الأربعاء، 3 أغسطس 2022

صينية مكرونة باللحمة المفرومة والقرنبيط والباشميل


المقادير:

للقرنبيط:
مقدار من القرنبيط - ( ملح - فلفل أسود - كمون )

لعصاج اللحم:
1/2 كيلو لحم بقري مفروم - 2 بصلة متوسطة - 2 حبة طماطم متوسطة - 1 علبة صلصة طماطم - زيت ذرة - ( ملح - فلفل أسود - بهار - شطة حمراء حسب الرغبة )

للمكرونة:
1/2 كيلو مكرونة فرن - ( ملح - فلفل أسود )

للباشميل:
حليب - دقيق أبيض - زيت ذرة - ( ملح - فلفل أسود )

القرنبيط:

  • تجهيز القرنبيط يعني بأسلقه في الماء قبل ما أستخدمه في الطبخة ، فبجيب قدر وأضع فيه كمية مناسبة من الماء وأضعه على النار وأضيف له شوية ملح وفلفل أسود وكمون ولما تغلي المية أضع فيها القرنبيط وعندما ينضج 1/2 نضج أصفيه من الماء ، ولما يبرد أقسمه إلى زهرات وآخذ منه الكمية اللي أشوفها مناسبة لوصفة النهاردة والباقي أحفظه بالفريزر لإستخدامه في وصفات أخرى. 

تجهيزعصاج اللحمة المفرومة:

  • في مقلاة كبيرة متسعة ( أو في قدر اللي يريحك لكن المقلاة اللي مقاسها كبير وجوانبها مرتفعة بحس إنها بتريحني في الطبخ ) أضع بها كمية مناسبة من زيت الذرة ولما يسخن الزيت أضع به 2 بصلة متوسطة مخرطة وأفضل يكونوا متخرطين في محضرة الطعام تخريط خشن وليس ناعم 
  • بعد كدة حأضيف للبصل 1/2 كيلو لحم بقري مفروم وحأتبله بشوية فلفل أسود والسبع بهارات وإذا لم تتوفر أستبدلها بالبهار وكمان أضيف الشطة الحمراء الحارة  المطحونة طبعا حسب الرغبة 
  • أقلب اللحمة لحد ما تشرب ماؤها ولونها يغمق شوية ، في الوقت ده أكون فرمت في محضرة  الطعام 2 حبة طماطم متوسطة ، أضيفهم على اللحمة مع التقليب
  • بعدين أضيف علبة صلصة طماطم 135 جرام على اللحمة مع التقليب ، ثم أضيف الملح .

تجهيز المعكرونة:

  • سأسلق 500 جرام من مكرونة الفرن في ماء مغلي مضاف له ملعقة صغيرة ملح وشوية فلفل أسود وأول ما يصل للنضج أصفيه في المصفاة ، لا أتركه يغلي كثيرا لأنه بعد كده حيدخل الفرن

تجهيز الباشميل:

