الكشك

الكشك له عدة طرق لإعداده ، و دي طريقة بيتنا في اعداده ، وانا كنت متعودة أعمله بالنظر من غير مقادير بس حاولت اشوف المقادير اد ايه علشان اكتبها .

المقادير : 
3 كوب شوربة دجاج
6 ملاعق كبيرة حليب بودرة
3/4 3 ملاعق كبيرة دقيق أبيض
ملح ، فلفل أسود
1 بصلة كبيرة مخرطة
زيت ذرة

الطريقة :

• نحمر البصلة في الزيت .
• في حلة صغيرة نضع الشوربة + الحليب البودرة ونقلب ثم الملح والفلفل الأسود .
• أدوب الدقيق في ثلث كوب ماء وبعد ما يذوب حيكون قوامه ثقيل فأخذ بالملعقة شوية شوربة واحطها فوق خليط الدقيق علشان اخفف قوامه مع التقليب وبعدين اصبه فوق الشوربة واقلبه ، كده اضمن ان الدقيق مش حيكلكع ، واخليه على النار علشان يستوي مع التقليب ، حألاقي ان خليط الكشك ابتدأ يتقل .
• دلوقت البصلة حتكون اتحمرت أشيل 3/4 البصلة في طبق على جنب علشان ازين بيها طبق الكشك ، وباقي البصلة مع شوية الزيت اضعهم فوق الكشك مع التقليب .
• أغرفهم في أطباق وأزين الوجه بالبصل المحمر ، ويؤكل الكشك بالخبز .

ملاحظات :

• لكل كوب شوربة 2 ملعقة كبيرة حليب بودرة و1/4 1 ملعقة كبيرة دقيق .
• اذا كنت حاستخدم الحليب السائل بدل الحليب البودرة فاضع 1 كوب حليب سائل مع 2 كوب شوربة دجاج ، والدقيق اذوبه في حليب سائل . 

وبالهناء والشفاء ،،،

شعرية بالدجاج والخضروات

بحب قوي التنويع في الطعام ، وممكن يوم ما أكون سالقة فراخ أشيل شوية منهم علشان اعمل بيهم الوصفة دي .

المقادير :

كمية من الشعرية
دجاج مسلوق مقطع قطع ( أرمي العظم )
شوربة دجاج
قطعة بروكلي
قليل من المشروم المخرط شرائح طازج أو معلب
1 جزرة مخرطة شرائح
1 بصلة مخرطة
ملح ، فلفل أسود
رشة شطة مجروشة
1/2 ملعقة صغيرة كركم
1 ملعقة صغيرة كاري
زيت ذرة

الطريقة :

1. نسخن شوربة الدجاج على النار ونضع بها قليل من الملح والفلفل الأسود والكركم والكاري .
2. نسلق الجزر المخرط في الشوربة وبعد وضعه في الشوربة بحوالي 5 دقائق نضع قطع البروكلي ودي مش حتأخذ وقت على طول بتتسلق وما أخليهاش في الشوربة كثير علشان ما تدوبش ، يا دوب كام دقيقة .
3. في نفس الوقت اللي وضعت فيه البروكلي أضع معاها الشعرية لإنها برضه مجرد دقائق وتنضج وما أخليهاش كثير علشان ما تعجنش .
4. أصفي الجزر + البروكلي + الشعرية ولا أرمي الشوربة لاني حأحتاجها بعد كده .
5.  في مقلاة كبيرة وعميقة ( أو قدر ) نضع قليلا من الزيت ، ونحمر البصلة ، ثم قطع المشروم ، ثم الدجاج ، ونبهرهم بالملح والفلفل الأسود والشطة .
6. الخطوة الأخيرة نضع البروكلي + الجزر + الشعرية على البصل والدجاج في المقلاة ونخلطهم معا ، وممكن نحتاج نضيف قليلا من شوربة الدجاج عليهم علشان الأكل ما يكونش ناشف ، وبعدين نتأكد من مذاق الملح والفلفل ونغلق النار . 

