صينية ريش لحم بالفاصوليا الخضراء

صينية الريش بالفاصوليا في الفرن طعمها حكاية .. ولما بأجهز الريش  بأضعها  داخل كيس نايلون وبعدين بأضربها بأداة اللحمة - بصراحة مش عارفة بيسموها إيه - وجدت ان الكيس النايلون كويس قوي علشان بيحافظ على نظافة أدوات المطبخ .

المقادير :

1 كيلو ريش ضاني
400 جرام فاصوليا خضراء مقطعة
1 بصلة متوسطة
5 فصوص ثوم مفروم
ملح
فلفل أسود
1 طماطم متوسطة مقطعة حلقات
1 علبة صلصة طماطم
قليل من الزيت

الطريقة :

1. لتجهيز الريش : ندق الريش بالأداة الخاصة باللحم لتبطط وتصبح أسهل في النضج وأطري في الأكل .
2. في صينية فرن نضع البصل + الثوم + الملح + الفلفل ويدعك باليد ، ثم توضع الريش وتخلط بالبصل .
3. نضع الفاصوليا الخضراء + الطماطم الحلقات + صلصة الطماطم + الزيت + ماء كافي لملء الصينية .
4. نضع الصينية في الفرن على الرف السفلي المباشر للنار على حرارة عالية  260ْ  ، وإذا شربت الماء واحتاجت زيادة نزيد الماء .
5. يقدم بجانبها رز بالجزر ، لإن الجزر بيناسب الفاصوليا الخضراء .

وبالهناء والشفاء ،،،

مموش ربيان

الأكلة دي من إسمها بتتعمل بالماش والرز والربيان ( الجمبري ) وطعمها لذيذ قوي ، وممكن نحط عليها كاتشاب عند الأكل ، أو ممكن نعمل دقوس طماطم .

وهذه صورة الماش المجروش :

وهذا الشكل النهائي للطبق :

المقادير :

1 كيلو ربيان طري مقشر ( استخدمت الأكياس المجمدة ماركة الإمارات )

1/4 1 كوب ماش مجروش

1/4 1 كوب رز بسمتي

3 فصوص حبهان صحيح ( هيل )

1/2 ملعقة صغيرة حبهان ( هيل ) ناعم

1/2 ملعقة صغيرة فلفل أسود ناعم

1/4 ملعقة صغيرة قرنفل ( مسمار ) ناعم

1/4 ملعقة صغيرة قرفة ( دارسين ) ناعمة

3 حبات ورق غار ( ورق لورو )

1/2 ملعقة صغيرة كركم ناعم

1/4 ملعقة لومي أسود ( ليمون أسود ) ناعم

ملح

5 حبات ثوم مفروم

1 قرن فلفل أخضر حار مفروم

1 ملعقة كبيرة صلصة طماطم

1 بصلة متوسطة مخرطة

1 حبة طماطم مقطعة

1 حزمة كزبرة خضراء مخرطة

قليل من الزيت

الطريقة :

1. ننظف الربيان وننزع الخط الأسود الموجود في ظهر الربيان ، ثم نشطفه بالماء ونصفيه .
2. في حلة نضع زيت ثم البصلة ونقلبها إلى أن يصفر لونها ، نضيف الثوم المفروم والفلفل الأخضر ونقلب وسريعا نضيف الربيان ونقلب .
3. نضع على الربيان الفلفل الأسود + الحبهان الناعم + الحبهان الصحيح + القرفة الناعمة + القرنفل الناعم + ورق الغار + الكركم + اللومي الناعم وأخيرا 2/1 ملعقة صغيرة ملح ممسوحة  .
4. أضع الطماطم المقطعة وأقلب ، ثم الكزبرة الخضراء المخرطة .
5. نضع 2/1 كوب ماء على الربيان ونقلب ،  وننتظر إلى أن يتشربها الربيان .
6. الآن نضع في حلة الربيان الماء الذي سأستخدمه لإنضاج الماش والرز ، فأضع فوق الربيان مقدار 4/1 3 كوب ماء + 4/1 2 ملعقة صغيرة ملح ممسوحة  + 1 ملعقة كبيرة صلصة طماطم وأتركه ليغلي .
7. بعد غليان الماء ، نغسل الماش بالماء ونصفيه ونضعه فوق الربيان  .
8. وأيضا مباشرة أغسل الرز وأصفيه وأضعه فوق الربيان .
9. أغطي الحلة وأترك حلة المموش على نار هادئة تحتها صفيحة ، حتى ينضج .