  • كنت زمان بعمل البشاميل بالطريقة اللي اتعلمتها واتعودت عليها وهي اللي بحط فيها السمنة مع الدقيق على النار وأقلبه وبعد كده أنزل عليه بالحليب اللي بأكون خالطة معاه بيضة . لكن الطريقة دي لي عليها ملاحظات أولا كانت بتستهلك كمية كبيرة من المادة الدهنية وده مش كويس علشان الصحة وكمان الدقيق ممكن يكلكع فيها وكنا بنتغلب على كده بإن السمنة تكون كثير وننزل بالحليب شوية شوية مع التقليب وممكن حتى نستخدم المضرب الكهربائي للسهولة وكانت بتأخذ وقت وجهد .
  •  دلوقت توجد طريقة ثانية بقيت أستخدمها وهي دي اللي إعتمدتها وبقيت أفضل استخدامها على طول . ليه ؟ أولا: لإنها لا تحتاج إلى كمية كبيرة من المادة الدهنية مثل الطريقة السابقة وحتى ممكن إني لا أضيف فيها المادة الدهنية إذا رغبت في ذلك ولكن طبعا إضافة المادة الدهنية (سمن-زبدة-زيت) محبذ لأنه يعطي مذاق وطراوة للباشميل ، ثانيا: -والنقطة دي مهمة - إن الدقيق ما بيكلكعش زي الطريقة الأولانية كل اللي بيحصل إني لو ما قلبتش الباشميل الدقيق بيثقل وبيمسك ولما أقلبه بالمضرب السلك اليدوي يفك ثاني بدون الكلاكيع وده شيئ أساسي علشان الباشميل يطلع كويس وناعم ، ثالثا: مابتاخذش وقت وجهد كبير زي الطريقة الأولانية .
  • طيب دلوقت بعد ما رغيت كثير عن مميزات الطريقة دي تعالوا بقى نشرحها : 
  • لإعداد الباشميل لازم الأول أكون مجهزة الحليب وكمية الحليب المستخدمة بتختلف حسب حجم صينية الفرن وحأعرف ازاي الكمية المناسبة من الحليب ؟ ده بييجي بالتجربة وبعد كده بتبقي عارفة كل صينية فرن عندك حتعملي لها باشميل قد ايه . عادة لو حأعمل صينية فرن واحدة كبيرة بتحتاج 6 كوب حليب ، كمية الباشميل اللي حأعملها النهاردة حأضعها في 2 صينية فرن سيراميك مقاس 30سم في 21 سم ، علشان كده حأستخدم 9 كوب حليب سائل كامل الدسم أو اذا لم يتوفر الحليب السائل حأستخدم 8 كوب ماء وأذيب فيهم 2 كوب حليب بودرة كامل الدسم
  • بعد ما جهزت الحليب 9 كوب حليب حأخلط معاهم 2 بيضة ( لو حأستخدم 6 كوب حليب أخلط معاهم 1 بيضة ) وأضربها مع الحليب بالمضرب السلك اليدوي ومهم جدا ان الحليب يكون بدرجة حرارة الغرفة وما يكونش ساخن نهائيا ليه؟ علشان البيض بيخرب لو خلطته مع الحليب الساخن  .
  • أتبل الحليب بالملح والفلفل الأسود مع التقليب ، ودلوقت أنزل عليه بالدقيق - الحليب بحرارة الغرفة - وبشكل عام كل كوب حليب أضع عليه 1 ملعقة كبيرة دقيق يعنى حأحتاج 9 ملاعق دقيق ولو كنت بتستخدمي الملعقة العادية ما تمليهاش كثير ، وأقلب لحد ما الدقيق يختلط بشكل متجانس مع الحليب 
  • دلوقت على النار أقلب الدقيق مع الحليب لما يسخن الحليب الدقيق حيتقل ويبقى بشاميل 
  • بعد ما ألاقي البشاميل بدأ يثقل وأنا بقلبه على النار في الوقت ده أضيف المادة الدهنية وزي ما تحبي سمنة أو زيت شخصيا بأضيف الزيت وقوام الباشميل بيكون ناعم وجميل وكمان أفضل صحيا من السمنة ، أما كمية الزيت فحسب الرغبة بأضيفها بالنظر عموما المفضل عدم الإكثار أضيفي الكمية التي تشوفيها مناسبة وكمان ما تنسيش ان عصاج اللحمة فيه زيت .
  • ما ننساش نبهر البشاميل بالملح والفلفل الأسود

تجهيز الصينية:
  • أدهن صينية الفرن بالسمنة
  • أخلط المكرونة مع نصف كمية الباشميل تقريباً وأضعها في الصينية وأضغط عليها وأساويها بالملعقة .
  • أخلط عصاج اللحمة مع القرنبيط ثم أضعه فوق المعكرونة
  • الطبقة العلوية من الصينية ستكون طبقة الباشميل
  • أدخل الصينية الحلوة دي فرن حار حرارته ٢٤٠ م على الرف الأوسط
  • عندما أجد حواف الصينية نضجت أشغل الشواية العلوية علشان وجه الصينية ينضج ويحمر ، أطلعها من الفرن وأخليها تبرد شوية علشان تتماسك وتبقى كده جاهزه للتقديم.
ملاحظات:
  1. لما بكون حاطة قرنبيط مع العصاج لقيت ان مذاقها بيكون أفضل اذا كان العصاج فوق المكرونة يليه الباشميل اللي على وجه الصينية ، وليس بالطريقة التقليدية التي يكون فيها العصاج بين طبقتي المعكرونة .
  2. ممكن بدل ما أعمل صينية فرن كبيرة اني أوزعها على اواني فخارية صغيرة بحيث كل شخص أقدم له حصته في الاناء اللي دخل الفرن ودي بتبقى طريقة حلوة قوي
  3. بالنسبة لحرارة الفرن فكل فرن يختلف عن الآخر لكن الفكرة انه الفرن يكون حار لأن صينية المكرونة لو دخلتها في فرن حرارته متوسطة ممكن الباشميل ينشف ، علشان كده بأفضل دائما وانا بأعمل الباشميل ان قوامه يكون متوسط مش خفيف جدا ولا سميك.   

