مكرونة مع كرات لحم بصلصة الطماطم

طبق خفيف

المقادير :

1 كيس معكرونة اسباجيتي
عدد 16 كرة لحم ماركة أمريكانا أو أي ماركة أخرى
1 بصلة متوسطة مخرطة
2 حبة طماطم متوسطة
1 علبة صلصة طماطم
1-2 فص ثوم مهروس
1 ملعقة صغيرة خل أبيض
ملح
فلفل أسود
2 ملعقة كبيرة ثوم معمر مخرط
زيت ذرة

الطريقة :

1. نسخن الزيت في مقلاة صغيرة ونقلي كرات اللحم وعند النضج ترفع من الزيت .
2. نسلق المكرونة في ماء مغلي مضاف له 1 ملعقة صغيرة ملح خشن أو عادي ثم تصفى .
3. في أثناء سلق المكرونة نحضر مقلاة كبيرة أو قدر ونضع به قليلا من الزيت وعندما يسخن نضع به البصلة المخرطة ونقلب ولما يصبح لونها ذهبي فاتح نضع الثوم ونحرك ( نراعي عدم تغير لون الثوم ).
4. الطماطم نضربها في محضرة الطعام ونضيفها فوق البصلة + صلصة الطماطم ، ونضيف قليلا جدا من الماء .
5. نضع كرات اللحم المقلية في الصلصة ، ونتبلها بالملح والفلفل الأسود ونتركها فوق النار لمدة دقائق فقط ، نضع ملعقة الخل ونغلق النار ( لا نضع الخل في قدور الألمونيوم ) .
6. نغرف المكرونة في أطباق ونضع فوقها كرات اللحم بالصلصة وتزين بالثوم المعمر وتقدم .

وبالهناء والشفاء ،،،

طبق رز بخلطة الدجاج

طبق شهي بمكوناته ونكهة بهاراته ...

المقادير :

1 دجاجة
3 بصلة
4 حبات قرنفل
6 حبات حبهان
1 عود قرفة
2 ورق لورو
فلفل أسود
ملح
زيت ذرة
1 قرن فلفل حار ( اذا احتوت بهارات الدجاج على شطة لا نضيف الفلفل الحار )
2 فص ثوم مفروم
1 حبة فلفل رومي مخرطة
1 - 2 جزرة حسب الحجم
1 حبة طماطم متوسطة
2 ملعقة صغيرة بهارات دجاج
ملء قبضة اليد زبيب
2 كوب رز

الطريقة :

• تجهيز الدجاج :
• تسلق الدجاجة في ماء مغلي به 2 بصلة مقطعة بالنصف + 4 حبات قرنفل + 6 حبات حبهان + عود قرفة + 2 ورقة لورو ( ورق غار) + 4/1 ملعقة صغيرة فلفل أسود .
• أثناء سلق الدجاجة نشغل الفرن حتى يسخن .
• عند النضج تصفى مرقة الدجاج من التوابل حيث ستستخدم لاحقا للرز .
• أما الدجاجة فينزع منها العظم وتقطع ، وبالنسبة للجلد فيمكنك استخدامه أو عدم استخدامه حسب رغبتك ، بالنسبة لي استخدمته في هذه الوصفة .
• تجهيز خلطة الدجاج :
• في مقلاة نضع الزيت وعندما يسخن نضع 1 بصلة مخرطة ونحرك وعندما تذبل نضيف الفلفل الحار + الثوم المفروم  .

• نضيف الفلفل الرومي المخرط + الجزر المبشور ونحرك .

•  ثم نضيف الطماطم ونحرك .

• وأخيرا نضيف الدجاج ونحرك + الفلفل الأسود + بهارات الدجاج + الملح ( كمية الملح خاصة بتتبيل الدجاج والخضرة وليس الرز ) ونحرك ، ثم نضيف الزبيب ونحرك .

