صينية رز المحشي بالهمبورجر

طبعا كلنا عارفين المحشي المصري ، وكمان عارفين إنه بيأخذ وقت طويل في إعداده ، وعند الأكل بيتاكل في 10 دقائق ، السر بيكمن في الطعم الجميل لرز المحشي اللي مليان توابل وخضرة ، طيب لو حبينا نأكل رز المحشي بس بالطريقة السريعة نعمل إيه ؟ نعمله صينية في الفرن ! طيب ، وكمان لو حبينا إننا نغني طعمه نحط معاه إيه ؟ الجواب : همبورجر طبعا ، ليه اخترت الهمبورجر ؟ علشان لما ساعات كنت بعمل محشي لقيت لو وضعت همبورجر بين طبقات المحشي فالهمبورجر حيمتص الشوربة اللي فيها كل التوابل ويبقى طعمه حكاية ، بيكون حلو جدا ، وطعمه جميل مختلف عن الهمبورجر اللي متعودين عليه .

المقادير :

2 كوب رز مصري
6 حبات همبورجر أو أكثر من النوع اللي تفضليه
2 حبة طماطم متوسطة مخرطة صغير
2 بصلة متوسطة مخرطة صغير
1 قرن فلفل أخضر حار مفروم
1 حزمة شبت صغيرة مخرطة
2/1 حزمة بقدونس مخرطة 
2/1 حزمة كزبرة خضراء مخرطة
2/1 ملعقة صغيرة فلفل أسود
4/1 2 ملعقة صغيرة ممسوحة ملح
2/1 ملعقة صغيرة كمون
2/1 ملعقة صغيرة بهار
2/1 ملعقة صغيرة كزبرة ناشفة ناعمة
1 ملعقة كبيرة نعناع ناشف
2/1 عصير ليمونة
1 مكعب ماجي 
1 ملعقة كبيرة سمنة المراعي + 3 ملعقة زيت ذرة

الطريقة :

1. في بداية العمل نسخن الفرن .
2. في حلة نضع السمنة + الزيت ولما تسخن قليلا نضع البصلة ونحمرها ولما يصفر لونها قليلا نضع الطماطم المخرطة ونقلب ، ثم الفلفل الحار المفروم ، ثم نضع مكعب ماجي بعد بشره بالسكين .
3. نضع البهارات الناشفة  ثم الليمون ثم الخضرة المفرومة ثم الرز وأخيرا الملح .
4. ندهن صينية فرن فخار أو بايركس بالزيت ، ونطلع الهمبورجر من الفريزر مباشرة ونفكه ونصفه في قاع الصينية ، ثم نضع خلطة الرز عليه ونساوي سطحها بالملعقة .
5. نضع 3 كوب ماء ( إذا توافر شوربة دجاج يبقى كويس ،  أنا عملتها بالماء ) ونغطي الصينية بورق فويل ألمونيوم .
6. يدخل الفرن على الرف الأوسط ، درجة حرارة الفرن 240ْم .

 ملاحظات :

• بالنسبة للمدة بعد 40 دقيقة شفت الصينية لقيتها لسه فيها ماء والرز مش مستوي فوجدت إنها محتاجة زمن إضافي فغطيتها كويس ( خلي بالك من إيدك وإلبسي جونتي الفرن ) وأدخلتها الفرن لمدة 20 دقيقة كمان ، ووجدتها نضجت كويس قوي والطعم كان ممتاز ، بس أنا مستغربة إنها أخذت وقت طويل كده في الفرن فالرز نوعه مصري يعني بيستوي بسرعة ، وكمان أنا قلبته شوية مع الخضرة فوق البوتاجاز ..
• بالنسبة لكمية الماء أنا حسبت كوب وربع ماء لكل كوب رز وكمان نصف كوب ماء لنضج الهمبورجر .
• بالنسبة للملح فحسبتها ملعقة ملح ممسوحة لكل كوب رز ، وربع ملعقة ممسوحة لخلطة الخضرة ، ماننساش إننا استخدمنا مكعب ماجي وده فيه ملح وكمان الليمون بيعطي مزازة قليلة .
• الخضرة تقطيعها بمقص المطبخ أسهل بكثير من تقطيعها بالسكين .

وبالهناء والشفاء ،،،