وبالهناء والشفاء ،،،

البليلة

الجو برررررد ، وفي الجو البارد مفيش أحلى من شرب البليلة الساخنة ، وكمية مكونات البليلة بتختلف حسب الرغبة ، يعني فيه ناس بتحب القمح يكون كثير والحليب قليل وبيغرفوها في أطباق وتؤكل بالملعقة ، شخصيا في البيت عندنا كلنا بنحب نشرب البليلة فبخلي كمية الحليب كثيرة والقمح قليل بحيث نشرب الحليب اللي عليه القرفة ونأكل القمح .
ولإن سلق القمح بيأخذ وقت فمش معقول كل مرة حأعمل فيها بليلة أسلق القمح ، علشان كده بأسلق كمية وباحتفظ بيها في الثلاجة للاستخدام حين الحاجة .

المكونات :

قمح مسلوق صحيح الحبة ومقشور ( بدون القشرة )
حليب سائل
سكر
فانيليا
قرفة ناعمة ( دارسين ناعم ) ( اختياري ) 

الطريقة :

1. طريقة سلق القمح :
• الأول أنقي القمح وأغسله بالماء عدة مرات وبعد كده انقعه في الماء لمدة ساعة أو ساعتين ، ثم أصفيه من ماء النقع وأرمي ماء النقع .
• إذا كنت سأسلقه في حلة ( قدر ) :
•  أضع القمح في الحلة مع الماء على النار بحيث كمية الماء تكون أكبر من كمية القمح ، وأغطيه بغطاء الحلة لكن أراعي ان الغطاء يكون موارب شوية ( يعني غير محكم الاغلاق ، مفتوح شوية ) .
• وميزة الطريقة دي اني اقدر أشوف القمح وأعرف اذا كان محتاج ميه يبقى ازيد كمية الماء ، لكنها بتأخذ وقت على بال القمح ما يستوي ( ينضج ) .
• اذا نضج القمح ، أراعي ان الحلة يكون فيها ماء ، ليه ؟ علشان بعد ما أغلق النار حأغطي الحلة جيدا بغطاء الحلة وأترك القمح ليتشرب بالماء وينفش ( يعني يكبر حجمه ) ، وبأخليه متغطي لمدة نصف ساعة .
• أما إذا كنت سأسلق القمح في حلة البخار :
• أضع القمح مع الماء في حلة البخار على النار ، وأراعي شيئين الأول ان كمية الماء تكون اكبر بكثير من القمح ، والثاني اني لا أضع كمية قمح كبيرة في الحلة ، القمح وهو غير ناضج بيكون صغير في الحجم لكنه بيشرب ماء كثير وبينفش وكمان لو كانت الكمية كثيرة على الحلة ممكن جدا تلاقيه يشيط ( يتحرق ) منك ، وطبعا بالتعود حتعرفي أد ايه كمية القمح اللي تناسب حجم حلتك ( لأن قدور الضغط لها أحجام مختلفة ).
• ميزة الطريقة دي انها سريعة ومريحة ، عادة أخلي القمح يسلق لمدة ساعة واحدة ، وبعد كده أغلق النار وأراعي اني بعد غلق النار لا أرفع البلبلة الخاصة بحلة الضغط اللي بيطلع منها البخار ( بصراحة مش عارفة بيسموها ايه ) وأترك القمح  لمدة نصف ساعة علشان يتشرب بالماء وينفش ، بعد كده أفتح عليه الغطاء ويبقى كده القمح جاهز  .
2. طريقة حفظ القمح بالثلاجة :
• عادة الكمية اللي بأسلقها من القمح أقسمها قسمين جزء أحتفظ بيه في الثلاجة من تحت وده بيستخدم في خلال مدة اسبوع الى عشرة ايام ، والماء المتبقي بعد سلق القمح أحتفظ به مع القمح .
• والباقي بأقسمه وأوزعه في الأكياس الخاصة بحفظ الطعام وأحتفظ بيه في الفريزر ، ولما آجي أستخدمه أمسك الكيس وأضعه تحت حنفية الميه لمدة دقيقة علشان أقدر أطلع القمح المتجمد من الكيس ، وبعد كده أشوف حاستخدمه في ايه ؟ اذا كنت حاستخدمه في البليلة أضع القمح ( وهو مجمد ) في الحليب على النار وأقلبه من حين لآخر لحد ما يفك .
3. طريقة اعداد البليلة :
• أضع الحليب في قدر على نار متوسطة ثم أضيف كمية السكر المرغوبة مع التقليب .
• أضيف القمح المسلوق وأحرك ، حتى يصل الحليب لدرجة الغليان فأحركه حتى لا يفور ، أغلق النار وأضع رشة من الفانيليا .
• أغرف البليلة في أكواب كبيرة mugs وأضع رشة قرفة ناعمة على وجه الكوب لمن يرغب ومع الكوب ملعقة لتناول القمح .