• تجهيز صينية الرز :
• نغسل الرز عدة مرات بالماء ثم يصفى ونضع عليه كمية الملح اللازمة لتتبيله ، وهي  2 ملعقة صغيرة ممسوحة ملح .

• في صينية الفرن نضع كمية من الرز ونفرشها في الصينية ، ثم نضع فوقها خلطة الدجاج ( ولا نضع كل كمية الزيت التي في الخلطة ، لإن كمية الزيت بالشكل ده حتكون كثيرة على الرز ، أضع فقط الكمية المناسبة للرز وباقي الزيت لا أستخدمه )  ، ثم طبقة أخرى من الرز ثم تسقى بمرقة الدجاج وكمية المرقة هي الكمية اللي انت متعودة انك تضعيها على مقدار الرز حسب نوعه ، وهي هنا 3 كوب مرقة .

• تغطى الصينية بفويل الألمونيوم ( الألمونيوم غير ملامس للرز ) ، وتدخل الفرن على الرف الأوسط درجة الحرارة 240ْم لمدة 40 دقيقة .

• عندما نخرج الصينية ونتأكد من نضج الرز ، أتركيها خارج الفرن مغطاة لمدة 5 دقائق تقريبا قبل الغرف في الأطباق .

ملاحظات :

• عند إعداد خلطة الدجاج ممكن تشيلي شوية على جنب في طبق وتستخدميها بعدين في الساندويتشات  ، مع مراعاة تقطيع الدجاج لقطع صغيرة .

وبالهناء والشفاء ،،،

لحمة بصوص في الفرن مع بطاطس وجزر

وصفة لذيذة بشكل ، وفي نفس الوقت بسيطة ...

المقادير :

3 قطع لحمة بقري ستيك سميكة أو لحمة من سلسلة الظهر تقطع حلقات سميكة ( اللي استخدمتها في الوصفة دي  )
ملح
فلفل أسود
6 فصوص ثوم صحيحة مقشرة
5 حبات بطاطس صغيرة صحيحة أونستخدم 2 حبة كبيرة وتقطع قطعا كبيرة
2 جزرة مقطعة بشكل كبير
4 بصلات صغيرة مقطعة شرائح كبيرة أو 2 بصلة كبيرة
1 حبة طماطم كبيرة مقطعة كبير
3 ملاعق كبيرة روزماري مخرط خشن
3 ملعقة كبيرة دقيق ( طحين ) أبيض
زيت ذرة

الطريقة :

• بالنسبة لللحمة كل قطعة كان بها مقدار من الدهن احتفظت به ولم أزله ولكن أزلت الجلدة التي بتكون فوق الدهن .
• وكل قطعة لحمة حنحدث بها شقان بالسكينة ونحط في كل شق فص ثوم صحيح.

• في مقلاة نضع قليلا من زيت الذرة وعندما يسخن نضع قطع اللحمة مباشرة بدون تتبيل ، وهي في المقلاة حنرش عليها شوية ملح وفلفل أسود .

• لما تتحمر شوية ( تحمير خفيف ) نقلبها للجهة الثانية علشان تتحمر هي كمان ، وبرضه نرش عليها شوية ملح وفلفل أسود .

• في بعض الأحيان نلاقي الثوم ممكن ينط بره اللحمة - زي الثومة الشقية دي - في الحالة دي شيلي الثومة من الزيت علشان لو خليتيها حتتحمر ولو اتحمرت طعمها حيصبح مر ،  وابقي بعدين حطيها في صينية الفرن مع البطاطس .

• لما نخلص من تحمير كل قطع اللحمة نشيلها من المقلاة ونضع في نفس الزيت حبات البطاطس الصحيحة علشان تأخذ تحمير خفيف وتكتسب النكهة .

• نشيل البطاطس ونضع البصلة في نفس الزيت وتأخذ تحميرة خفيفة فقط وأشيلها من الزيت .