 وبالهناء والشفاء ،،،

الأربعاء، 3 يوليو 2019

رز بالمردقوش

المكونات:
رز مصري حبة قصيرة - زيت ذرة - ملح - مردقوش - شوربة دجاج أو مكعب مرقة دجاج + ماء

الطريقة:

  • نضع الزيت والرز مع التقليب ثم الملح وملعقة صغيرة مردقوش
  • نضيف شوربة دجاج أو مكعب مرقة دجاج + ماء
  • يغطى القدر ويترك على نار هادئة حتى ينضج الرز


وبالهناء والشفاء،،،

تتبيلات للسلطة الخضراء

تتبيلة البصل:
  • بصل أحمر مقطع أهلة رفيعة وكل ما كانت متقطعة رفيعة جدا كل ما كانت أفضل + ملح + فلفل أسود + خل أبيض + عصير ليمون 
  • يدعك البصل مع الخلطة السابقة باليد حتى يطرى ثم يضاف زيت الزيتون
  • توضع التتبيلة على السلاطة الخضراء عند التقديم
  • ملاحظات : 
    • يمكن استخدام الخل + الليمون كلاهما أو أحدهما .
    • بالنسبة للخل لما نشتريه نبقى نراعي انه يكون مكتوب على الزجاجة ( خل أبيض طبيعى ) وليس ( خل أبيض صناعي ) 
    • وللعلم بالنسبة لزيت الزيتون اذا كان مكتوب عليه ( زيت زيتون بكر فاخر ) ( Extra Virgin Olive Oil ) فهذا معناه أنه عصر عصرة أولى على البارد ، أما اذا كتب عليه ( زيت زيتون بكر )  ( Virgin Olive Oil) فهذا معناه أنه عصر عصرة أولى .


تتبيلة الثوم:

  • بضع فصوص من الثوم المفروم ناعما + ملح + فلفل أسود + خل أبيض طبيعي + زيت زيتون 
  • يتم وضع التتبيلة على السلاطة عند التقديم


وبالهناء والشفاء،،،

بيض بالروست بيف

المكونات :
بيض - روست بيف - بصل أحمر مقطع شرائح - جزر مبشور - قليل من الجرجير المخرط - رشة شطة حارة - ملح وفلفل أسود - زيت ذرة

الطريقة :

  • في مقلاة كبيرة الزيت + البصل مع التقليب ثم نضيف الروست بيف مع التقليب
  • نضيف الجزر ونتبل بالملح والفلفل الأسود والشطة
  • نضيف الجرجير مع التقليب
  • البيض نكسره في وعاء بدون تقليب ثم نضيفه مرة واحدة على خليط الروست بيف مع التحريك حتى لا يتشكل عيون وعندما ينضج يقلب على الجهة الأخرى ثم يقدم في أطباق


وبالهناء والشفاء ،،،

طبق بيض بالكرنب

المكونات :
بيض - كرنب بنفسجي - بصل أحمرمقطع أهلة رفيعة - جزر مبشور - فلفل رومي مخرط  - قليل من الجرجير المخرط - زيت ذرة

الطريقة :
  • في مقلاة نضع الزيت + البصل ونقلب ، وبعدين ننزل عليه بالجزر ثم الفلفل الرومي ثم الكرنب مع التقليب إلى أن يطرى ، وميزة الكرنب البنفسجي إنه بيستوي بسرعة لكنه بيلون البيض ويمتاز بطعمه الجميل وكمان هو مفيد للصحة 
  • نضيف الجرجيرمع التقليب
  • في طبق نضع البيض + الملح + الفلفل الأسود وأنزل به على خليط الكرنب لكن مهم جدا انه الكرنب يكون نضج وأصبح طري قبل اضافة البيض فالبيض ما بياخدش وقت علشان يستوى .

وبالهناء والشفاء ،،،

طبق بيض بالدجاج

المكونات: 
بصل أحمر مقطع أهلة رفيعة - زيت ذرة - دجاج مسلوق مقطع قطعا صغيرة - بصل أخضر مخرط - فلفل رومي مخرط - فلفل حار مخرط أو شطة حارة - بيض