وبالهناء والشفاء ،،،

صينية أوراك الدجاج المحمرة مع الخضروات فوق البوتاجاز

نجد ان ورك الدجاجة بيكون مكون من جزئين القطعة الغليظة والدبوس ، في الوصفة دي سنستخدم القطعة الغليظة كنوع من التغيير وكمان حجمها بيتناسب مع الخضار المقطع ، وطبخ الصينية فوق البوتاجاز بيجعل اعداد الطعام أسرع ولاننا حنحمر الدجاجة قبل الطبخ فسنجد ان وجهها محمر مما يعطيها شكلا شهيا عند التقديم .

المقادير :

1/2 كيلو أوراك دجاج بالجلد والعظم ( القطع الغليظة من الورك ) استخدمت ماركة ساديا
5 حبات كوسا مقشرة ومقطعة بالطول ( طولها حوالي 2 سم )
1 حبة جزر مقشرة ومقطعة بالطول ( طولها حوالي 2 سم )
1 حبة بطاطس كبيرة مقطعة مكعبات
2 حبة طماطم متوسطة
1 علبة صلصة طماطم
1 بصلة متوسطة
2 فص ثوم كبير مخرط شرائح
1/2 قرن فلفل حار مفروم 
ملح ، فلفل أسود
زيت ذرة

الطريقة :

1. نضع صينية الفرن ( أفضل تكون دائرية علشان نقدر نغطيها بغطاء الحلة ) ، على البوتاجاز ونضع بها قليل من زيت الذرة .
2. عندما يسخن الزيت قليلا نضع الكوسا + الجزر في الصينية ونشوحها ( نخليها تتحمر ) شوية ، ولما تتحمر قليلا نشيلها في طبق .
3. نكون مقشرين البطاطس ومقطعينها مكعبات وواضعينها في الماء ، نصفيها من الماء ثم نضعها في الصينية تتحمر شوية وبعدين نشيلها في طبق .
4. نضع قطع الدجاج لتتحمر في الزيت ونبهرها بالملح والفلفل الأسود من الجهتين وهي بتتحمر في الصينية .
5. بعد ما تتحمر قطع الدجاج نضع شرائح الثوم والفلفل الحار المفروم ونقلب الدجاج معاها وأراعي ان الثوم لا يتغير لونه علشان ما يبقاش طعمه مر .
6. في محضرة الطعام أفرم البصلة بحيث تكون مخرطة على صغير لكن مش ناعمة قوي وأشيلها في طبق .
7. في نفس المحضرة أضرب الطماطم بقشرها بحيث برضه تكون مقطعة قطع صغيرة .
8. دلوقت في وعاء أخلط الطماطم + البصل + صلصة الطماطم + ملح + فلفل أسود + ماء واستخدم ملعقة كبيرة لخلطهم .
9. بعد ما حطيت الثوم والفلفل الحار على الدجاج على طول اضع عليها خلطة الطماطم بالبصل ولما تغلي على النار أضيف الخضروات وأغطيها بغطاء الحلة وأقلبها من وقت لآخر حتى تنضج .
10. تقدم في أطباق وبجانبها طبق رز أبيض بشعرية مع السلاطة الخضراء .

ملاحظات :

• ممكن استخدام مقلاة كبيرة غير لاصقة لتحمير الخضار والدجاج وبعد كده نصفهم في صينية الفرن ونكمل طبخهم .

وبالهناء والشفاء ،،،

عدس بالكاري

العدس في الوصفة دي بيتغمس بالخبز ، علشان كده بنستخدم كمية قليلة من الماء لإنضاجه ، ومذاقه مشطشط وملئ بالبهارات وأيضا شهي .