ملاحظات :

• أنا بحب أشتغل بالطريقة السريعة مادامت تؤدي إلى نفس الغرض ، فأنا لا أنقع الماش أو الرز قبل الطبخ بل أستخدمه مباشرة ووجدت أن الماش والرز ينضجان في نفس الزمن .
• كذلك أثناء وضعي للبهارات على الربيان وجدت أن الربيان شرب ماؤه فوضعت 2/1 كوب ماء وأكملت وضع البهارات ، وجعلت النار عالية حتى ينضج الربيان سريعا وأخلص ، بس كنت واقفة بجانب البوتاجاز .

• بالنسبة لكمية الماش فنضع كمية مساوية للرز .

• بالنسبة لكمية الماء المستخدمة أنا حسبتها بالطريقة دي وطلع المموش مفلفل وحلو :

     * 1 كيلو ربيان : 2/1 كوب ماء .

     * الرز : 4/1 1 كوب رز عليهم 2 كوب ماء .

     * الماش : 4/1 1 كوب ماش عليهم 4/1 1 كوب ماء .

• بالنسبة لكمية الملح المستخدمة أيضا حسبتها بالطريقة دي :

     * 1 كيلو ربيان : 2/1 ملعقة صغيرة ممسوحة ملح .

     * 1/4 1 كوب رز : عليهم 4/1 1 ملعقة ممسوحة ملح .

     * 1/4 1 كوب ماش : عليهم 1 ملعقة ممسوحة ملح .

     ونخلي بالنا إننا وضعنا لومي أسود في الوصفة واللومي طعمه مزز وحامض ، فلا نكثر من الملح . وأنا كتبت المقادير إللي فعلا استخدمتها بالتفصيل لربما أردت أن تغيري في الكمية المستخدمة فساعتها تعرفي إزاي تقدري كمية الملح والماء .

وبالهناء والشفاء ،،،

                                                                      

طبق قمر الدين

يعد طبق قمر الدين من الحلويات الخفيفة سريعة التحضير ، فيقدم كحلوى في أطباق صغيرة مزينة بجوز الهند المبشور ، أو يمكن تقديمه كعشاء خفيف للأسرة وفي هذه الحالة يتم وضعه في أطباق أكبر حجما .

المقادير:

لفة ( ورقة ) قمر الدين زنة 400 جرام

3 ملعقة كبيرة سكر

جوز هند مبشور

قليل من الزبيب للتزيين ( عند الرغبة )

2 ملعقة كبيرة نشا

3 كوب ماء

الطريقة :