• في حلة صغيرة جدا أذيب 3 ملاعق طحين في مقدار كوب من ماء الفلتر وبعد ما يذوب أزيد مقدار الماء في الحلة وأحرك .
• أرجع للمقلاة ( اللي قلينا فيها اللحمة والبطاطس والبصل ) لو لقيت كمية الزيت فيها كثير أقلل منها وأخلي كمية الزيت في المقلاة قليلة . ثم أضع الطحين المذاب على الزيت اللي في هذه المقلاة  وأقلب كويس وبسرعة علشان ما يكلكعش مني ، وأحك أي حاجة ملتصقة في المقلاة علشان تديني الطعم والمذاق الشهي للصوص .

• وأزيد كمان من كمية الماء اللي في الصوص  ، ليه ؟ علشان أنا عايزاه صوص خفيف زي الشوربة ( بدون ما أحدد لك كمية للماء ).

• في صينية الفرن وبدون دهنها بأي زيت أصف اللحمة والبصل والبطاطس والجزر والطماطم وكمان ما أنساش الثومة اللي نطت .

• دي صورة الروزماري وهو من الأعشاب العطرية بيدي طعم ومذاق جميل وخصوصا مع اللحمة ممكن تلاقيه طازج أو مجفف لكن الطازج مذاقه أفضل ، حنأخذ منه الأوراق فقط بدون الساق ونقطعها تقطيع خشن .

• نضع الروزماري على صينية اللحمة .

• الصوص اللي عملناه ممكن نسقي بيه اللحمه على طول أو إذا كنا خايفين يكون فيه كلاكيع خفيفة ممكن نصفيه في مصفاة وبعدين نضعه فوق اللحمة ، شوفوا خفيف إزاي .

• وإذا تبقى صوص أخليه في طبق وأثناء نضج اللحمة ممكن تحتاج زيادة لسوائل فأزيده من الصوص ده ( إذا وجدت اللحمة محتاجة سائل وهي في الفرن وكمية الصوص خلصت زيديها ماء ) .

• أدخلها الفرن بدون تغطية على الرف السفلي المباشر للنار على حرارة عالية 260ْم لمدة ساعة وربع أو لحين النضج - هي بتأخذ وقت علشان اللحمة سميكة وعلشان كده كل حاجة في الصينية بأقطعها كبير وخصوصا البطاطس اللي خليتها صحيحة ، و لما تنضج أراعي إن الصينية يكون فيها كمية جيدة من الصوص لكن لاحظي إنه حيكون أثقل من الأول بسبب تبخر الماء وهو المطلوب .

• تقدم في أطباق وبجانبها رز أبيض وسلطة خضراء ( بصراحة لذيذة قوي والكل عندي حبها ياريت تجربوها ) .

وبالهناء والشفاء ،،،

رز باللحمة المفرومة والبسلة

مزنوقة وعايزة تعملي أكلة بسرعة ، وفي نفس الوقت عايزة يكون فيها رز ولحمة وخضار يعني مغذية  ، حتلاقي طلبك في الوصفة دي .

المقادير :

4/1 كيلو لحمة مفرومة
1 بصلة متوسطة
4/3 كوب بسلة
ملح
4/1 ملعقة صغيرة فلفل أسود
4/1 ملعقة صغيرة بهار
4/1 ملعقة صغيرة قرفة ناعمة ( دارسين مطحون )
4 حبات حبهان ( هيل )
3 حبات قرنفل ( مسمار )
قليل جدا من البقدونس المفروم
2/1 1 كوب رز ( في الوصفة دي ممكن تستخدمي الرز البشاور أو الرز المصري )
زيت ذرة

الطريقة :

• في الحلة ( القدر ) حنضع قليلا من الزيت وعندما يسخن نضع البصل المفروم ونقلب ، وعندما يحمر قليلا نضع اللحمة المفرومة ونقلب ( إذا احتاج لإضافة قليل من الزيت مرة أخرى نضيف ) .