المقادير :

1 كوب عدس أصفر
1 بصلة متوسطة مخرطة
3 فصوص ثوم كبيرة مفرومة
ملح ، فلفل أسود
1/4 ملعقة صغيرة كركم
1 ملعقة صغيرة كاري بودرة
قرن فلفل حار مفروم أو شطة بودرة
قليل من أوراق الكاري الخضراء الطازجة
زيت ذرة

الطريقة :

1. يغسل العدس بالماء عدة مرات ويصفى .
2. في قدر صغير وعلى نار متوسطة نضع قليلا من الماء يعني حوالي 1/2 كوب وعندما يغلي نضع العدس ، وكلما احتاج العدس للماء نزيده قليلا من الماء الساخن ( بضع ملاعق في كل مرة ) مع التقليب الخفيف من الحين للآخر ( العدس ينضع سريعا ) .
3. في مقلاة متوسطة الحجم نضع قليلا من زيت الذرة ثم البصلة المخرطة مع التقليب وأول ما تذبل البصلة وتبدأ في الاحمرار نضع أوراق الكاري ، ثم نضع الفلفل الحار المفروم مع الثوم ونقلب ، وسريعا نضع التوابل من ملح وفلفل وكركم وكاري .
4. في هذه الأثناء سيكون العدس قد نضج ، نضعه في المقلاة التي بها البصل والتوابل ونقلب بخفة ، وعلى طول بمجرد خلط العدس بالبصل والثوم والتوابل نغلق النار .
5. يغرف في أطباق صغيرة ويؤكل بالخبز .

وبالهناء والشفاء ،،،

شيكن بوب كورن

طريقة رائعة لتقديم الدجاج وخصوصا للأطفال .

المكونات :

1/2 كيلو صدور دجاج مخلية بدون جلد ولا عظم
ملح - فلفل اسود
أعشاب عطرية 
خل
عصير ليمون
بصل بودرة
دقيق أبيض
دقيق ذرة ( دقيق ذرة وليس نشا )
كورن فليكس ( بدون سكر )
بقسماط
بياض بيض
قليل من الحليب السائل
زيت ذرة للقلي

الطريقة :

• تجهيز الدجاج وتتبيله :
• أقطع صدور الدجاج مكعبات صغيرة وبحب المكعبات تكون سماكتها قليلة علشان تستوي من الداخل كويس لما آجي أقليها ، علشان كده الاول أقطع صدر الدجاجة شريحتان بالطول ( أكني بأعمل بفتيك سميك) وبعد كده اقطعهم مكعبات .
• أتبل مكعبات الدجاج بخلطة مكونة من عصير ليمونة + 1/2 1 ملعقة كبيرة خل + 1/2 ملعقة صغيرة ملح + 1/4 ملعقة صغيرة فلفل أسود +1/4 ملعقة صغيرة حبهان ناعم مطحون + رشة شطة حمراء ( اختياري ) ،  دي التتبيلة الأساسية ، وممكن نضيف توابل وأعشاب اخرى وده بيكون اختياري وحسب توافره لكن بيساهم في تعزيز نكهة الدجاج مثل : رشة من القرنفل المطحون + رشة من أوراق الغار المطحونة + رشة من المردقوش ( اعشاب ) أو زعتر بلدي جاف أو زعتر بيتزا ( أوريجانو ) أو بقدونس جاف .
• للتنويع : ممكن في التتبيلة أضع بهارات دجاج . 
• يغطى طبق الدجاج بالنايلون ويوضع بالثلاجة يوم كامل حتى يتشرب بالنكهة بشكل جيد .
• عند وقت القلي :
• أجهز 3 أطباق :
• الطبق الأول : أضع به الدقيق الأبيض مع البصل البودره ، وكل نصف كوب دقيق احط عليهم 2 ملعقة كبيرة بصل بودره ، وكمان اضيف شوية ملح وفلفل اسود .
• الطبق الثاني : أضع به بياض 3 بيضات وملح وفلفل اسود وأخففه بقليل من الحليب السائل ( لا أكثر من الحليب )   .
• الطبق الثالث : أضع فيه دقيق الذرة والبقسماط والكورن فليكس وبالنسبة للكميات تكون نسب متساوية ، يعني لو ربع كوب دقيق يبقى ربع كوب بقسماط وربع كوب كورن فليكس ، وبالنسبة للكورن فليكس اجرشه بيدي قبل اضافته ، وبما ان دي حتكون الطبقة الخارجية فممكن اضيف لها اي اعشاب عطريه احبها . 
• أجهز حلة ( قدر ) صغير عميق وأضع به زيت وأسخنه على النار ، وضروري قوي يكون قلي الشيكن بوب كورن في زيت غزير لان قليه في زيت قليل متعب جدا ، تخيلي الفراخ مقطعاها صغير ولازم تقلبي كل قطعة علشان تتحمر فحتتعبي ، فاشتري راحتك وزودي كمية  الزيت .
• دلوقت اضع مكعبات الدجاج المتبلة في الطبق الأول اللي فيه الدقيق الأبيض وكل ما اضع كمية اخلطها بالدقيق وبعدين اشيلها بيدي واجعل اصابعي متباعدة قليلا واهزها يعني اكني بأنخلها علشان استبعد اي دقيق زيادة وبعدين اضعها على صينية ، اكرر العملية دي لحد ما أغلف كل كمية الدجاج بالدقيق ، وانا بأفضل اعمل كدة لان ده بيسهل لي الشغل .
• بعد كده آخذ بيدي اليمين شوية من مكعبات الدجاج المغلفة بالدقيق وأضعها في طبق البيض ، وأرفعها بيدي اليمين من طبق البيض وأضعها في طبق البقسماط .
• دلوقت أشيل الدجاج بيدي اليسرى من البقسماط وأضعه في حلة الزيت .
• ولما يتحمر اشيله من الزيت وأضعه في مصفاة ثم على كلينكس المطبخ .
• ثم يوضع في طبق ويزين بالبقدونس ويقدم ساخنا .