1. أنا بحب أعمل قمر الدين بالطريقة السريعة يعني لا أنقع قمر الدين في ماء بل أطبخه مباشرة ، وذلك بأن أحضر لفة قمر الدين وأزيل الورق النايلون ، وأقطع قمر الدين بمقص المطبخ أو باليد إلى قطع متوسطة ، وأضعها بالحلة  ( القدر ) ثم أضع 2/1 2 كوب ماء عليه وأضعها على النار .
2. أقلب قمر الدين بالسلك اليدوي أو بالمضرب اليدوي إلى أن يذوب تماما ، ثم أضيف السكر وأقلب ، ثم أضيف 1 ملعقة كبيرة جوز هند مبشور على قمر الدين وأقلب .
3. أضع النشا في 2/1 كوب ماء - درجة حرارته عادية وليس ساخن - وأقلب إلى أن يذوب النشا تماما .
4. أصب النشا بالتدريج في حلة قمر الدين مع الاستمرار بتقليب قمر الدين - تقليب القمر الدين بالسلك اليدوي في المرحلة دي مهم ، سنجد أن قمر الدين ثقل ، نطفئ النار .
5. نكون من بداية التحضير مجهزين أطباق لغرف قمر الدين فيها ، نضع قمر الدين في هذه الأطباق سريعا ونتركه حتى يبرد من حرارة النار ، نزينه بجوز الهند المبشور وإن رغبت ممكن كمان نزينه بشوية زبيب ، عندما نجد أنه برد تماما وليس به حرارة نغلف الوجه بنايلون وندخله الثلاجة ليبرد ، ويقدم باردا .

ملاحظات :

• عادة أنا بعمل القمر الدين بدون مقادير وبأظبطه أثناء العمل ، في هذه المرة كتبت مقدار الماء والسكر والنشا اللي فعلا وضعته ، بالنسبة لك أثناء العمل يجب أن يكون فيه مرونة يعني ممكن تضعي 2 ملعقة سكر بدل من 3 وتشوفي ممكن يعجبك ، لو لقيتي قمر الدين ثقيل قوي ممكن تزودي قليل من الماء ، لو لقيتيه خفيف جدا بعد وضع النشا فممكن تذيبي  شوية نشا في قليل من  الماء وتضيفيهم على قمر الدين، بالنسبة لي لا أحب قمر الدين ثقيل ولا خفيف .
• يجب التأكد من أن قمر الدين برد قبل وضع النايلون عليه حتى لا يتكثف بخار الماء على النايلون ، وفائدة النايلون إن قمر الدين لا يتغير طعمه عند وضعه مع مأكولات أخري بالثلاجة .

وبالهناء والشفاء ،،،

سمك فيليه مشوي بالفرن

طعم السمك الفيليه المشوي بالطريقة دي رائع .. رائع ..رائع .. وفوق ذلك الطريقة بسيطة وسهلة وسريعة ، وبصراحة الطريقة دي لازم الواحد يجربها من كتر ماهي حلوة ، والسمك الفيليه اللي استخدمته النوع الموجود في الأكياس المجمدة .

المقادير :

1 كيلو سمك فيليه

عصير 1 ليمونة

1 ملعقة كبيرة خل

6 فصوص ثوم مفروم

1 قرن فلفل أخضر حار مفروم

1/2 ملعقة صغيرة ملح

1/2 ملعقة صغيرة فلفل أسود

1 ملعقة كبيرة كمون

قليل من الكزبرة الخضراء مفرومة

1 حبة طماطم متوسطة مقطعة قطعا صغيرة جدا

زيت ذرة

الطريقة :

1. في طبق بايركس نحضر الخلطة بوضع الليمون + الخل + الثوم + الفلفل الأخضر الحار + الملح + الفلفل + الكمون + الكزبرة الخضراء + الطماطم .
2. نضع السمك في الخلطة ونقلبه معها ونغطيها بورق نايلون وندخلها الثلاجة ونتركها ساعتين أو ثلاثة لتتشرب بالخلطة .
3. نسخن الفرن .
4. نغطي صينية فرن بورق ألمونيوم ، ونضع عليه السمك والخلطة ، ونرش عليه زيت كمية كويسة .
5. ندخله - بدون وضع غطاء على السمك - في الفرن على الرف الأوسط ، درجة حرارة الفرن حارة 260ْ ، لمدة 40 دقيقة .
6. يقدم ساخنا ، مع رز السمك ، بالإضافة إلى سلطة الطحينة .
7. للتنويع : يمكن تقطيع حبة بطاطس إلى شرائح ووضعها أسفل قطع السمك .