الطريقة:
  • يحمر البصل الأحمر في الزيت ثم نضيف قطع الدجاج المسلوقة مع التقليب مع اضافة الملح والفلفل الأسود
  • نضيف البصل الأخضر + الفلفل الرومي الأخضر + الفلفل الحار
  • نكسر كل البيض في طبق بدون تقليب ثم نضيفه على خليط الدجاج ونقلب
  • يقدم في ساندويتشات أو في طبق ويغمس بالخبز
ملاحظة:
بالنسبة للدجاج فعند سلق الدجاج بأخد شوية وأقطعهم وأحفظهم بالفريزر واستخدمهم استخدامات مختلفة زي مثلا النهاردة عملتهم مع البيض ، وكمان ممكن لما أعمل شوربة سواء شوربة دجاج بالخضار أو بالشعرية أو غيرها أضيف لها قطع الدجاج اللي حافظاها بالفريزر، وبرضه لما أعمل البيتزا بأضع قطع الدجاج عليها وأرش عليهم رشة من زعتر البيتزا ( الأوريجانو ) بتدي الدجاج مذاق جميل ، وعلى فكرة مش بس ممكن احفظ الدجاج المسلوق ده حتى الدجاج بعد ما أحمره إذا زاد منه حاجه بعد الغداء ممكن أحفظها ، وأنا بحب أقطعها قبل ما أحفظها بالفريزر لأني وجدت أنه حيكون أسهل عليه استخدامها اذا كانت مخلية من العظم ومتقطعه .
وبالهناء والشفاء،،،

الثلاثاء، 2 يوليو 2019

بيض باللحمة المفرومة

المكونات:
عصاج لحمة مفرومة بدون صلصة ونكثر له البصلة - بيض - بقدونس مخرط - جرجير مخرط - قليل من الفلفل الحار المفروم أو شطة حارة - ملح وفلفل أسود - زيت ذرة

الطريقة:

  • في مقلاة نضع قليلا من الزيت ونحمر الفلفل الحار ثم نضيف عصاج اللحمة وإذا لم يكن العصاج بصلته كثيرة فنخرط بصلة ونحمرها قليلا بالزيت ثم الفلفل الحارقبل وضع عصاج اللحمة 
  • نضيف البقدونس والجرجير
  • في طبق نكسر البيض بدون تقليب ونرش عليه ملح وفلفل أسود 
  • ننزل بالبيض على العصاج ونقلب 
  • عند التقديم ممكن نعمله ساندويتشات أو يقدم في أطباق ويغمس بالخبز


وبالهناء والشفاء،،،

بيض بالبسطرمة والخضرة

 المكونات:
بيض - بسطرمة مقطعة - فلفل رومي مخرط رفيع - جزر مبشور - قليل من البقدونس المخرط ، وممكن بدل البقدونس أضع قليل من الجرجير المخرط ، أو بقدونس مع جرجير - رشة فلفل أسود - زيت ذرة

الطريقة:

  • نحمر البسطرمة قليلا بالزيت ثم نضيف الفلفل الرومي والجزر ثم البقدونس فالبيض
  • بالنسبة للبيض نكسره في طبق وهو عيون صحيحة ونضعه فوق خلطة البسطرمة ونقلب بالملعقة سنجد ان فيه أجزاء بها بياض بيض وأخرى فيها صفار بيض وده طعمه مختلف عن إذا ضربت البيض بالشوكة وهو في الطبق 
  • لا نحتاج لإضافة الملح لأن البسطرمة بها ملح كافي

وبالهناءوالشفاء،،،

مكونات حشوة بيتزا



  • كاتشاب يخلط معه 1 ملعقة كبيرة زعتر بيتزا
  • نقانق تسلق عدة دقائق في الماء ثم تقطع دوائر، والنقانق حسب نوعها لو تذوقتها بعد السلق ووجدت انها محتاجه تتبل ممكن أرش عليها شوية فلفل أسود
  • فلفل متوسط الحرارة يقطع دوائر رفيعة
  • فلفل رومي يقطع بالطول قطعا رفيعة تقريبا بطول 2 سم
  • زيتون أخضر بدون نوى مقطع دوائر
  • جزر مبشور
  • جرجير مخرط
  • جبنة موزاريلا

وبالهناء والشفاء،،،

الثلاثاء، 2 أبريل 2019

طريقة إعداد البشاميل


المكونات:
حليب - دقيق أبيض - مادة دهنية (سمنة أو زبدة أو زيت ذرة)- بيضة - ( ملح - فلفل أسود )


