صينية ريش ضاني بالفرن مع خضروات

الريش لما بتتحط في أي صينية بتديها طعم رااائع ، وخصوصا إذا كانت الريش نوعها طري واللي بيساعد على كده إننا نضربها  كويس قبل ما نتبلها ، وكمان الطبخ في الفرن سهل لإن الواحد بيعمل الصينية ويحطها في الفرن وكفاية إنه يشقر عليها كل شوية علشان يتأكد محتاجة مية وإلا لأ .

المقادير :

2/1 كيلو ريش ضاني

4 حبات بطاطس متوسطة مقطعة بالطول

2 حبة كوسا مقطعة بالطول

1 حبة جزر مقطعة بالطول

1 حبة طماطم متوسطة مقطعة أنصاف دوائر

1 بصلة متوسطة مقطعة أهلة

1 فلفل رومي بارد مقطعة بالطول

1 قرن فلفل أخضر حار مفروم

3 فصوص ثوم مفرومة
1 علبة معجون ( صلصة ) طماطم 125جرام

2/1 ملعقة ملح

2/1 ملعقة فلفل أسود

1 ملعقة بهار

2 ملعقة كبيرة زيت ذرة

الطريقة :

1. تدق الريش بالأداة الخاصة بذلك ، أو بيد الهاون فهذا يساعد على نضجها .
2. نخلط المكونات السابقة كلها على بعضها ونضيف لها ماء بحيث يغطي كل المكونات .
3. نضعها في فرن حار 260ْم على الرف السفلي المباشر للنار لمدة ساعة كاملة ( بدون تغطية بورق الفويل الألمونيوم ) ، ويزاد الماء عند الحاجة بحيث يكون فيها عند التقديم شوية مرقة .
4. تقدم مع رز أبيض أو رز بشعرية وما ننساش السلطة الخضراء لإنها مهمة .

وبالهناء والشفاء ،،،