وبالهناء والشفاء ،،،

الشاورما - شاورما اللحم البيتي بطريقة رائعة

طبعا في البيت مش حنعمل الشاورما زي ما محلات الشاورما بتعملها ، لكن ممكن نعملها بطريقة منزلية بسيطة وسهلة بحيث تعطينا مذاق شهي ومميز .
دي كانت أحسن طريقة عملت بيها الشاورما ، لكن كنت بحس انه لسه فيه حاجة ناقصة في مذاقها ، فوجدت انه لو أضفت بصلة مخرطة شرائح رفيعة الى الشاورما بعد ما أغلق البوتاجاز وأقلبها مع خلطة الطحينة ده حيعطيني المذاق المرغوب بحيث لما أكل ساندويتش الشاورما أقول ايوه هو ده المذاق اللي المفروض يكون عليه .

المقادير :

1/2 كيلو لحم مقطع تقطيع الشاورما ( شرائح رفيعة وقصيرة )
ملح - فلفل أسود - رشة شطة بودرة
1/2 ملعقة صغيرة بهار
1/4 ملعقة صغيرة قرفة ناعمة
عصير ليمونة
1 ملعقة كبيرة خل
2 ملعقة كبيرة طحينة
1 حبة طماطم متوسطة مخرطة شرائح رفيعة قصيرة
1 حبة فلفل رومي متوسطة مخرطة شرائح رفيعة قصيرة
2 حبة بصل متوسطة مقطعة أهلة رفيعة
1 حبة طماطم متوسطة مقطعة صغير
1 فص ثوم مفروم
قليل من البقدونس المخرط ناعما
زيت ذرة
أرغفة خبز شامي ( النوع الخفيف ) 

الطريقة :

1. تتبيلة الشاورما :
• في طبق عميق أضع عصير 1/2 ليمونة + 1 ملعقة كبيرة خل + 1/2 ملعقة صغيرة ملح + 1/4 ملعقة صغيرة فلفل أسود + 1/2 ملعقة صغيرة بهار + 1/4 ملعقة صغيرة قرفة ناعمة + رشة شطة ، ثم أضع شرائح اللحم الرفيعة في هذه الخلطة وأخلطها جيدا ، وأغطيها بالنايلون وأدخلها الثلاجة وكل ما تركتها أكثر كل ما أصبح طعمها ألذ وممكن أتركها في الثلاجة لثاني يوم .
2. خلطة الطحينة :
• ودي باعملها زي ما بعمل سلطة الطحينة لكن مع اختلاف اني باعملها خفيفة وكمان لا أضع فيها الكمون .
• في طبق سأضع 2 ملعقة كبيرة طحينة + قليل من الماء وأقلبها بالملعقة لحد ما أعمل خلطة خفيفة وأضيف عليها ملح + فلفل أسود + عصير 1/2 ليمونة + فص ثوم وأقلبها .
3. طبخ الشاورما : 
• في مقلاة كبيرة أضع الزيت وعندما يسخن أضع شرائح لحم الشاورما المتبلة فيها وأقلبها قليلا ، سأجد اللحم ينزل ماؤه ، أضع بصلة مقطعة أهلة + شرائح الفلفل الرومي الرفيعة ، ثم أغطي على المقلاة بغطاء ( لا أضيف أي ماء ) .
• لما ألاقي اللحمة شربت الماء أقلبها في الزيت علشان تتحمر فيه ( لازم تتحمر كويس ) ، كده اللحمة نضجت .
• دلوقت آخذ الطماطم المقطعة وأضعها فوق اللحمة وأقلبها لفترة قصيرة جدا حوالي نصف دقيقة فقط لأني مش عايزاها تستوي ، وأغلق البوتاجاز .
• بعد وضع الطماطم أضع خلطة الطحينة وأقلب ( اللحمة ستتشربها سريعا ) ، ثم بصلة مقطعة أهلة ، ثم البقدونس المخرط .
4. ساندويتشات الشاورما :
• أقلب الخبزة على ظهرها ثم أضع خلطة الشاورما بجانب الطرف ( أراعي إني أصفي منها الزيت جيدا قبل حشو الساندويتش ) ، وألف الخبزة جيدا على شكل رول .
• بعد ذلك ألف الخبزة في الورق الأبيض الخفيف الخاص بالساندويتشات بشكل جيد .
• وممكن أستخدم أي نوع من الخبز الفينو ( الصمون ) أو الكايزر .
• يقدم بجانبها الطرشي ( المخلل ) .