الطريقة الأولى:
  • كنت زمان بعمل البشاميل بالطريقة اللي اتعلمتها واتعودت عليها وهي اللي بحط فيها السمنة مع الدقيق على النار وأقلبه وبعد كده أنزل عليه بالحليب اللي بأكون خالطة معاه بيضة . لكن الطريقة دي لي عليها ملاحظات أولا كانت بتستهلك كمية كبيرة من المادة الدهنية وده مش كويس علشان الصحة وكمان الدقيق ممكن يكلكع فيها وكنا بنتغلب على كده بإن السمنة تكون كثير وننزل بالحليب شوية شوية مع التقليب وممكن حتى نستخدم المضرب الكهربائي للسهولة وكانت بتأخذ وقت وجهد 
الطريقة الثانية :
  •  دلوقت توجد طريقة ثانية بقيت أستخدمها وهي دي اللي إعتمدتها وبقيت أفضل استخدامها على طول . ليه ؟ أولا: لإنها لا تحتاج إلى كمية كبيرة من المادة الدهنية مثل الطريقة السابقة وحتى ممكن إني لا أضيف فيها المادة الدهنية إذا رغبت في ذلك ولكن طبعا إضافة المادة الدهنية (سمن-زبدة-زيت) محبذ لأنه يعطي مذاق وطراوة للباشميل ، ثانيا: -والنقطة دي مهمة - إن الدقيق ما بيكلكعش زي الطريقة الأولانية كل اللي بيحصل إني لو ما قلبتش الباشميل الدقيق بيثقل وبيمسك ولما أقلبه بالمضرب السلك اليدوي يفك ثاني بدون الكلاكيع وده شيئ أساسي علشان الباشميل يطلع كويس وناعم ، ثالثا: مابتاخذش وقت وجهد كبير زي الطريقة الأولانية .
  • طيب دلوقت بعد ما رغيت كثير عن مميزات الطريقة دي تعالوا بقى نشرحها : 
  • لإعداد الباشميل لازم الأول أكون مجهزة الحليب وكمية الحليب المستخدمة بتختلف حسب حجم صينية الفرن وحأعرف ازاي الكمية المناسبة من الحليب ؟ ده بييجي بالتجربة وبعد كده بتبقي عارفة كل صينية فرن عندك حتعملي لها باشميل قد ايه . عادة لو حأعمل صينية فرن واحدة كبيرة بتحتاج 6 كوب حليب ، كمية الباشميل اللي حأعملها النهاردة حأضعها في 2 صينية فرن سيراميك مقاس 30سم في 21 سم ، علشان كده حأستخدم 9 كوب حليب سائل كامل الدسم أو اذا لم يتوفر الحليب السائل حأستخدم 8 كوب ماء وأذيب فيهم 2 كوب حليب بودرة كامل الدسم
  • بعد ما جهزت الحليب 9 كوب حليب حأخلط معاهم 2 بيضة ( لو حأستخدم 6 كوب حليب أخلط معاهم 1 بيضة ) وأضربها مع الحليب بالمضرب السلك اليدوي ومهم جدا ان الحليب يكون بدرجة حرارة الغرفة وما يكونش ساخن نهائيا ليه؟ علشان البيض بيخرب لو خلطته مع الحليب الساخن  .
  • أتبل الحليب بشوية ملح وفلفل أسود مع التقليب ، ودلوقت أنزل عليه بالدقيق - الحليب بحرارة الغرفة - وبشكل عام كل كوب حليب أضع عليه 1 ملعقة كبيرة دقيق يعنى حأحتاج 9 ملاعق دقيق ولو كنت بتستخدمي الملعقة العادية ما تمليهاش كثير ، وأقلب لحد ما الدقيق يختلط بشكل متجانس مع الحليب 
  • دلوقت على النار أقلب الدقيق مع الحليب بالمضرب السلك اليدوي ولما يسخن الحليب الدقيق حيتقل ويبقى بشاميل 
  • بعد ما ألاقي البشاميل بدأ يثقل وأنا بقلبه على النار في الوقت ده أضيف المادة الدهنية وزي ما تحبي سمنة أو زيت شخصيا بأضيف الزيت وقوام الباشميل بيكون ناعم وجميل وكمان أفضل صحيا من السمنة ، أما كمية الزيت فحسب الرغبة بأضيفها بالنظر عموما المفضل عدم الإكثار أضيفي الكمية التي تشوفيها مناسبة وكمان ما تنسيش ان عصاج اللحمة فيه زيت .
  • أبهر البشاميل بالملح والفلفل الأسود ويبقى كده البشاميل جاهز للإستخدام.
  • فيه ملاحظة إنه لما استخدم البشاميل في الصينية يكون قوامه متوسط وليس ثقيلا لماذا؟ علشان الصينية لما بتدخل الفرن المية اللي في البشاميل بتتبخر والبشاميل بيثقل فيوصل للقوام المطلوب ، لكن لو كان من الأول ثقيل فعلى بال ما الصينية تتحمر حيكون البشاميل ثقل أكثر.
وبالهناء والشفاء ،،،