• نتبل اللحمة المفرومة بالفلفل الأسود + البهار + القرفة الناعمة + الحبهان + القرنفل ونستمر في التقليب - بدون إضافة ماء - إلى أن تتحمر اللحمة قليلا .

• في هذه الأثناء أضيف البقدونس المفروم - أقوم بتقطيع البقدونس بمقص المطبخ مباشرة فوق الحلة - وأقلب .

• و أضيف البسلة وأقلبها مع اللحمة والبصل وأضع قليلا من الملح يكفي للتبيل اللحمة والبسلة .

• ثم أضع 4/3 كوب ماء وأغطي الحلة .
• عندما تتشرب اللحمة والبسلة بالماء ، أضع الرز وأقلب ، وأضع كمية الملح الخاصة بالرز وهي هنا 2/1 1 ملعقة صغيرة ممسوحة  ، ثم أضع الماء الخاص بالرز ووضعت 4/1 2 كوب ماء ( يمكنك وضع كمية الماء التي تناسب نوع الرز المستخدم ) ، نغلق الحلة ونضعها على عين الغاز الصغيرة ونضع تحتها الصاجة.

• عندما ينضج الرز يغرف في أطباق ويقدم .

وبالهناء والشفاء ،،،

سمك فيليه بالسمسم في الفرن

السمك الفيليه خلى حياتي أسهل ...

المقادير :

1 كيلو سمك فيليه
3 فص ثوم مفروم
2/1 ملعقة صغيرة فلفل حار مجروش
4/1 ملعقة صغيرة فلفل أسود
3 ملعقة كبيرة مستردة
1 ملعقة كبيرة معجون طماطم
1 ملعقة كبيرة كمون مطحون ناعم
2/1 ملعقة صغيرة كزبرة مطحونة ناعمة
عصير 2/1 ليمونة
ملح
5 ملاعق كبيرة سمسم
زيت ذرة
حلقات من البطاطس والبصل ( اختياري )

الطريقة :

• نغسل السمك الفيليه بالماء جيدا .
• تجهيز التتبيلة : في طبق نخلط كل من الثوم + الفلفل الحار + الفلفل الأسود + المستردة + معجون الطماطم + الكمون + الكزبرة + عصير الليمون + الملح .
• نخلط السمك بالتتبيلة ونغطي الطبق بورق نايلون وندخله الثلاجة ليتشرب بالتتبيلة ( المدة حسب ظروفك لو مستعجلة ممكن تطبخيه على طول ) .
• تجهيز صينية الفرن :
• في الأول أشغل الفرن على 220ْم .
• صينية الفرن أضع بها 1 ملعقة زيت وأدهنها بها ثم أصف حلقات البطاطس والبصل ( ممكن أكتفي بالبصل أو البطاطس ).
• أحضر طبق السمك وأضع على السمك 3 ملاعق كبيرة سمسم وأخلطه بيدي مع السمك ، ثم أصف السمك فوق البطاطس والبصل ، وأضع فوق السمك الزيت ( بالنسبة للكمية تقريبية حوالي 5 ملاعق كبيرة ) وبعد كده أرش سمسم على وجه السمك الفيليه .
• أدخل السمك الفرن على الرف الأوسط والحرارة 220ْم بدون وضع أي غطاء ألمونيوم فويل على الصينية وبدون وضع أي ماء لإنها ستنضج بماء السمك  ، المدة حوالى 45 دقيقة ( أو إلى أن تتشرب بكل الماء وتتحمر شوية ).

• اقتراحات التقديم : ممكن تقدمي بجانبها مكرونة بالزبدة وتضعي في الطبق بضع حبات من البطاطس اللي كانت تحت السمك لإنها بتبقى متشربه بكل تتبيلة السمك فبيكون طعمها لذيذ ، وكمان ما ننساش نقدم أي حاجة خضراء زي الجرجير كده .

وبالهناء والشفاء ،،،