ملاحظات :
-  لو كنت مستعجله ممكن أترك اللحم في التتبيلة على الأقل 1/2 ساعة قبل الطبخ ، لكن طبعا المفضل تركها لمدة أطول .
-  بأضع البصل بعد اللحمة وليس العكس لانه لا أريدها محمرة ، وأيضا لا أن تكون طرية كثيرا .
-  بالنسبة للخبز: الخبز الخفيف أسهل في اللف من الخبز السميك ، ولو ماعندكيش الخبز الخفيف ممكن تجيبي الخبز السميك وتقطعيه بحيث يعمل لك شريحتين دائريتين تعملي بيهم ساندويتشين ، ولأفضل مذاق يجب ان يكون الخبز طازج ، صحيح لو كان الخبز بايت مفيهاش حاجة ، لكن انا باتكلم عن أفضل مذاق . 


وبألف هناء وشفاء ،،،

بطاطس بالبيض والكزبرة الخضراء

وصفة تصلح للإفطار أو العشاء ممكن نغمسها بالخبز وأيضا رائعة في السندويتشات ، وكمان سهلة وسريعة .

المقادير :

2 حبة بطاطس متوسطة 
1 حبة بصل متوسطة مخرطة
1 بيضة 
ملح - فلفل أسود
رشة شطة حمراء ( حسب الرغبة )
حزمة صغيرة كزبرة خضراء مخرطه
قليل من زيت الذرة

الطريقة :

1. تقشر البطاطس وتقطع مكعبات صغيرة وتغسل بالماء عدة مرات ثم توضع في طبق به ماء .
2. في مقلاة كبيرة نضع قليلا من الزيت وعندما يسخن نصفي البطاطس من الماء ونضعها في المقلاة لتتحمر ونهدئ النار لاننا نريد ان تنضج البطاطس من الداخل .
3. عندما تنضج البطاطس نصف نضج نضع البصل المخرط ونقلب ، ونرش الملح والفلفل الأسود ورشة الشطة ( النار هادئة ).
4. عندما تحمر البصلة على خفيف وتكون البطاطس نضجت نضع البيضة ونحركها مع البطاطس ونضبط مقدار الملح مرة ثانية .
5. نغلق النار ، ثم نخلط الكزبرة الخضراء مع البطاطس والبيض .
6. تغرف في أطباق وتقدم ، أو نعد منها ساندويتشات .

ملاحظات :

- لما نعمل الساندويتش نميل المقلاة علشان الزيت يتجمع على جنب ونأخذ خلطة البطاطس بدون الزيت ونحشي بها الساندويتشات . 

وبالهناء والشفاء ،،،

مهلبية البرتقال

سهلة وسريعة الاعداد .