ملاحظة :

• لو كنت مستعجلة وماعندكيش وقت لترك السمك يتبل في الثلاجة ممكن بعد ما تضعيه في الخلطة إنك تضعيه مباشرة في صينية الفرن ، أنا عملت كده وطلع الطعم ممتاز ، بس مهم انك تخلي الفرن يسخن عند بداية العمل . 

وبالهناء والشفاء ،،،

المانجا ( الهمبة )

المانجا يا جمالها ، حلوة ونعمة من رب العالمين ، بشوفها اليومين دول في السوق ، وبيكونوا عاملين عليها عروض أسعار ، يعني بتباع بسعر رخيص نسبيا ، لأنها غير ناضجة ، طيب إنت كربة بيت حتعملي إيه ؟ بصراحة هي بيتكون فرصة ، بس اللي بألاحظه إن كثير من السيدات ما بيشتروهاش لإنها مش مستوية ، بس لو إنت عرفت إزاي بنخلي المانجا تستوي ، ساعتها بقى مش حيهمك إنك تشتريها مستوية أو خضراء زي الحجر ، هاتي المانجا ( الغير ناضجة ) ، إغسيها كويس ، نشفيها كويس ، هاتي ورق جرائد ، وكل حبة مانجا لفيها كويس بورقة ، وضعي المانجا في كيس نايلون من أكياس السوبرماركت ، وبعدين أربطي الكيس ، أتركيه أول مرة يومين أو ثلاثة ، وبعدين إفتحي الكيس وإفحصي المانجا ، شوفي هل فيه مانجا استوت ( نضجت ) وإلا لسه ، وأي ورقة جرائد تجدي فيها رطوبة استبدليها ، وإذا وجدت في الكيس ماء مندي ، استبدلي الكيس بآخر نظيف ، وبعد كده كل يوم أو يوم بعد يوم تفحصي المانجا ، والمانجايه اللي تلقيها استوت إغسليها بالماء ونشفيها وضعيها بالثلاجة لتبرد ، وبعدين بألف هناء وشفاء ،،،

كبدة محمرة

 الكبدة من الأكلات سريعة التحضير ، اللي بتسعفني في يوم أكون محتاجه فيه إني أخلص الطبخ سريعا ، وتقدم بجانبها معكرونة اسباجيتي أو طبق رز بشعرية ، مع سلطة خضراء .

المقادير :

2/1 كيلو كبدة خروف مقطعة
1 بصلة متوسطة مخرطة
1 حبة متوسطة فلفل رومي أخضر بارد مخرطة
6 فصوص ثوم مفروم
1 قرن فلفل أخضر حار مفروم
2/1 ملعقة صغيرة كمون
2/1 ملعقة صغيرة بهار
2 حبة حبهان ( هيل )
ملح
فلفل أسود

الطريقة :

1. في حلة نضع زيت وعندما يسخن نضع البصلة المخرطة ونقلب إلى أن تصفر البصلة .
2. نضيف الثوم + الفلفل الأخضر الحار ونقلب مرة أو مرتين ، ثم سريعا نضيف الكبدة ونقلب .
3. نضع على الكبدة الفلفل الأسود + الملح + البهار + الكمون + الحبهان ونقلب  .
4. نضيف الفلفل الرومي المخرط ونقلب شوية .
5. لا نضيف للكبدة أي ماء ونتركها تنضج بماؤها وعندما تشرب الكبدة كل ماؤها  ، يمكننا إضافة القليل جدا من الماء يعني 4/1 كوب ونقلب إلى أن تشربه ، وقد يحتاج الأمر في بعض الأحيان إلى إضافة 4/1 كوب ثاني أو لا يحتاج ، فالكبدة تنضج سريعا

ملاحظات :

• عندما نضع الثوم نقلبه سريعا ثم نضيف الكبدة لأننا لو حمرنا الثوم لمدة طويلة سيتغير طعمه .

