكن تقلي السمك تمام النضج وتعملي الرز بنفس الطريقة لكن لوحده بدون ما تضعي السمك معاه في الحلة ، ويبقى كده أكنك عملت وصفة جديدة .

وبالهناء والشفاء ،،،

كبسة رز بالقرفة وصلصة الطماطم

وصفة رااائعة المذاق للرز مع اللحم .

المقادير :
1 كيلو لحم غنم بالعظم
2 كوب رز بسمتي 
ملح ، فلفل أسود
2 ملعقة صغيرة قرفة ناعمة
حبهان صحيح ، قرنفل صحيح ، ورق لورو ( ورق غار )
بصل
2 فص ثوم مفروم
2 ملعقة كبيرة صلصة طماطم
للتزيين مكسرات ( لوز ، زبيب )
زيت ذرة

الطريقة :

• اعداد اللحم : 
• نسلق اللحم في ماء مضاف له 2 بصلة كبيرة مقطعة بالنصف + فلفل أسود ناعم + فصوص الحبهان + حبات القرنفل الصحيح + ورق الغار + 2 ملعقة صغيرة قرفة ناعمة ( بحب استخدم الحلة البرستو لانها بتسلق اللحمة بسرعة لكن ممكن تتسلق اللحمة في الحلة العادية بس حتاخد وقت اكثر ) .
• اعداد الرز :
• نضع قليلا من الزيت في الحلة ونحمر فيها بصلة صغيرة مخرطة وأول ما تبدأ البصلة تغير لونها نضيف لها 2 فص ثوم مفروم ونقلب .
• وسريعا ( لاني مش عايزة الثوم يتحمر علشان ما يبقاش طعمه مر ) نضيف 2 ملعقة كبيرة صلصة الطماطم وأقلبها في الزيت .
• نضيف 3 كوب من مرقة اللحم ( بعد تصفيتها ) + 2 ملعقة ممسوحة ملح وتترك المرقة لتغلي.
• نغسل الرز بالماء جيدا ونصفيه - بدون نقع - ونضيفه على المرقة ونغطي الحلة ونتركها على نار هادئة حتى تنضج .
• الزينة :
• في مقلاة صغيرة نضع قليلا من الزيت ونحمر فيه اللوز ( او اي مكسرات اخرى ) ثم نضع عليه الزبيب ونقلب ثم نغلق النار .
• اعداد الطبق للتقديم :
• نضع الرز في طبق كبير وفوقه المكسرات والزبيب واللحم .

ملاحظات :

• بالنسبة للبصلة التي توضع مع الرز الافضل عدم تخريطها بالسكين واستخدام محضرة الطعام لتخريطها تخريطا صغيرا ، لماذا ؟ لانك لو خرطيتها بالسكين وانت بتاكلي الرز حتشوفي البصل ، لكن لما تستخدمي محضرة الطعام لما تأكلي الرز مش حتشوفي البصل لكن حتشعري بمذاقه الممزوج بالثوم والصلصة وحتقولي الله الرز ده طعمه جميل هو معمول ازاي .
• وكمان بالنسبة لللحمة ممكن بعد ما الرز يشرب ماؤه اللي على الوجه وقبل ما يكتمل نضجه اضع اللحمة الناضجة في الحلة على وجه الرز واغطي الحلة واترك الرز ليكمل نضجه ، وممكن كمان اني لا اضع اللحمة فوق الرز في الحلة وأسيبها في الشوربة ( بعد تصفيتها ) ولما آجي أقدمها أسخن الشوربة فتسخن اللحمة بشكل جيد ، واللحمة في الوصفة دي بأقدمها مسلوقة مش محمرة وبيكون لونها غامق وشهي لانها متشربة بنكهة القرفة والتوابل .
• لو رغبت في عمل مقادير أخرى من الرز : فكل 1 كوب رز له 1/2 1 كوب مرقة لحم و1 ملعقة صغيرة ممسوحة ملح و1 ملعقة كبيرة صلصة طماطم و1 فص ثوم وبالنسبة للبصل ممكن استخدم بصلة أكبر .

وبالهناء والشفاء ،،،

حليب بالقرفة

مشروب ساخن لذيذ المذاق خصوصا في أيام الشتاء الباردة .

المكونات :
حليب سائل ( لكل شخص مقدار ملء كوب من الحليب ، يعني ربع لتر حليب)
سكر ( المقدار حسب الرغبة )
قرفة ناعمة ( دارسين ناعم )

الطريقة 1 :

• نضع الحليب في حلة على النار ويضاف له المقدار المرغوب من السكر ويقلب  .
• يصب الحليب الساخن في الأكواب ويرش الوجه بالقرفة ويقدم .
• كما يمكن تسخين الحليب ، ثم صبه في الاكواب واضافة السكر في الاكواب لكل شخص الكمية حسب رغبته ، ثم رش وجه الكوب بالقرفة الناعمة .

الطريقة 2 :

• نضع الحليب في حلة على النار ويضاف له المقدار المرغوب من السكر ويقلب ، وعندما يسخن نرش القرفة الناعمة عليه مع التقليب بمضرب سلك يدوي.
• يصب الحليب في أكواب ويقدم كما هو ، أو نصفي الحليب من القرفة بمصفاة الشاي عند صبه في الأكواب وفي هذه الحالة مذاق القرفة سيكون خفيفا .
• كما يمكن اضافة السكر في الأكوب بدلا من اضافته للحليب في القدر .

وبالهناء والشفاء ،،،