المقادير :

2 كوب عصير برتقال 
1/2 1 كوب ماء
بشر 1 برتقالة
1/4 كوب ماء ( للنشا )
3 ملعقة كبيرة نشا
8 ملعقة كبيرة سكر ( الكمية حسب الرغبة )

الطريقة :

• الأول نبشر البرتقالة ونراعي اننا لا نبشر الجزء الأبيض ، والبشر يكون ناعم .
• وبعدين اقطع البرتقال واعصره ، وطبعا البرتقال اللي باستخدمه يكون نوعه برتقال للعصير اللي بيكون فيه كمية العصير كثيرة .
• في حلة ( قدر ) صغيرة على نار متوسطة نضع 2 كوب عصير البرتقال + 1/2 1 كوب ماء + بشر البرتقال + 8 ملاعق كبيرة سكر ونقلبه كل شوية  .
• نذيب النشا في 1/4 كوب ماء وعندما يسخن مزيج البرتقال نضيف قليلا من النشا المذاب ونقلب ثم نضيف باقي النشا مع التقليب لحد ما نشوف ان مزيج البرتقال ثقل .
• يغرف في اطباق التقديم ويزين بجوز الهند والزبيب ، ولما حرارته تهدأ ندخله الثلاجه ويقدم باردا .

ملاحظات :

• نحتاج حوالي 7 - 8 برتقالات .
• ممكن كمان اضيف للبرتقال اثناء الطبخ شوية من التفل الناعم ( مش الخشن ) الناتج من عصر البرتقال ( وطبعا اكون متأكدة ان مافيهوش بذور ) .
• بنستخدم نشا كثير علشان البرتقال مفيهوش مادة ربط ، مش زي الرز باللبن بنحط فيه نشا قليل لان الرز اصلا مادة نشوية ، وكمان المهلبية مكونات الحليب بتساعد اننا نستخدم نشا أقل .

وبالهناء والشفاء ،،،

رز بالبصل والمكسرات

شكله فاخر عند التقديم ومذاقه شهي .

المقادير :

2 كوب رز بسمتي 
3 كوب ماء 
2 ملعقة صغيرة ممسوحة ملح
زيت ذرة
2 بصلة متوسطة مخرطة
شوية مكسرات مكوناتها حسب رغبتك ( لوز - عين جمل - زبيب )

الطريقة :

1. اضع قليلا من الزيت في القدر - كمية  الزيت تكون أقل من الكمية التي اضيفها عادة على الرز - وعندما يسخن قليلا اضيف 2 كوب من الرز المغسول والمصفى واقلبه قليلا ، ثم اضيف 2 ملعقة ممسوحة ملح على الرز ، وبعد ذلك اضيف 3 كوب ماء وعندما يغلي الماء اغطي القدر واضعه على النار الهادئة وتحته صاجة .
2. في مقلاة اضع قليلا من الزيت واحمر فيها المكسرات ، الاول اضع اللوز لانه بيأخد وقت اطول قليلا ثم عين الجمل وفي الاخر خالص احط الزبيب لانه مابيأخدش وقت ، وممكن اضيف اي انواع اخرى من المكسرات زي البندق وكمان فيه لوز متقشر ومتقطع على شكل صنوبري ، ولما تتحمر المكسرات اشيلها واضعها في طبق ( من غير وضع كلينكس المطبخ اسفلها لاني عايزة الزيت اللي فيها للرز ).
3. بعد ما أشيل المكسرات من المقلاة أضع في نفس المقلاة البصل المخرط وأحمره وبعدين اشيله في طبق .
4. دلوقت اشوف الرز لما الاقيه شرب الماء وقرب على النضج اضع على وجهه البصل المحمر وارش عليه قليل من زيت قلية البصل ، وأغطي القدر مرة اخرى حتى يتم الرز نضجه .
5. عند التقديم : البصل اللي على وش حلة الرز اشيله واضعه مرة اخرى في طبق وبعدين اضع الرز في طبق التقديم واضع فوقه البصل ثم المكسرات .

ملاحظات :

• لكل كوب رز بسمتي 1/2 1 كوب ماء أو حسب كمية  الماء التي انت متعودة تضيفيها على الرز .
• لكل كوب رز 1 ملعقة صغيرة ممسوحة ملح .
• لو سألت ليه البصل اضعه في حلة الرز وبعدين اشيله في طبق ثم ازين وجه الرز به ؟ علشان الرز يكتسب رائحة البصل وكمان يأخد شوية من زيت البصل ، والبصل بيطرى من بخار الرز فبيكون مذاقه اجمل .
• المكسرات لا نضعها اثناء طبخ الرز نهائيا لاني لو عملت كده حتطرى ومش حتكون حلوة .

وبالهناء والشفاء ،،،