وبالهناء والشفاء ،،،

خبز وزبدة

ساعات الواحد على الفطار بيحب يأكل حاجة خفيفة بجانب كباية الشاي ، فممكن نحضر عيش فينو ( صمون ) ( كايزر ) مدور ، أو توست وندهنه زبدة بتكون بدرجة حرارة الغرفة  .. بالهناء والشفاء ،،،

الترمس

 اليومين اللي فاتوا كنت بأتمشي في السوبرماركت وفوجئت بوجود ترمس جاهز للأكل يباع في برطمانات ، وفيه مندوب مبيعات واقف بيعمل له دعاية ، قلت ياه احنا بقالنا مدة طويلة ما عملناش ترمس ، المهم أخذت برطمان صغير علشان أشوف هم بيعرفوا يظبطوه وإلا لأ وكمان علشان كان نفسي في الترمس ، لقيتهم عاملينه ممتاز و طعمه كويس جدا ، بس البرطمان خلص بسرعة فالكمية كانت قليلة ، قلت لما الواحد بيعمل الترمس في البيت بيطلع له كمية كبيرة قوي وكمان التكلفة بتكون جدا زهيدة ، فالمفروض على المرأة انها تعرف تعمل الحاجات الخفيفة دي لأسرتها..

المكونات :

1 كيلو ترمس

ماء من الفلتر
ملح

 الطريقة :

1. 
   
   ينقى الترمس ، يعني نضع الترمس في صينية وننقيه زي الرز كده ، ونشوف حباية حباية بشكل سريع كويسه وإلا لأ ، ولو فيه زلط نشيله .
2. 
   
   نضع الترمس في طبق بلاستيك كبير ونغسله ونصفيه من الماء ، لما نغسله لو وجدنا حباية طفت على السطح نرميها لإنها بتكون مخرومة أو فاضية من الداخل .
3. 
   
   في حلة كبيرة نضع الترمس + ماء من الفلتر يغطي الترمس وزيادة ، ثم نضعهم على النار ( أنا لا أنقع الترمس قبل غليته أول مرة ، بأنقيه وأنظفه ثم أغليه على طول ) ، الأول النار بتكون عالية لأصل لدرجة غليان الماء ثم أخفض النار ، وماتقلقيش لو أصبح شكله  مكرمش عند غليته لأول مره ده لأنه لسه حبوب جافة ، يعني سيأخذ كده 10 دقائق وبعدين سأجد الماء لونه أصفر دي الماده اللي طعمها مر وبنحاول نتخلص منها ، وكمان لما أغليه أول مرة سأجد إن الترمس عندما يبدأ يتشرب بالماء سيطفو كله على السطح مرة واحدة ، أصفي الترمس في مصفاة كبيرة .
4. 
   
    بعد ما أصفيه أعيده مره أخرى للحلة وأضع عليه كمية كافية من ماء الفلتر وأضعه على النار ، أكرر ما فعلت في المرة الأولى ، ونفس الشئ بالنسبة للنار تكون عالية الأول وبعدين أخفضها لإن الغرض ليس إني أنضج الترمس وأجعله يتهري بل الغرض إني أتخلص من المادة الصفراء إللي طعمها مر ، المرة دي الترمس لن يطفو على السطح لأنه متشرب بالماء .
5. 
   
   أكرر العملية مرة ثالثة .
6. 
   
   بعد ما أصفي الترمس أضعه في طبق بلاستيك كبير- حتى لو هو لسه ساخن - وأضع عليه من ماء الفلتر مقدار يغطيه وزيادة ( بدون ملح ) ، وأغطي الطبق بأي غطاء حتى لو ألمونيوم طالما هو بعيد عن ملامسة ماء الترمس ، ملاحظة : لا ننقع  الترمس في حلة ألمونيوم أبدا لأن الألمونيوم يتفاعل مع الأطعمة .
7. 
   
   في اليومين الثاني والثالث نكرر ما فعلناه بالترمس في أول يوم .
8. 
   
   عادة في اليوم الثالث بيكون الترمس جاهز للأكل ، ونعرف ذلك بأن نتذوقه ولا نجد فيه أي مرارة ، وممكن في ثاني يوم يكون جاهز لكن بأفضل يأخذ 3 أيام ،  وفي بعض الأحيان بيأخذ وقت أطول من كده لو لقيت لسه فيه طعم مرارة .
9. 
   
   عندما يصبح الترمس جاهز أضعه في الطبق البلاستيك وأضع عليه كمية من الملح مناسبة ( مش كثير علشان ما يتشربش بالملح ويبقى شديد الملوحة ، وكذلك مش ملح خفيف جدا ) الكمية تخضع للتقدير الشخصي .
10. 
    
    يوضع في برطمانات زجاجية ، ونترك 2 سم فاضيين في الأعلى ثم نملأ البرطمان ماء بحيث يغطي الماء الترمس وزيادة  ، يغطى البرطمان ويوضع بالثلاجة ، عند الإستهلاك البرطمان اللي فتحناه هو اللي حنستهلك منه إلى أن ينتهى ، ثم نفتح البرطمان الثاني ، الكيلو يعمل تقريبا 3  برطمانات متوسطة الحجم  ، إذا لم تتوافر البرطمانات الزجاجية يوضع في طبق زجاجي كبير أو حتى بلاستيك مع إضافة الماء الذي يغطي الترمس وزيادة ، ويغطى بورق نايلون ، ويوضع بالثلاجة للإستهلاك .

ملاحظة :

• 
  
  عند الإستهلاك لو وجدت فيه طعم ملح زيادة شوية عند الأكل فهذا نتيجة إنك بتتذوقي الماء المالح الذي تم نقع الترمس فيه ، في هذه الحالة تغسليه بشوية ماء من الفلتر الأول قبل الأكل علشان قشرة الترمس لا يكون بها ماء مالح وبيكون كويس  ( ولاحظي إن احنا بنكون مملحين الترمس بكمية معتدلة من الملح فالترمس من الداخل ملحه مظبوط ، وإذا كنت مش قادرة تظبطي الملح في الأول فقلة الملح أحسن من زيادته ).
• 
  
  الملاحظة الثانية إنه يفضل عدم ملامسة اليد للترمس أثناء إعداده ، اللهم إلا في مرحلة تنقيته من الزلط ، واستخدام المقصوصة وهي ملعقة كبيرة لهذا الغرض .

وبالهناء والشفاء ،،،

رز باللحم في الفرن بالمكسرات والزبيب

المقادير :

1 كيلو تقريبا لحم خروف بعظم
2 بصلة متوسطة مقطعة بالنصف
2/1 ملعقة صغيرة فلفل أسود
10 حبات حبهان ( هيل )
5 حبات قرنفل ( مسمار )
3 أوراق لورو ( ورق غار )
1 ملعقة صغيرة كركم
1 عود قرفة
--------------------------
2 كوب رز بشاور بسمتي
2 ملعقة صغيرة ممسوحة ملح
1 ملعقة صغيرة زيت
--------------------------
4/1 كوب لوز صحيح بقشره أو مقشر
شوية  لوز مقشر ومقطع بالطول
شوية صنوبر
كبشة ملء قبضة اليد زبيب منظف ومغسول

الطريقة :

1. في حلة برستو ( حلة الضغط ) إن توفرت ، نضع ماء + فلفل أسود + الحبهان + أعواد القرفة + القرنفل + ورق اللورو + البصل + الكركم ونترك الماء ليغلى .
2. قطعة اللحم نحدث بها بعض الشقوق المتوازية بالسكين ، ثم بعد غليان الماء نضيف اللحم ونغلق الحلة ، لمدة 40 دقيقة .
3. نخرج اللحم من الحلة ، ونصفي الشوربة .
4. في طبق بايركس أو فخار نضع الرز + الملح + 3 كوب شوربة + 1 ملعقة زيت فقط ، ونغطيها بورق ألمونيوم وندخلها الفرن على الرف الأوسط ودرجة حرارة 240ْ لمدة 30 دقيقة .
5. الآن نجهز المكسرات : في مقلاة صغيرة نضع قليلا من الزيت ، وعندما يسخن قليلا نضع الأول اللوز الصحيح ونقلب ثم اللوز المقطع ونقلب وفي الآخر نضع الصنوبر والزبيب لأنهم ما بيستحملوش النار ونقلب ونغلق النار سريعا .
6. نطلع صينية الفرن ونفتح غطاء الألمونيوم سنجدها شربت كل ماء الشوربة ، نرش عليها ماء الورد بالزعفران + رشة خفيفة من زيت قلية المكسرات ونغطيها مرة أخرى وندخلها الفرن لمدة 5 دقائق فقط ،  ثم نخرجها من الفرن ونطفئ النار.
7. نفتح غطاء الألمونيوم ونزين الوجه بالمكسرات ، ونضع  على الوجه اللحمة مسلوقة أو محمرة بالزيت ، والآن أصبح الطبق جاهز للتقديم .
8. يقدم بجانبه سلطة خضراء ، أو جرجير أخضر ، طبق مخلل ، أو طبق دقوس طماطم .

ملاحظات :

• إذا لم تتوافر الحلة البرستو يمكن سلق اللحمة في حلة عادية لكن زمن السلق سيكون أطول .
• بالنسبة لزمن وضع صينية الرز في الفرن 30 دقيقة ده هو الوقت اللي أخذته معي لكن ممكن يختلف معاك .
• بالنسبة للملح ، كل كوب رز أضع له 1 ملعقة ممسوحة ملح .
• بالنسبة لمقدار الشوربة ، كل كوب رز له 2/1 1 كوب شوربة .
• أيضا بالنسبة للشوربة عادة إذا كانت الشوربة دسمة لا أضع على الرز كل المقدار شوربة بل أضع شوربة + ماء ، أما إذا كانت الشوربة خفيفة فأضع كل المقدار من الشوربة . 
• اللحمة عند تجهيزها إذا كان فيها دسم كثير يزال بالسكينة ، لكن وجود بعض الدسم جيد لأنه يعطي طعم للأكل .

وبالهناء والشفاء ،،،

مربى مع زبدة

من الأطباق الخفيفة للعشاء طبق المربي ونقطع بجانبه بعض قطع الزبدة الغير مملحة ، ويؤكل بالخبز، ويمكن أن نضع في ساندويتش فينو ( صمون ) بعض قطع الزبدة ويستحسن قطعها شرائح رفيعة ، ثم نفرش عليها المربى بكمية قليلة ، ثم نسخنها في التوستر ، فالزبدة حتسيح وتذوب في الساندويتش ، والساندويتش حيقرمش من التوستر ، ويبقى طعمه حكاية .

ملاحظة :

• 
  
  استخدمت ماركات كثير للمربى لكن بصراحة الماركة اللي شدتني هي ماركة سان دالفور ST DALFOUR وهي إنتاج فرنسا ، رائعة ، وخاصة النوع اللي مكتوب عليه الفواكه الأربعة Four Fruits  ، بدرجة إني أقعد أدور عليه في السوبرماركت علشان ألاقيه ، واللي يميز المربى دي إنها طبيعية بدون نكهات صناعية أو ملونات أو حتى بدون مواد حافظة فكل المواد طبيعية ، ده حتى كمان لا يوجد بها سكر مضاف وبالرغم من كده لما الواحد بيأكلها بيجدها في منتهى الحلاوة لإن أنواع الفاكهة المستخدمة مسكرة .

وبالهناء والشفاء ،،،